پۆلیسێن دهۆكێ 16 تۆمەتبار دەستەسەركرن
ئەڤرۆ
دهۆك، لەزگین جوقی:
پۆلیسێن پارێزگەها دهۆكێ ل دوهی 27/2/2023ێ دەستەسەركرنا 16 تۆمەتباران راگەهاند و هەموو تۆمەتبار ل دووڤ یاسایێ بۆ دادگەهێ یێن هاتینە رەوانەكرن.
پەیڤدارێ پۆلیسێن پارێزگەها دهۆكێ د كۆنگرەكێ رۆژنامەڤانی دا دیار كر، 16 تۆمەتبار ژ لایێ ئەفسەر و كارمەندێن نڤێسینگەهێن نەهێلانا گونەهباریان ڤە ل دهۆكێ هاتینە دەستەسەركرن، ژ وان ژی هەشت تۆمەتبار ژ لایێ نڤێسینگەها نەهێلانا گونەهباریان یا مالتایێ هاتینە دەستەسەركرن، كو د پرۆژەكێ شوقەیێن ئاكنجیبوونێ دا دو تۆمەتبار سەرا دزینا كەلوپەلێن ناڤ مالان هاتینە دەستەسەركرن و سێ تۆمەتبار ژی سەرا دزینا پاران ژ قاسا مەزكەفتنەكێ ل مالتایێ هاتینە دەستەسەركرن، دیسا تۆمەتبارەكی حەفت دەفتەرێن دۆلاری ژ مالەكێ دزیبوون ل سەنتەرێ پارێزگەها دهۆكێ و د ماویێ ئێك دەمژمێر دا هاتیە ئاشكراكرن و تۆمەتبارەكی خەلك د خاپاند و پارە ژێ وەردگرتن ئەو ژی هاتیە دەستەسەركرن».
پەیڤدارێ پۆلیسێن پارێزگەها دهۆكێ گۆت: «دو تۆمەتباران ل دهۆك و سێمێلێ گەلەك كێڤلێن كارەبێ ب بهایێ 80 ملیۆن دیناران دزیبوون و پشتی سكالا ژ لایێ ریڤەبەریا كارەبێ ڤە هاتیە تۆماركرن، ئەڤ تۆمەتبارە هاتنە دەستەسەركرن و رەوانەكرن بۆ دادگەهی».
گۆتژی: «نڤیسینگەها دهۆك یا نەهێلانا گونەهباریان تۆمەتبارەك دەستەسەركریە كو 12 موبایلێن گران بها دزینە، ب شەڤ چوویە دزیێ دەمێ ئەنجامدانا دزیێ هاتیە دەستەسەركرن، هەروەسا باندەكێ تۆمەتباران ل تاخێ سەرهلدان هاتیە دەستەسەركرن، كو كەلوپەل ژ ئاڤاهیان ددزین، ل گەل دەستەسەركرنا دو تۆمەتباران ژ بەر خراب بكارئینانا ئامێرین پەیوەندیكرنێ«.
