پیرۆزە ل كچێن سەنحاریب ناسناڤێ زێڕین
ئیحسان حەسەن
بدەستڤەئینانا كچێن یانەیا سەنحاریب ناسناڤێ خولا ئیراقێ یا ڤۆلیبۆلێ بۆ جارا دوویێ ددیرۆكا خوەدا، دهێتە هژمارتن ئێك ژدەستكەفتێن كێم وێنە بۆ وەرزشا كوردستانێ ب گشتی و پارێزگەها دهۆكێ ب تایبەتی، بێ گۆمان گەهشتن ب هەر دەستكەفتەكێ یان ئاستەكێ بلندتر پێدڤی ب بەرهەڤیێن جەستەیی و دەروونی، كارزانیێن باش و پلانێن دروست، مفا وەرگرتن ژرێكێن راهێنانێ یێن نوو و پشتەڤانی و دووفچوونا بەردەوامن، ب دیتنا من ئەوا نوونەرا پارێزگەهێ كری تا كو گەهشتیە ڤی ناسناڤێ زێرین ڤەدگەریتە چەند هۆكاران، یا ئێكێ هەبوونا هژمارەكا یاریزانێن زیرەك و ژێهاتی دناڤا رێزێن تیمێ دا كو هەموو ساخلەتێن قارەمانان لدەڤ هەبوون، ژوانا كاپتنا تیمێ یا گەنج باشترین یاریزانا ئیراقێ و قارەمانییێ دورین رومێل و هەڤالا وێ یا خۆدان سەربۆر دەشنێ قاسم ئەوێن شیاین دگەل هەڤالێن خوە ئێك جوانترین ئاست نیشان بدەن، یا دوویێ هەبوونا دەستەكا راهێنانێ یا زیرەك ب سەركێشیا دكتور هەكار برقی ئەوێ شیای هاندانا یاریزانێن خوە بكەت ژبۆ بدەستڤە ئینانا باشترین ئەنجامان، ژبلی هندێ خواندنا وی یا دروست بۆ تیمێن بەرامبەر، مفا وەرگرتن ژ خالێن بهێز یێن تیما خوە ب تایبەتی لدەڤەرا پێشییێ، ژبلی هندێ ئاستەكێ هەڤسەنگ دبەرەڤانیكرنێ ژدەڤەرا خوە دگەل وەرگرتنا بریارێن ڤەبر ددەمێ گونجای دا و تەكتیكا وی پتر دیاریا فینالێ دا دیاربوو، یا سێیێ هەستكرن ب بەرپرسیارەتییا دیرۆكێ وەكو یانەیەكا خودان سەنگ ب تایبەت د وەرزشا ئافرەتان دا و بلندكرنا ناڤێ پارێزگەهێ و یانەیا خوە ئەگەرەكێ دی بوو ، یا چارێ و یا ژهەمییا گرنكتر پشتەڤانییا بێ سنۆر یا حكومەتا هەرێما كوردستانێ ب دانانا ژێرخانەیەكا وەرزشی یا تایبەت بۆ ڤێ یانەیێ، دیسان كارگێریا یانەیێ ئەوا چ كێمتر خەمی نەكری ژبۆ بەرهەڤكرنا هەر تشتەكێ پێدڤی بۆ سەركەفتنا كاروانێ تیمێ، بهێزكرنا رێزێن وێ ب هەڤبەستێن هژمارەكا یاریزانێن خودان شیان یێن دەرڤەی پارێزگەهێ خالەكا دی بوو، یا من دڤێت بێژم بتایبەتی پشتی ڤێ پلا سەرفەرازیێ كو ئەركەكێ مەزنتر كەڤتە لسەر ملێن ڤێ یانێ، ژبەركو دێ ل پاشەرۆژێ بیتە نوونەرا ئیراقێ و كوردستانێ دقارەمانیێن دەولەتی دا، ئەگەر مە بڤێت ناڤێ یانەیا مە ل چارچوڤەیێ نافخویی دەركەڤیت و پتر ناڤ و دەنگییێ وەرگریت، دڤێت هەر زوو كارەكێ باشتر و پشتەڤانییەكا مەزنتر لڤێ تیمێ بهێتەكرن، چونكو جیوازییەكا مەزن دناڤبەرا ئاستێ ئیراقێ ووەلاتێن كێشوەرێ ئاسیا دا ب تایبەت دوەرزشا ئافرەتان دا هەیە، بەلێ تشتێ دلخۆش ئەوبوو ژبلی هندێ كو ناسناڤێ ڤێ خولێ ژهەرێما كوردستانێ دەرنەكەڤت، هەر دێ مینیت ئامادەبوونا خێزان و جەماوەرێ فوتبۆلا یانەیا دهۆك ئەوا ب دەستپێشخەریا كارگێریا یانەیێ بۆ پشتەڤانی و هاندانا كچێن باژێرێ خوە چووینە هەولێرا پایتەخت وێنەیێ هەر جوانێ ڤێ فینالێ، یا دل خوشتر و جهێ شانازیێ ئەڤ ناسناڤە كەڤتە ل بال وان دەستكەڤتێن مەزن ئەوێن یانەیێن پارێزگەهێ لسەر ئاستێ تیمان ب وەرزشێن فوتبۆلێ و فوتسالێ تا گەهشتییە ڤۆلیبۆلێ لسالا 2025ێ بدەستڤە ئیناین، هەر ئەڤە سەركەڤتنا ژهەموویان مەزنتر.
