پیشه‌كاره‌كێ كه‌نه‌دی دێ بیته یاریزانێ زاخۆ
عەلی حاجی:
د داخویانیەکێ دا ئەندامەکێ دەستەیا کارگێریا یانه‌یا زاخۆ یا وەرزشی بۆ رۆژنامه‌یا ئەڤرۆ دیار کر ئەو دگەل یاریزانەکێ کەنەدی گەهشتینە رێکەڤتنێ و تیما وان یا باسکت بۆلێ دێ دەربازی قوناغا چار گوشا زێرین بیت.
زێدەتر دلژار عەدنان گۆت: ژ بۆ بهێزکرنا رێزێن تیما مە ئەوا پشکدار د خولا نایابا ئیراقێ دا ئەم دگەل یاریزانەکێ ب ڕەگەز کەنەدی گەهشتینە رێکەڤتنێ و دێ پەیوەندیێ ب تیما مە کەت كو بریارە دەمەکی نێزیک دا بگەهیتە زاخۆ، تیما مە یا بەرەڤ قوناغەکا باشتر ڤە دچیت و یاریزان جەگەر عەلی ژ هنگاڤتنێ ڤەگەریایە ب هاتنا وی دێ تیم باشتر بیت و هەمی یاریزان نوکە دا ب رژدی کار دکەن بۆ ڤەگەریانا ئاستێ خوە، سەرکەڤتنا ڤێ دووماهێی بەرامبەر کارەبا تیم بەر ب قۆناغەکا باشتر برییه، مە باوەرییەکا باش ژ تیما خوە هەیە، یاریا مە دگه‌ل دیفاع ئه‌لجەوییە هاتە پاشئێخستن و تیم دێ پتر خوە بەرهەڤکەت بۆ یاریێن دیتر د خولێ دا.
ل دووماهیێ گۆت: مە کێشەیا مووچەیی نینە بتنێ پیچەکێ گیرۆبوویە كو ددەمەکێ نێزیک دا دێ یاریزانان وه‌رگرن، گیرۆبوونا مووچەیی ل سەرانسەری کوردستانێ هەیە.
