پیتێن ناڤێ ته…
كوسه‌ر شوكه‌ت
نوتفه‌ك یا ل به‌ندا چێكه‌ره‌كی یه، ب ده‌ستكرنا ته سه‌ر ژنوو دێ ڕۆحا من پێكهێت، شوون تلێن ته ل سه‌ر سینگێ من ئه‌و زمانێ ڕۆحێ یه، یێ كه‌س تێنه‌گه‌هیت ژبلی ته، هه‌ر ژ بۆ ڤێ شه‌ڤ نڤێژێن من د محرابا ته دانه، روكع و سجودێن من بێ په‌رده ڕووس ل به‌ر عه‌رشێ له‌شێ ته دكه‌ڤتینه، هه‌ر تویی دشێی ب هه‌ناسه‌یه‌كێ جیهانێ ب مه‌زنیا وێ ڤه ب ڕاده‌یێ خه‌ندقینێ، ته‌نگ بكه‌ی. هه‌ر تویی دشێی وێ پارچه‌یا ناڤ دكه‌ن ب دل، بكه‌یه پێكهاته‌یه‌كا ژ گه‌ردوونی و بێی ته چو ڕۆناهی لێ نه‌ده‌ن! هه‌ر تویی دشێی دیار بكه‌ی ئه‌وا جیهانا بچووك ژ یا مه‌زن جودا دكه‌ت هه‌ستێن ئافراندیه‌كی نه، نه شیانێن ئافرێنه‌ری. هه‌ر تویی دشێی ڕابگه‌هینی برینداركرنا عاشقه‌كی برینداركرنا خالقی یه نه مخلوقی…
ب دێمێ ته په‌رده ژ سه‌ر دیتنێ ڕادبن، بۆ ئاشكه‌راكرنا خوه‌سه‌پاندن و دلۆڤانیا دلۆڤانی، بۆ گه‌هشتنا زانین و دانایا وی یا بێ به‌رانبه‌ر و شیانێن وی یێن بێ سنۆر، د ئاماده‌بوونا ته دا په‌رستنا عه‌زاماتا وی دهێته‌كرن.
ژ مه‌زناهیا خوه من پێك بینه، ب هه‌ر دو لێڤێن خوه ببه ڕوحه‌ك و بحه‌لیێ ناڤ له‌شێ من، تێكه‌لی من ببه ژ من چو نه‌هێله، د پێكئینانا من دا، نوت و نه‌ه ناڤان بهه‌رفینه، ب تلێن خوه بۆ مه‌زنی و ته‌قدیسكرنا زاتێ خوه ژ هه‌ر هه‌ڤپشكه‌كی، هه‌ر پیته‌كێ ژ هه‌ر شه‌ش پێتێن ناڤێ خوه، ل سه‌ر له‌شێ من بكه ئایه‌ته‌ك…
