پیتێن من په‌یڤێن ته دسۆژن
كورته چیرۆك
كیڤی عارف
ده‌مێ ل به‌ر چاڤێن من وندا دبی، سیتافكا خه‌ریبیا من ل دووڤ ته دگه‌رت، هه‌رده‌م دڤێت ته ببینیت، ژبه‌ر كو هه‌ر توی ده‌رمانا ده‌ردێن من و ساخیا هه‌موو برینێن من، هه‌ر توی په‌یڤێن هه‌لبه‌ستا من یا به‌رزه‌ی, حه‌ز ژ ته دكه‌م و حه‌ز ژ هه‌می په‌یڤێن حه‌زژێكرنێ دكه‌م، ئه‌شقا من سه‌ر هه‌می په‌یڤێن حه‌زژێكرنێ كه‌تیه، گازی دكه‌م هۆ ئه‌و ژنا دگه‌ل هه‌ر چپكه‌كا بارانێ، خه‌ریبی و حه‌زژێكرنا من پێكڤه كۆم كرین، پسیارا ئه‌شق و خه‌ریبیا نڤستی ژ ته دكه‌م و رحا من یا پری هه‌ست و ئه‌شقا ته, حه‌ز ژ ته‌دكه‌م و پیتێن ئاخینكێن ته یێن به‌رده‌وام كۆم دكه‌م، دگه‌ل هه‌ر سلاڤه‌كا ژ ده‌ڤێ ته ده‌ردكه‌ڤیت بێ په‌ر دێ ل ئه‌سمانێ هه‌ستێن ته دفرم و ل سه‌ر عه‌وره‌كی داده‌م، دا پیتا ته تێركه‌م ب خوناڤێن هه‌لبه‌سته‌كێ و دێ دگه‌ل خوه به‌مه گه‌شته‌كێ دناڤ رۆژێ دا و ب رۆناهیا هه‌یڤێ نخێڤم، دێ نڤێسم توی حه‌زژێكرنا من یا ئێكێ و یا راست , توی رۆژا ژدایك بوونا من, نڤیسینا هه‌لبه‌ستا منی, ژێده‌رێ دلخوه‌شیا منی, بۆ ته ب تنێ خوه‌شتڤیا من دیاری نه نڤیسینێن من, دا خشته‌یێ حه‌زژێكرنا من بخوینی , ده‌مێ هه‌ستێن ته ل ده‌ڤ من هه‌ر بهوسته‌كا روبارێ ئه‌شقا من یێ منه , ده‌مێ تو ل هه‌مبێزا من ئاخینكێن ته هه‌می دهێنه دناڤ من دا , ده‌مێ تو ل به‌ر چاڤێن من خه‌ریبی من بۆ خوه دبه‌ت, هزرا گه‌له‌ك پسیارا د مێشكێ خوه دا دكه‌م و من چ به‌رسڤ بۆ نه دیتی نه , هیڤی وه‌ك چاره‌سه‌ریه‌كا ده‌ستپێكی بۆ وان پسیاران, من هیڤی هندی وان پسیاران بۆ گه‌له‌ك تشتان هه‌یه, ئێك ژ وان هیڤیان نه هزركرن بۆ هیڤیێن من , ئه‌ڤین ل ده‌مێ كوتر پۆسته‌چی و نامێن ئه‌ڤیندارا دهلگرتن گه‌له‌ك چێتر بوو ژ ئه‌ڤینا نها یا نامێن موبایلا, چه‌ندین خه‌ریبیێن ئه‌ڤینیێ موبایلێ بن ئاخ كرن سه‌ره‌رای هندێ كو دووریا نزیك دكه‌ت, خه‌لكی خوه‌شیا ئه‌ڤیندارا ژبیركر ده‌مێ د ما نه ل هیڤیا پۆسته‌چی و ئه‌و خوه‌شیا ده‌مێ په‌یڤا ( حه‌زژته‌دكه‌م ) ب ده‌ستێن خوه ب جوانترین شێوه د نه‌خشاند ئه‌و خوه‌شی و ترسا هه‌لگرتنا ناما ئه‌ڤینیێ دگه‌ل خوه تا دوماهی هه‌ناسه, حه‌زژێكرنا پاك و دروست ژ مێژه مری و نه‌مایه ل مانێ, هه‌ستێن من یێن جان, راستگو , ب ئێش كوژه‌ك, هه‌ر تو بووی، بێده‌نگیا من وێ نا گه‌هینت كا چ ل دورماندۆر من چێ دبیت لێ ئه‌وا چێ دبیت ژی پێدڤی ب ئاخفتنێ نینه, هێشتا پیتێن من دلۆڤانیا دوهی یا تێدا , هه‌تا نها هه‌ناسا بیرهاتنێن ته هه‌لدكێشم, دناڤ لاپه‌رێن خوه دا, په‌یڤ و گولێن خوه دا د هه‌لكێشم, چه‌وا نه و من راستیا پیتێن خوه ژ پیتێن ته وه‌رگرتینه, چه‌وا نه و ئه‌ز یێ فێربوویم په‌یڤێن خوه ره‌نگ بكه‌م ژ راستگۆیا ره‌نگێن په‌یڤێن ته, چه‌ند د ئێشم ده‌مێ باهۆزا خه‌ریبیێن په‌یڤێن ته ل من دده‌ت و وان په‌یڤان نه بینم, ئه‌ز یێ خوه ب په‌یڤێن هه‌بوونا ته ڤه دگرم, هه‌ست ب خه‌ریبییا پیتێن ته دكه‌م و نا بینم, هه‌ست ب هه‌بوونا ته د ناڤ پیتێن خوه دا دكه‌م, یێ ل پیته‌كێ د گه‌رم ژ من به‌ره‌ڤ ته ڤه هاتی, ل ده‌ریایا خوه یا بێده‌نگ د گه‌رم, ل كنارێ خوه یێ جوان, ب تنێ په‌یڤێن خوه د بینم د تاریێ دا دكه‌نه گری, پیتێن من یێن كۆره خوه ب دیوارێ رابۆری ڤه د گرن به‌لكی بیرهاتنا ڤه‌كه‌ت به‌ره‌ڤ ئه‌ڤین و ئاشبوونێ ل په‌یڤێن ته دگه‌رن، به‌لكی هنده‌ك په‌یڤان ببینیت هه‌ناسا وان ژ هه‌ناس و خه‌ریبیا من بت, ده‌رزه‌كا كه‌یفێ بۆ ڤه‌بت, كی هه‌یه بۆ گولێن من, پیتێن من, بو په‌یڤێن من هه‌كه تو نه بی؟ توی خوه‌شتڤیا ژیێ منی, ئیشه‌ڤ ره‌نگه هه‌ڤالێ خه‌وا ته بم گه‌ر گه‌هشتم تو ژی هاریكار به, سلاڤێن حه‌زێن من پاسه‌وانن ل سه‌ر سنوورێ جووت لێڤێن ته، ژ باخچه‌ڤانێن باخێ رویێن ته نا ترسن, دێ ژ خویسارا گه‌رده‌نا ته خوها خوه شوون.
