پیشەكارەكا سۆری بەرهەڤیێن نوونەرا پارێزگەهێ و كوردستانێ بۆ قارەمانییا عەرەبی ب دووماهی ئینان
ب شێوەكێ فەرمی یانەیا سەنحاریب گرێبەست دگەل ستێرا هەلبژارتییا سوریا و یاریزانا كورد ل رۆژئاڤا یا كوردستانێ ئیمزاكر دووماهی پێنگاڤا خوە بەرهەڤكرنێ بۆ قارەمانییا عەرەبی یا یارییا باسكێت بۆلێ ل سەر ئاستێ كچان ئەوا چاڤەڕێ دهێتە كرن هەڤڕكیێن وێ ل چارشەمبییا بهێت وەلاتێ مەغرب مێڤاندارییا وێ بكەت.
ل دۆر ڤێ یەكێ داود رەبەن سەرۆكێ یانەیا سەنحاریب دیار كر ب فەرمی ئەم گەهشتینە رێكەفتنێ و ئیمزایا گرێبەستێ دگەل پرڤین فارۆق چەچۆ یاریزانا هەلبژارتییا سۆریا و یانەیا وەحدە و كچا كورد یا باژێرێ حەسەكێ ل كوردستانا رۆژئاڤا كو دبیتە دووماهی گرێبەستا مە دكەل یاریزانێن پیشەكار ژبۆ خوە بەرهەڤكرن بۆ قارەمانییا عەرەبی یا باسكێت بۆلێ ل سەر ئاستێ كچان ئەوا بڕیارە هەڤڕكیێن وێ ل شەشێ ڤێ مەهێ باژێرێ پایتەختێ مەغربی ریبات مێڤاندارییا وێ بكەت، تیما مە تاكە نوونەرا پارێزگەهێ و كوردستانێ دگەل یانەیا غازا باكۆر ژ ئیراقێ دێ پشكداری قارەمانیێ بین.
ژلایەكێ دووڤە ناڤهاتی گۆت: ل حەفتییا بۆری پشتی گرێبەست دگەل یاریزانا هەلبژارتییا ئیرانێ شاهدی عەبدولوەند هاتییە ئیمزاكرن و ئینانا پیشەكارا سۆری تا رادەیەكێ رێزێن تیما مە دێ باشتربن و بەرهەڤی ژی گەهشتینە قۆناغا دووماهیێ و بڕیارە سوبەهی شاندێ تیما مە بەر ب وەلاتێ مەغرب بچیت كو ژبلی هەردو پیشەكاران هەمی یاریزانێن مە یێن كچ ژ پارێزگەها دهۆكێ نە و گەشبینین دێ ب شێوەكێ باش هەڤڕكیێی كەن و پشكدارییەكا سەرفەراز بیت و سۆپاس بۆ حوكمەتا هەرێما كوردستانێ و دیسان د. عەلی تەتەر پارێزگارێ دهۆكێ كو بەردەوام پشتەڤان و هاریكارێن وەرزشێ بووینە.
