پیشەكارێن بیانی هندەک یانەیێن خولا ئیراقێ ئێخستنە د مەترسیێ دا
پشتی ب دووماهی هاتنا هەڤڕكیێن گەڕا 34ێ ژ خولا پلا نایابا ئیراقێ یا تەپا پێی، یاریزانێن پیشەكار یێن هندەک یانەیێن د خولێ دا بڕیار دا گرێبەستێن خوە نوو نەكەن ئەوێن ل دووڤ گرێبەستا خوە مافێ هەیی ل ئێكێ ڤێ مەهێ ب دووماهی بینن، ئەڤچەندە بوو ئەگەر ئەو یانە ئێخستینە د مەترسیێ دا بۆ هەر چار یاریێن مایی ژ خولێ و چارەنڤیسێ وان دیار نەمایە تایبەت ئەو یانەیێن بزاڤێ بۆ هەڤڕكیا ناسناڤی دكەن و دیسان ئەو یانەیێن شەڕی بۆ مانا خوە د خولێ دا دكەن.
ل دووڤ راپۆرتەكا رۆژنامەڤانی كو ئەگەڕێ سەرەكی ڤەدگەڕێتە وێ چەندێ ئەو یانەیێن گرێبەست دگەل یاریزانێن پیشەكار ئیمزا كری پێشبینیا پاشئێخستنا خولێ بۆ نێزیكی مەهێ نە كربوون ئانكو ئەوان هزر دكر هەتا دووماهیا مەها بۆری یا خزیرانێ دێ خول ب دووماهی هێت لەوما گرێبەست هەتا وی دەمی دگەل پیشەكاران ئیمزاكربوون و ل ئێكەتیا ئاسیا و فیفا هاتیە پەسەندكرن، بڕیارا ئێكەتیا تەپا پێی یا ئیراقێ ب راوەستاندنا خولێ ژبەر ئەنجامدنا قارەمانیا كۆپا رۆژئاڤا ئاسیا بوو ئەگەر ئەو هەمی پلان و بەرنامەیێن چەند یانەیان تێك بدەن و تووشی ئاریشەیان بكەن.
مەزنترین زیان ب یانەیا نەورۆز كەڤتیە
تیما یانەیا نەورۆز ئەوا ب45 خالان رێزا 12ێ دهێت مەزنترین زیان ب چوونا پیشەكارێن بیانی كەڤتیە ئەو ژی پشتی شەش یاریزانێن وێ بڕیاردایی گرێبەستێن خوە نوو نەكە ئەو ژی یێ ئۆردنی نزار رەشدان، یێ نێجیری ئۆكیكی ئۆفلابی، یێ غانی لامین مۆری، یێ كۆنگۆلی كرێست میرفل و هەردو پیشەكارێن بەرازیلی ئۆلیڤێرا مارادۆنا و رۆان تێلێس.
مەترسی ل سەر یێن دهۆك و زاخۆ نینە
ل دووڤ ژێدەرێن نێزیك ژ هەردو یانەیێن دهۆك و زاخۆ پیشەكارێن وان بڕیارا دایە هەتا ب دووماهی هاتنا هەڤڕكیێن خولێ دگەل یانەیێن خوە بەردەوامبن، هەرسێ پیشەكارێن دهۆكێ یێ بەرازیلی مۆسێس لۆكاس، یێ كۆتیڤۆاری گراهێر یانیك زاكێری و یێ تۆنسی محەمەد نیزال و هەر شەش یاریزانێن زاخۆ یێ نیجیری بۆبكار گابریێل غۆمی، یێ كۆتیڤۆاری بازی ئارماند، یێن ئۆردنی حیجازی ماهر و خالد سیاحیین، یێ مەغربی عومەر مەنسۆر، یێ لیبیا محەمەد ئەلغنیمی، ئەڤ یاریزانە بۆ هەردو یانەیان د گرنگن و دوور نینە یانەیێن دهۆك و زاخۆ گرێبەستێن وان بۆ وەرزەكێ دی نووكەن ژبەر ئاست و شیانێن پرانیا ئەوان یاریزانان.
یانەیێن شورتە و جەوییە ژی پیشەكارێن خوە ژ دەستدان
ل یانەیا شورتە پیشەكارێ ئۆردنی ئێحسان ئەلحەداد گرێبەستا خوە ب دووماهی ئینا، ل یانەیا جەویە یێ غانی وێلسۆن ئاكاكبۆ ئەوی ژی دووماهی ب كاروانێ خوە ئینا، د نوكە دا چەند یانەیێن دی ژی هەنە هەتا نوكە بزاڤێ دكەن پیشەكارێن وان بۆ هەر چار یاریێن مایی ژی گرێبەستا خوە ب شێوەیێ مووچە نووكەن، سەرباری ئەڤ گرێبەستە د لیستەیا ئێكەتیا تەپا پێی یا جیهانی فیفا نا هێتە تۆماركرن.
