پیسترین و نەخۆشترین جهێ ئەشكەنجەدانێ ل پارێزگەها كەركووكێ بوو
دیدار، سالار محەمەد دۆسكی:
زیندانیێ سیاسی، شێرزاد زادە عەبدوالرحیم، ل سالا 1966 ل باژێرێ دهۆكێ ژ دایك بوویە، هەتا پولا دووێ ناڤنجی ل خواندنگەها مەمێ ئالان خواندیە و دووڤ دا ل رێكەفتی 23/8/1982 پشتی شاناوا یا رێكخستنێ دهێتە ئاشكراكرن ژلایێ ئەمنا رژێما بەعس ڤە هاتیە دەستەسەركرن.
زیندانیێ سیاسی، شێرزاد زادە عەبدوالرحیم، د دیدارەكێ دا ل گەل رۆژناما ئەڤرۆ گۆت: رێكخراوا مە یا سلێمان مێركی بوو سەر ب لژنا ناوچا شێخان ڤە و رێكخراوا مە ژ (35) كەسان پێك دهات و پشتی رێكخراوا مە هاتیە ئاشكراكرن (13) هاتنە دەستەسەركرن و و ئەڤێن دی چوونە ناف شورەشێ، دەمێ هاتینە دەستە سەركرن وی دەمی دو شوفێرێن هەوارهاتنێ وەك رێكخستی ل گەل مە بوون و دەمێ برینە دادگەها سەورە ب توندیرین سزا هەر دو سزدان كو دادگەهێ بریارا سێدارەدانێ بۆ دەركرن و هاتەزانین كو پارچێن لەشێ وان هاتنە ژێڤەكرن و گۆتن ئەڤە ل گەل حوكمەتێ نە و هەم دژی حوكمەتێ ژی كار دكەن
هێشتا گۆت: پشتی هاتینە دەستەسەركرن ماوێ (19) رۆژان ل ئەمنا دهۆكێ ماین و بۆ دیرۆك دێ بێژم ل رێكەفتی 28/8/ خودێ ژێ رازی (دێوالی سەعید ئاغا) بۆ ئازادكرنا مە هاتە ئەمنا دهۆكێ و گوپالێ خوە كرە سینگێ رێڤەبەرێ ئەمنێ را و گۆتێ هوون بۆچی قوتابیان دگرن و ئەڤە دبێ گونەهن و هەلبەت هاتنا وی بۆ ئەمنێ نە ژ روویێ عەشائیر ڤە بوو بەلكو ب ئێك چاڤ و دویر ژ عەشیرەتگەریێ سحكرە هەمی دلسوز و خەلكێ دهۆكێ و بێ جوداهی و بریار بوو بهێنە ئازادكرن پشتی هاتنا ئاغای بۆ ئەمنێ و ئەو بوو رێكەفتی 31/8 ئانكو پشتی بورینا چەند رۆژان خودێ ژێ رازی (دێوالی ئاغا) هاتە تیرۆركرن.
هەمان زیندانیێ سیاسی گۆت: پشتی ماوەێ (19) رۆژان ل ئەمنا دهۆكێ ماین و رۆژانە ئەشكەنجەدان و ئیهانەكرن و قوتانەكا توند ئەم هەر (13) هاتینە رەوانەكرن بۆ هەیئا كەركووكێ و هندەك ژووران دو كەس تێدا بوون و هندەك ژووران ژی 16 كەس تێدا بوون، هەیئا كەركووكێ پیسترین جه بوو ل سەرانسەری عیراقێ ژ هەر روویەكی ڤە و هەر جهەكێ تە پێدڤی پێ هەبا هاتن و چوون ب قوتان بوو بۆ نموونە چوونا دەست ئاڤێ یان سەرشووشتنێ یان دەست شووشتنێ هەر هەمی ب قوتان و لێدان بوو و نەه هەیڤان ئەم ماینە دڤی حالی دا و دووڤ دا ئەم هاتینە رەوانەكرن بۆ ماعسكەرەكی ل نێزیك یاریگەها شەعب یا ڤولی بولێ ل بەغدا و بەرپرسێ پولیسێن وی ماعسكەری گەلەك رێز ل مە گرت و گۆت هوون سەرا قەزیەكێ هاتینە دەست سەركرن و جهەكێ خوەش دامە و ئەگەر نوكە وی ئەفسەری ببینم دێ رێزێ لێ گرم و ل كەركووكێ مە ماف نەبوو سەرێ خوە بلند بكەین، بەلێ دەمێ هاتینە رەوانەكرن بۆ بەغدا مە شیا سەرێ خوە بلند بكەین و ئەو ماوەك بوو مە سەرێ خوە بلند نەكربوو و كەیفا مە گەلەك هات و دەمێ بۆ دادگەها سەوەر ل بەغدا هاتیە رەوانەكرن (عەواد بەندەر) سەرۆكێ دادگەهێ بوو و بریارا سێدارەدانێ ب پیسترین شێوە بۆ هەر دو هەڤالێن مە (هاشم ئێتیتی و صالح ئورەی) هاتە دەركرن و ئەم چار كەس بۆ (15) سالان هاتینە زیندانكرن ب بهانا وێ چەندێ كو ژیێ مەیێ بچووكە و ئەڤێن دی ب بریارا هەتا هەتایێ هاتینە زیندانكرن.
