پڕۆژەیەكێ گەشتیاری ل زاخۆ دێ ب سەدان دەلیڤەیێن كاری بۆ گەنجان پەیداكەت
زاخۆ، دلۆڤان هالۆ:
ئێك ژ پڕۆژەیێن گرنگ و جیاواز یێن وەبەرهێنانێ ل تەنشت كۆڕنیشێ پرا دەلال ل ئیدارا سەربەخۆ یا زاخۆ دهێتە دروستكرن كو ئەڤ پڕۆژە دێ ب سەدان دەلیڤەیێن كاری بۆ گەنجێن دەڤەرێ پەیداكەت، و هەروەسا ئەڤ پڕۆژە دێ جوانیەكا زێدەتر دەتە كۆڕنیشێ پرا دەلال.
جگەر خوین تاهر، بەرپرسێ ڕێڤەبەریا گشتی یا وەبەرهێنانێ ل ئیدارا سەربخوە یا زاخۆ بۆ ڕۆژناما ئەڤرۆ دیار كر، ل سەر ڕووبەرێ ١١ هزار و ٧٥٩ مەتران و ب گۆژمێ زێدەتری ٦ ملیۆن دولاران ئێك ژ پڕۆژەیێن گرنگ یێن گەشتیاری و وەبەرهێنانێ ل تەنشت كۆڕنیشێ پرا دەلال ل ئیدارا سەربخوە یا زاخۆ دهێتە دروستكرن، ل هەیڤا ١١ دێ ب دووماهی هێت و كەڤیتە د خزمەتا وەلاتیێن دەڤەرێ دا.
بەرپرسێ ڕێڤەبەریا گشتی یا وەبەرهێنانێ ل ئیدارا سەربخوە یا زاخۆ، ئاماژە ب وێ چەندێ ژی كر، ئەڤ پڕۆژە پێك دهێت ژ كەسكاتی و داروبار و جهێن پیادێ ب ڕێژا ٨٠٪ یا پرۆژەی، ٨ خوارنگەهـ و ٥ كافیێن سەردەم و ٥٦ كۆشكێن جوان و برێك و پێك و یارییا زیپلاین كو دەربازی لایێ دی یێ خابیری دبیت و یاریێن زاڕۆكان و ٤٨ گەمی ب چەندین جۆران و ٤ تڕۆمبێلێن گۆلفێ و ٢ تڕۆمبێلێن كلاسیك و پاركەكا بن ئەرد بۆ ڕاوەستاندنا تڕۆمبێلان دێ دڤی پڕۆژەی دا هەبن.
گۆت ژی:»ئەڤ پڕۆژە دێ بیتە تەمامكەرێ كۆرنیشێ پرا دەلال كو ئەڤە ژی دبیته بارسڤكی بۆ هاریكاریكرنا ئەركێ حكومەتا هەرێما كوردستانێ د بجهئینانا پڕۆژەیێن ژێرخانا ئابووری یا باژێری دا ب ڕێكا وەبەرهێنانێ، هەر دیسان ئەڤ پڕۆژە دێ ب سەدان دەلیڤەیێن كاری بۆ گەنجێن دەڤەرێ پەیدا كەت و جوانیەكا زێدەتر دەتە كۆڕنیشێ پرا دەلال».
