پیرۆزە (٦٢) سالیا دەنگێ كوردستانێ دەنگێ كوردستانێ شۆڕەشەك بوو د ناڤ شۆڕەشێ دا
سەباح بەیتوللا
هەر وەكی خۆیا و ئاشكرایە پشتی هەلبوونا چریسكا شۆرشا ئیلۆنا نیشتیمانی یا مەزن ب سەركردایەتیا پارتیا مە و ب رێبەراتییا مستەفا بارزانیێ مەزن. دەنگێ كوردستانێ ل ٢٨/٩/١٩٦٣هاتە دامەزراندن و بوو دەنگێ هەمی شۆرشگێر و ئازادیخوازان.
دەنگێ كوردستانێ بوو بەربەستەك ل بەرانبەر پیلانێن دوژمن و داگیركەرێن كوردستانێ، لەوا دوژمنی هەمی پێكۆل دكرن كو ڤی دەنگی نەهێلیت و د هەمی دانوستاندنێن خۆ دا ل گەل سەركردایەتیا پارتی ئێكەم مەرجێ رژێمێ ئەوبوو؛ دەنگێ كوردستانێ بهێتە راگرتن، چونكی دزانی دەنگێ كوردستانێ چ برینەكا مەزن ئێخستیە ل ناڤ لەشێ رژێمێ ل سەردەمێ شۆرشێ دا، رۆلێ دەنگێ كوردستانێ گەلەكێ كاریگەر و مەزن بوو، ژبەر هندێ ببوو پێشمەرگە د ناڤ هەمی چەپەران دا و ببوو كادر د ناڤ هەمی باژێر و گوندان دا، ببوو سكرەكێ مەزن بەرانبەر پڕۆپاگندەیێن ژەهراوی یێن دوژمنی.
پەیاما راستەقینەیا دۆزا مللەتێ كورد دگەهاند و ئەو زۆلم و زۆریا ل دەرهەقی مللەتێ كورد دهاتە كرن، ب رەئیا ناڤخۆ و دەوروبەر و دونیایێ دگەهاند.
دەنگێ كوردستانێ ببوو دەنگێ هەمی نەتەوەیێن دیتر ل كوردستانێ.
دەنگێ كوردستانێ هەمی سنوور دبڕین و پەیاما گەلێ كورد دگەهاند و هەتا دگەهاندە زیندانیێن سیاسی د ناڤ زیندانێن رژێمێ دا.
دەنگێ كوردستانێ ببوو دۆست و هـەڤالێ هەر تاكەكێ كورد ل هەمی چین و تەخان دا.
دەنگێ كوردستانێ ببوو دۆست و هەڤالێ هەر تاكەكێ كورد ل هەمی چین و تەخان دا.
دەنگێ كوردستانێ ببوو هەلگری پەیامێ د ناڤبەرا مللەتی و شۆڕشێ دا
دەنگێ كوردستانێ ببوو هەلگرێ پەیامێ د ناڤبەرا مللەتی و شۆرشێ دا.
جەماوەرێ كوردستانێ و هەتا خەلكێ ناڤەراست و ژێریا ئیراقێ و وەلاتێن دەوروبەر گوهدێریا دەنگێ كوردستانێ دكر و راپۆرت و ڤەكۆلین و گۆتارێن دەنگێ كوردستانێ شرۆڤە دكرن و چەندین وەلاتا ئەنسات ل سەر دكر، رەسەناتیا دەنگێ كوردستانێ وەلێ هاتبووو كو هەمی كەسەك گوهدێریێ بكەت.
دەنگێ كوردستانێ ژبلی بەلاڤكرنا چالاكیێن پێشمەرگەی چ بەیاڤەكا ژیانێ ژبیرنەكربوو، تەنانەت چارەسەری بۆ هەمی گرفتەكێ دەستنیشان دكر و بیاڤێن پەروەردێ و ساخلەمیێ و چاندنێ و جڤاكی…هتد. بەلاڤ دكرن، لەوا جهێ خۆ د ناڤ هەمی جەماوەرێ كوردستانێ دا گرتبوو و وەلێهاتبوو كو ئێدی مللەت و ئێزگە نەدشیان بێ ئێكودو بژین و ببوو شۆرشەكا سەرتاسەری ل كوردستانێ، لەوما ب وێرانە ڤە دێ شێین بێژین
دەنگێ كوردستانێ شۆرشەك بوو د ناڤ شۆرشا ئیلۆن و گولانێ دا و دەنگێ كوردستانێ؛ دەنگێ هەمی خەلكێ كوردستانێ بوو ب هەمی نەتەوە و ئایین و ئۆلان ڤە.
هەمی پێشمەرگەیەكی و هەمی كوردەكێ دلسۆز و ئازادیخواز و ئاشتیخوازەكێ رادیۆیەكا بچویك هەلگرتبوو دا گوهداریا دەنگێ كوردستانێ بكەت و گەلەك خەلك ژی ل سەر دەنگێ كوردستانێ هاتە گرتن و ئەشكەنجەدان و ل سێدارەدان، چونكی دوژمنی دزانی چ كاریگەری هەبوو.
ل بیرهاتنا ٦٢ سالیا دەنگێ كوردستانێ سلاڤ بۆ گیانێ بلند و پیرۆزێ شەهیدێن دەنگێ كوردستانێ. سلاڤ بۆ وان پێشمەرگەیێن قەهرەمان ئەوێن كو زێرەڤانیا بارەگایێ دەنگێ كوردستانێ دكر و دەستێ وان هەمی هەڤالا دگڤێشین كو ل ڤان ٦٢ سالان دا رۆژەكێ ل رۆژان خزمەتا دەنگێ كوردستانێ كریە و دشێم بێژم پڕانیا هەڤالێن كو گەهشتینە پلێن بلندێن حزبی یان حكومی پڕانیا وان دەرچوویێن دەنگێ كوردستانێ نە و دەنگێ كوردستانێ قوتابخانەیەكا مەزن بوو بۆ بلندكرنا هەستا نیشتیمانی و گرێدانا تاكێ كوردستانێ ب ئاخا وی ڤە و بەرەڤانیێ ل ئاخ و میللەتێ خۆ بكەت و دەنگێ كوردستانێ یادگاریەكا هەڕە تایبەت و مەزنا ڕێبەرێ نەتەوا كورد مستەفا بارزانیێ نەمرە. هەر بلند و بلندبیت دەنگێ زەلالێ ئیزگەهـێ دەنگێ كوردستانێ.
