پیرۆزە ل كوردستانییان ناسناڤێ كۆپا ئیراقێ
ئیحسان حەسەن
سوبەهی رۆژەكا دیرۆكی یە بۆ وەرزشا كوردستانێ ب گشتی و پارێزگەها دهۆك و ئیدارا سەربەخویا زاخۆ ب تایبەتی، دەمێ هەردو شانازیێن فوتبۆلا كوردستانێ ئەلهویێن چیا و كەلها سور فینالا كوپا ئیراقێ ل یاریگەها شەعب لبەغدا ئێكلادكەن، دوور ژ هندێ كا كیژ تیم دێ ناسناڤێ قارەمانییێ بۆ جارا ئێكێ ددیرۆكا خودا بدەستڤە ئینیت، ل پێش وەخت ئەم پیرۆزباهییێ ل تیما سەركەڤتی دكەین، ڤی ناسناڤی ل هەموو خەلكێ كوردستانێ و حەژێكەرێن فوتبۆلێ پیرۆز دكەین، دبێژنە تیما رێزا دویێ ژی داخوازا چەنسەكێ باشتر دهەلكەڤتێن داهاتی دا بۆ تە دخوازین، فینالا بڤی قەبارێ مەزن ئەز باوەرم حسیباتێن خوە یێن تایبەت هەنە، دێ یا جودابیت ژوان دیدارێن خولێ دهێنە كرن، ژبەر كو دڤان رەنگە یاریان دا نە گرنكە تیمەك ئاستێ خوە یێ چاڤەرێكری نیشان بدەی، گرنك ئەوە سەركەڤتنێ بدەستڤە بینیت هەتا ئەگەر ب تەپەكا مری ژی بیت، ژبەر كو دەلیڤەیا قەربوكرنێ نینە، هەر چەندە ئەم وەكو وەرزشڤان دگەشبینین دێ فینالەكا بهێز بیت ب ئاستێ خوە، دیسان یا جوان بیت ب گیانێ خوە یێ وەرزشی و ئەز باوەرم ئەڤە داخوازیا هەر كوردستانیەكێ یە كو ئەم وینەكێ جوان نیشا دونیایێ هەمییێ بدەین و بهەمی رەنگان ئەنجامێ یاریێ قەبوول بكەین، ژبەر كو چ جوداهی دناڤبەرا هەردو یانەیان دا نینە، ژبلی هەڤركییەكا پاقژ و براینی، هەرچەندە لدووڤ پێشبینیان رەنگە یێن كو پووتەی ددەنە فوتبۆلا ئیراقێ بوچوونێن وان دجێوازبن، لێ دەمێ بابەت دبیتە هەڤركییا دهۆك و زاخۆ دەستنیشانكرنا تیما سەركەڤتی دبیت یا بزحمەت بیت، ژبەر كو هەردەم دیدارێن وان لسەر هندەك خالێن بچویك دراوەستیت ب تایبەت لایەنێ دەرونی و زاخا یاریزان، ئەز باوەرم یێ بشێت پتر یێ ئارمام بیت و مفای ژ ئێك دەلیڤە ژی بینیت، دێ پتر چەنس هەبیت كو دلێ جەماوەرێ خوە خۆش كەت و بگەهیتە ناسناڤێ مەزن، ل دووماهییێ یا من دڤێت بێژمە هەردو رویێن گەش یێن فوتبۆلا كوردستانێ، چونكو ئەڤە چەندین سالە هوون یێ خەباتێ دكەن كو بگەهنە ڤێ رۆژێ، ژبەر بهایی ڤێ فینالێ یێ تەكنیكی و جەماوەری وناڤ و دەنگییا هەردو یانەیان، داخوازا سەركەڤتنێ بۆ هەوە دكەین ب هیڤیا هندێ هوون بشێن دیاریا سوبەهی دا ئێك ژ جوانترین ئاست و هونەرێ فوتبۆلێ نیشان بدەن، هەر تیمەكا ب سەركەڤیت چ دهۆك بیت یان زاخۆ، تیما دۆراندنی ب دەست قوتان و ب جوانترین شێوە پیرۆزاهییێ لێ بكەت، هەروەسا داخوازێ ژ پشتەڤانێن هەردو یانەیان دكەین خوە دووربێخن ژ ئاخفتنێن زڤر و دژوار، بلا پشتەڤانییا هەوە تنێ بۆ بلندكرنا زاخا یاریزانێن هەوە بیت، دیسان داخوازێ ژیاریزان و كادرێ راهێنانێ دكەین كونترۆلێ لسەر خوە بكەن و رێزێ ل بریارێن دادڤانێ یاریێ و هەڤركێ خوە بگرن، وەنەكن كو رەفتارێن هەوە كارتێكرنێ ل پەلوكێن یاریگەهێ بكەن، وینەكێ خراب نیشان بدەن، ژبەركو كەسێ دۆراندی نینە دڤێ یاریێ دا، هیڤیا مە ئەڤ فینالە سۆزا خوە بجه بینیت ژبەر كو سەركەڤتنا هەرە مەزن هەر بۆ فوتبۆلا كوردستانێ یە.
