پۆستێ ده‌ڤه‌ردارێ باتیفا و ناوچه‌داریا بێگوڤا هاتنه پڕكرن
زاخۆ، عه‌لی حاجی:
سه‌رپه‌رشتێ ئیداره‌یا سه‌ربخوه یا زاخۆ د كۆنگره‌یه‌كێ رۆژنامه‌ڤانی دا دیار كر، ب گوژمێ شه‌ش ملیار دیناران د سالا نوو دا هه‌ژماره‌كا پروژه‌یان ل ده‌ڤه‌رداریا باتیفا دێ هێنه بجهئینان و دبێژیت: هه‌موو فایلێن گرێدای ب ده‌ڤه‌رداریا باتیفا ڤه بۆ وێ دێ هێنه هنارتن.
گوهدار شێخۆ، سه‌رپه‌رشتێ ئیداره‌یا سه‌ربخوه یا زاخۆ گۆت: “ئێدی ب ره‌نگه‌كێ فه‌رمی باتیفا ژ ناوچه‌داریێ بوو ده‌ڤه‌رداریه‌ك سه‌ر ب ئیداره‌یا سه‌ربخوه یا زاخۆ ڤه و بێگوڤا ژی وه‌كو ناوچه‌داری هاته هه‌ژمارتن، ب ڤێ هه‌لكه‌فتێ ژی (فه‌رهاد مه‌حمود) پۆستێ ده‌ڤه‌ردارێ باتیفا ب وه‌كاله‌ت و (سه‌گڤان خێله‌خی) ژی پۆستێ رێڤه‌به‌رێ ناوچه‌داریا بێگوڤا ب وه‌كاله‌ت دێ ب رێڤه به‌ن، ئێدی وه‌كو قه‌زا سه‌ره‌ده‌ری د گه‌ل باتیفا دا دێ هێته كرن و هه‌موو ئه‌و فایلێن كو گرێدایی ب ده‌ڤه‌رداریا باتیفا ڤه د ده‌مه‌كێ نێزیك دا بۆ وێ دێ هێنه ڤه‌گوهاستن، دیسا وه‌كو ده‌ستپێك ژی د سالا نوو دا ب گوژمێ شه‌ش ملیار دیناران هه‌ژماره‌كا پروژه‌یان ل ده‌ڤه‌رداریا باتیفا دێ هێنه دروستكرن ژ وان ژی دروستكرنا جادده و ده‌رگه‌هێ باتیفا و گه‌له‌ك پروژه‌یێن دیتر”.
گۆتژی: “د ده‌مه‌كێ نێزیك دا نه‌خۆشخانه‌كا مه‌زن ل ده‌ڤه‌رداریا باتیفا دێ هێته ئاڤاكرن و پێشتر ژی ئه‌و پرۆژه‌یه هاتیه راگه‌هاندن و دێ هه‌موو بزاڤان كه‌ین خزمه‌ته‌كا باشتر بۆ ڤێ ده‌ڤه‌رداریێ بهێته كرن”.
ل دۆر ئاریشا ده‌ڤه‌رێن نه‌دبن كونترۆلا حكومه‌تا هه‌رێما كوردسیانێ دا گۆت: “ئه‌م چاڤه‌رێینه ده‌ڤه‌ردارێ باتیفا راپۆرته‌كێ ل دۆر وان ده‌ڤه‌ران پێشكێشی مه بكه‌ت، داكو ئه‌م ژی ژلایێ خوه‌ڤه بۆ جهێن د سه‌رخوه دا بلند بكه‌ین، ژ به‌ركو هه‌ژماره‌كا زێده یا گوندێن ڤێ ده‌ڤه‌رێ د نوكه دا هاتینه چولكرن”.
