پێداچوون د کلينیکێن ئێڤاریان دا دێ ھێتە کرن
ئه‌ڤرۆ نيوز:
پەیڤدارێ سەندیکا کارمەندێن ساخلەمیێ ئاشکرا کر کو ل دەمەکێ نێزیک دێ پێداچوون بۆ جھێن ساخلەمی یێن ژ لایێ کارمەندێن ساخلەمی ڤە دھێنە ب رێڤەبرن ھێتەکرن و گۆت: “ھەر کارمەندەکێ ساخلەمیێ کلینیکا ئێڤاران ھەبیت و زێدەگاڤیێ بکەت دێ ل گورەی قانوونێ ھێتە سزادان”.
ھادی فەریق، پەیڤدارێ سەندیکا کارمەندێن ساخلەمیێ بۆ رۆژناما ئەڤرۆ دیار کر کو نوکە سەندیکا دگەل وەزارەتا ساخلەمیێ یێ کار بۆ رێکخستنا جھێن نۆشداری یێن کارمەندێن ساخلەمیێ دکەن، کو پتر ب کلینیکێن د ناڤ کۆلانان دا ھاتینە نیاسین، بەری نوکە بڕیارا سەرۆکاتیا جڤاتا وەزیران بۆ دەرچوویە کارمەندێن ساخلەمی ب تنێ دەستھەلات ھەیە ھەژدە ئایتما ب فرۆشن یان سەرەدەریێ دگەل نەخۆشان بکەن گۆت: ” دو کۆمبوون بۆ ڤێ مەرەمێ ھاتینە ئەنجامدان و بڕیارە ل داھاتی ھەموو زێدەگاڤیێن ژ لایێ کارمەندێن ساخلەمیێ ڤە ھاتینەکرن بھێنە لادان و ل گۆرەی بڕیار و رێنمایێن حوکمەتێ کارێ خوە بکەن”.
ناڤھاتی ئاماژە دا وێ چەندێ کو پشکا دووڤچوونێ ھەیە چاڤدێریا جھێن نۆشداری یێن ئێڤاریان دکەن، ئەڤێن ژ لایێ کارمەندێن ساخلەمیێ ڤە دھێنە ب رێڤەبرن و ھەر پێشێلکاریەک ژی بھێتە تۆمارکرن دێ پێڕابوونێن قانوونی ھەمبەر ھێنە وەرگرتن، چونکی ل گورەی ئامارێن وەزارەتا ساخلەمیێ و سەندیکا کارمەندێن ساخلەمی دو ھزار جھێن ساخلەمیێ ھەنە، راستە زۆر جارا دھێتە گۆتن وەلاتی بدەستێ کارمەندێن ساخلەمی ھاتیە سەقەتکرن و شاشی چێبوویە، بەلێ ئەڤە دڤێت بۆ ھەر حالەتەکی دادگەە بڕیارێ بدەن و لیژنێن ڤەکۆلینێ ھەنە بڤی کاری رادبن.