پیرێ ئاقل ژ سه‌ربۆرێ وه‌رنه‌گرت!
ب راستى من ل به‌رنه‌بوو نها تشته‌كى ل سه‌ر گه‌نجه‌كى ب ناڤێ ((شاسوار عه‌بدلواحد)) وه‌ك خودانێ كۆمپانیا (نالیا) یا بازرگانى و ژ نشكانڤه هاتیه د مه‌یدانا سیاسى دا بنڤیسم، هه‌تا پشتى پرۆسا ریفراندۆما چاڤه‌رێكرى بداویبهێت، لێ مه‌زنكرنا حزبێن عیراقێ ب گشتى و هه‌رێمێ ب تایبه‌تى مژارا ڤى گه‌نجى ئه‌ز پالدام كو ئه‌ز ژى ڤان رێزكان وه‌ك بۆچوونه‌ك دى بنڤیسم.
خالا بالكێش د ڤێ مژارێ دا، هه‌ر ئالیه‌كێ سیاسى په‌یدابوونا ڤى گه‌نجى دكه‌ته چێكریێ ئالیه‌كى سیاسى یان بهتر د ئیراقێ و هه‌رێمێ دا و چو ئالى ب رۆهنى نابێژن: ((شاسوار)) ژ سه‌ر مه‌ریخێ نه‌هاتیه، پشتى چوویه ئه‌مریكا و ل گه‌ل هنده‌ك به‌رپرسێن بلندێن ئیداره‌یا وى وه‌لاتێ زلهێز روونشتی و زڤڕى هه‌رێمێ، بڕیارا هه‌لوه‌ستێ ڤه‌لڤینا ((نه‌خێر له ئێستا)) دا بۆ ئه‌نجامدانا ریفراندۆمێ دایه.
واته نها سه‌ره‌ده‌رییا ئه‌مریكا دگه‌ل كوردان، هێشتا سه‌ره‌ده‌رییه‌ك مژدار و پراگماتییه، ئارمانجا وێ یا سه‌ره‌كى، (پێشمه‌رگه‌ى و شه‌ڕڤانان) د ناڤ دو وه‌لاتێن داگیركه‌رێن كوردستانێ دا بكاردهینت و هاریكارییا وانا له‌شكه‌رى و دارایى بكه‌ت دا كو هێزا ((داعشێ)) و گرۆپێن دى یێن (ته‌كفیرى) و خه‌ته‌ر ل سه‌ر ئه‌مریكا و رۆژئاڤا بشكێنت و به‌رژه‌وه‌ندیێن خوه یێن ئابۆرى و سیاسى ل ده‌ڤه‌رێ بپارێزت. ئاكۆ هندى وێ پێچێببت، نها ژ ئه‌ڤێ پێڤه د ئیراقێ و سووریێ دا؛ وه‌ك دو وه‌لاتێن خوه‌دى سه‌روه‌رى و سینۆرێن خوه هه‌ین ناده‌ته كوردان و سیاسه‌تا وان هه‌ر ل ده‌ستپێكێ ده‌ربڕینێ ژ ڤێ دیتنێ دكه‌ت.
((شاسوار عبدالواحد)) وه‌رقه‌یا ئێكێ یا گڤاشتنێیه ئه‌مریكا به‌رانبه‌ر حزبێن هه‌رێما كوردستانێ بكاردهینت، ژ به‌ر كو وێ گومانا هه‌ى ئه‌ڤ حزبێن حوكمرانییا هه‌رێمێ دكن بشێن ئێدى ب ڤى ده‌ستودارى هه‌رێما كوردستانێ برێڤه‌ببن. نوونه‌رێ ئه‌مریكا به‌رى دو سالان ده‌مێ قه‌یرانا ژ كاركه‌ڤتنا په‌ڕله‌مانێ هه‌رێمێ په‌یدابووى، ئه‌ڤه ب رۆهنى گۆتبوو هه‌موو حزبێن هه‌رێما كوردستانێ، پشتى د كۆمبوونه‌كا وان دا ئاماده‌بووی: ((هه‌كه هه‌وه بڤێت مالا خوه جاره‌كا دى ب ده‌ستێن خوه وێران نه‌كه‌ن هوون دێ د ناڤ خوه دا پێكهێن)). پشتى هینگێ ئه‌مریكا و رۆژئاڤا ئه‌ڤه دو ساله ته‌ماشه‌ڤانێن ره‌وشا هه‌رێمێ بووینه كو هه‌تا نها نه‌گه‌هشتینه وێ باوه‌ریێ كو حزبێن كوردى دێ پێكهێن و پێكڤه د خزمه‌تا گه‌لێ خوه و ئه‌مریكا دا به‌رده‌وامیێ ب كاروانێ ئارامیێ و پێشكه‌ڤتنێ دن.
ل دووڤ گۆتنا پێشییان ((ئه‌ڤه هرچه و ئه‌ڤه ده‌وسه)) ئه‌مریكا پالپشتییا گه‌نجه‌كى وه‌كى ((شاسوار عه‌بدالواحد))ى دكه‌ت كو سیاسه‌تا وێ نها دژى ئه‌نجامدانا ریفراندۆمێیه ل هه‌رێما كوردستانێ ئه‌نجامبدن، ئه‌ڤه ژى نه‌تشته‌كى به‌رزه‌یه وه‌ك رۆژا نیڤرۆ ئاشكه‌رایه. ئه‌ڤجا تاوانباركرنا حزبێن ئیراقێ و هه‌رێمێ ب په‌یدابوونا ڤى گه‌نجى لسه‌ر ستێجا شانۆیا سیاسى ل هه‌رێمێ د كیستێ وان دمینت، ژ به‌ر كو راستییا وێ ئه‌ڤه بزاڤا ئه‌مریكانه دا كو به‌رژه‌وه‌ندیێن وێ ل ده‌ڤه‌را مه تێكنه‌چن. واته ((شاسوار)) به‌رهه‌مێ شكه‌ستنا حزبێن هه‌رێما كوردستانێیه د ئیداره‌یا ناڤخوه‌یى دا، ئه‌مریكا بكاردهینت وه‌ك وه‌ره‌قه‌یا ئێكێ یا گڤاشتنێ لسه‌ر هه‌مى حزبێن هه‌رێما كوردستانێ، بێى جوداهى، هه‌كه سه‌رنه‌گرت، دبت وه‌ره‌قه‌یێن دن ژى ل به‌ر ده‌ست هه‌بن كو ئه‌مریكا د ده‌مێ گونجاى دا بكاربهینت، تنێ به‌رژه‌وه‌ندیێن وان تێكنه‌چن و كوردان گه‌له‌ك سه‌ربۆهرێن تال و شرین هه‌ر ژ سالا 1975 هه‌تا نها د گه‌ل ئه‌مریكا ژ ڤى جۆرى هه‌نه، لێ هه‌كه پیرێ بۆ خوه ئاقل ژ سه‌ر بۆهرێ وه‌رنه‌گرتبت، ڤێجا خه‌لكێ بێ ده‌ستهه‌لات چ بكه‌ت؟!
