پینتاگۆن: ھەتا نھا ژی رێککەفتنا منبجێ نەھاتیە بجھئینان
ئەڤرۆ نيوز:
پەیڤدارێ وەزارەتا بەرگیریێ یا ئەمریکا رۆب مانینگ د داخۆیانیەکێ دا بۆ دەزگەھێن راگەھاندنێ یێن ئەمریکا دیار کر کو بەری نھا رێککەفتنەک ل دۆر منبجێ د ناڤبەرا مە و تورکیا دا ھەبوو، لێ ھەتا نھا ب کریاری چو نەھاتیە کرن، چونکو ئاریشێن ئەمریکا و تورکیا د گەلەک بیاڤان دا ھەنە و ئالۆزیێن ڤێ دووماھیێ ژی وەسا کریە کو رێککەفتنا بەری نھا وەکو پێدڤی نەھێتە بجھئینان و گۆت: (پێدڤی بوو ھێزەکا مە و تورکیا پێکڤە ل دەرڤەی منبجێ ب ئەرکێ پاراستنێ رابن و ھەڤکاریا ھەڤدو ژی بکەن، لێ ھەتا نھا ئەو یەک نەھاتیە کرن و نزانم کا بەری نھا د رێککەفتنا منبجێ دا چ ھەبوویە، لێ ئەو رێککەفتن ل سەر کاغەزێ مایە و نەھاتیە بجھئینان).
ناڤبری ئەو یەک ژی دیار کر کو ئەمریکا و تورکیا دو وەلاتێن ئەندامێن ناتۆیێ نە و ھەتا نھا د گەلەک بیاڤان دا ھەڤکاریا ھەڤدو کرینە، لێ د بابەتێ منبجێ دا ھەتا نھا چو نەھاتیە کرن، ئەز باوەرم ئاریشێن ڤێ دووماھیێ د ناڤبەر تورکیا و ئەمریکا دا کارتێکرنا خوە ل ڤێ رێککەفتنێ یا کری و گۆت: (ئەمریکا رێ نادەت تورکیا ل باکورێ سووریێ ب کەیفا خوە لڤینان بکەت و ھەر بزاڤەکا تورکیا ل دەڤەرێن کو نھا ل ژێر کۆنترۆلا ھێزێن کوردی دانە دڤێت ب رزامەندیا ئەمریکا بیت).