هێشا گۆت: نەخوشترین دیمەنێ من دیتی دەمێ ل زیندانا ئەبو غورێب ترۆمبێلا بابێ من وا وەرگەریا بوو و وەغەركربوو و ئەو (40) رۆژ بۆ هەمی هەڤالێن من ل سەر بابەتی ئاگەهدار بوون و من نەزانی و دیسا گەلەك جاران دایك من ژی دهاتە زیندانێ و بابەت بۆ من نەدگوت و دەمێ نێزیكی هەڤالێن خوە بام دا بابەتی گوهورن.
هەمان زیندانیێ سیاسی گۆت: شەش سالێن زیندانێ ل ئەبو غورێب چ جاران ناهێنە ژبیركرن چونكە هەر رۆژەك سالەك بوو و هەر سالەك ژی ژیەك بوو و هەمی پێخەمەت دوزا رەوایا مللەتێ مە و گرنگە هەمی دەرگەهێن بارەگایێن حزبی و فەرمانگەهێن حوكمی هەمبەر زیندانیێن سیاسی دڤەكری بن .
زیندانیێ سیاسی شێرزاد زادە گۆت: دەمێ ل دادگەهێ وەرگێر بوومە ئینانە دادگەهێ و دیسا پارێزەر و هەر تشتەكێ مە دگۆت ئەوان بەرۆڤاژی وەردگێرا و دگۆتە دادوەری ئەڤە پێشمەرگە بوون و مە گۆتێ نەخێر ئەم قوتابی نە، پشتی سالێن 83 و 84 بزاڤ و چالاكی دناڤا باژێری دا بهێز لێ هاتن و پێشمەرگە ژی زێدەتر بەر بەلاف بوو وی دەمی ئەم ل زیندانێ دا بووین.
گۆتژی: بەلاڤوكا دناڤا باژێری دا روحا دوژمنی قەتاند و گەلەك كارتێكرن ل سەر خەلكی هەبوو و هەمی كارێ مە درەنگی شەڤ بوو وهەمی سپێدەهی یا دوژمنی ئێكسەر ژێ ڤە دكر، وی دەمی مسری ل دهۆكێ بوون و گەلەك كارێن بێ رەوشت دكرن و ژنكێن وان دەهمەن پیس بوون و فەرمان بوومە هات هوژداریەكێ بدەینێ كو ئەف كارێ دكەن دوویرن ژ رەوشت و ئەخلاقێ مللەتێ مە و خەلكێ باژێرێ مە وی دەمی خودێ ژێ رازی (صالح) هەڤالێ مە ئەوێ هاتینە سێدارەدان ب دەمانجێ گولەك ل تانكێ دا و مسریەك وێرێ بوو و (عەواد بەندەر) گۆت تە گۆلە بۆ كوشتنێ یا دانایێ لەوما بریارا سێدارێ بۆ هەڤالێ مە دەركر.
زیندانیێ سیاسی شێرزاد زاد هێشتا گۆت: مخابنی ڤە نوكە زیندانیێن سیاسی رێزگرتن نینە و هندەك كەسان راهێلا مە نوكە ئەوا قیمەت ژ مە زێدەتر هەیە و گرنگە چاخشاندەك ل بابەتی بهێتەكرن و ئەو كەسێن ماندیبوون و زەحمەت دیتین رێزگرتن ل خەبات و ماندیبوونا وان بهێتەگرتن.
