پێدڤیا ئه‌ڤرۆ بۆ بارودۆخێ كوردستانێ
هه‌لبه‌ت پشتی رۆخیانا رژێما به‌عسا ژ ناڤچووی ل سالا(2003) كو عیراق یا بوویه ژێده‌رێ كێشه و ناكۆكیێن به‌رده‌وام د ناڤبه‌را پێكهاته‌یێن وێ دا و ئه‌ڤه ژی په‌یدابوو ژ ئه‌نجامێ وێ هزركرن و عه‌قلیه‌تا وان سه‌ركرده و بریار ب ده‌ستان یێن كو شیانا برێڤه‌برنا وه‌لاتی و پێشبینیكرنا كێشه و ئالۆزیان نه‌بوون وه نین، هه‌روه‌سا ژ به‌ر په‌یره‌وكرنا وی سیسته‌مێ سه‌قه‌ت و له‌نگ ئه‌وێ دئێته برێڤه‌برن ب عه‌قلیه‌تا مه‌زهه‌بگه‌رایی و خوه سه‌پێن ل به‌غدا، له‌ورا هه‌رده‌مێ كێشه په‌یدا دبن ژی وه‌كو چاره‌سه‌ریه‌كا بابه‌تی سه‌ره‌ده‌ریێ د گه‌ل دا ناكه‌ن، ل ده‌مێ په‌قینێ ژی دا كێشه ژ ده‌ستێن وان ده‌ردكه‌ڤن كونترۆلێ ل سه‌ر ناكه‌ن، گرۆڤه ژی ل سه‌ر ڤێ چه‌ندێ هه‌شت سال ژ ده‌ستهه‌لاداریا (نوری ئه‌لمالكی) یا شاش بوو ئه‌وا بوویه ئه‌گه‌رێ ژ دایكبوونا مه‌زنترین ده‌وله‌تا تیرۆرستیا جیهانی ب ناڤێ (داعش). دیاره قه‌ده‌را كوردانه كو ژ ئه‌نجامێ رێككه‌فتنه‌كێ و ب دارێ كوته‌كێ و ژ به‌ر به‌رژه‌وه‌ندیا ده‌وله‌تێن به‌رژه‌وه‌ندیخواز و زلهێزێن وی سه‌رده‌می پارچه‌یه‌ك ژ وه‌لاتێ كوردان بێی حه‌ز و ڤیانا وان كرنه پشكه‌ك ژ جیۆپۆلیتیكا عیراقا ئه‌ڤرۆ، لێ د ڤێ قووناغێ دا كورد نه كوردێ جارانه كو ب ساناهی دوژمن دێ خاپینیت و سه‌ركرداتیا كوردان ژی نه‌یا جارانه دا ده‌ستنڤێژا وی نه‌كه‌ڤیت دێ له‌وه‌ندی دده‌ستێن خوه ئالینیت و ناڤمالیا كوردی ژی بنواش پیلایه و نه به‌فره‌ه دێ گه‌رم وی حه‌لینیت و ئه‌ڤرۆ ژی كوردستانێ بارودۆخه‌كێ تایبه‌ت هه‌یه ل گه‌ل ده‌وله‌تا عیراقێ نامینیت، ب بۆچوونا من كوردستان ئه‌ڤرۆ پێدڤی ب سه‌رۆكه‌كێ ب هێز و پێشبین و وێره‌ك هه‌یه وه‌كو (سه‌رۆك بارزانی) دا بشێت ملله‌تێ كورد ژ ڤێ قووناغا پری مه‌ترسی و كاره‌ساتبار ده‌رباز بكه‌ت و به‌ر ب كه‌نارێن ئارامیێ و قووناغا داویێ ببه‌ت و داكو ده‌وله‌تا كوردستانێ براگه‌هینیت، لێ یا پێدڤی یه كو هێز و پێشبینیێن ڤی كه‌ساتیا كاریزمی د دیرۆكێ دا بهێته توماركرن، كو ئه‌ڤرۆ بوویه ئه‌گه‌رێ لێكخرڤه‌كرنا هه‌موو هێزو لایه‌نێن سیاسیێن كوردستانی ل ژێر ئێك ستراتیجی، ژ لایه‌كی ڤه بوویه ئه‌ندازیارێ ئاڤاكرن و ب هێزكرنا ناڤمالیا كوردی و ژ لایه‌كێ دیڤه بوویه ئه‌گه‌رێ نه‌هێلانا جوداهیا گۆتارا سیاسیا پارتێن كوردستانی ل سه‌ر بابه‌تێ سه‌ربه‌خۆیا كوردستانێ و یا ژهه‌میێ گرنگتر بوویه رێگر ل دابه‌شبوونا سۆزداریا نافخوه‌ی یا كوردستانێ بۆ هه‌ردو به‌ره‌یێن (سوننه و شیعه)، واته هزرا نه‌ته‌وه‌ی زالكریه ل سه‌ر هزرا ئاینی و مه‌زهه‌بی و لایه‌كێ دی ژیڤه دبلۆماسیه‌ت و كه‌ساتیا (سه‌رۆك بارزانی) یا بوویه ناڤداریا جیهانی و د ڤێ قووناغا سه‌خت و دژواردا هه‌موو جیهانا ئازاد یا ئینایه سه‌ر خه‌تێ بۆ هاریكاریكرن و پشته‌ڤانیا ملله‌تێ كوردستانێ و جاره‌كا دی كوردستان ب جیهانا ئازاد دایه نیاسین ب تایبه‌تی پشتی سه‌ره‌دانا (ئه‌مریكا) كری ل رێكه‌فتی (3_5_2015) و جه‌نابێ وی ب ئاشكه‌رایی به‌حسێ بابه‌تێ سه‌ربه‌خوه‌یا كوردستانێ كر ل گه‌ل بریار بده‌ستێن وی وه‌لاتی و ئیدارا (سه‌رۆك ئوباما) ژی پاراستنا هه‌رێما كوردستانێ گرتیه ستوویێ خوه و (سه‌رۆك بارزانی) شیا د ئیك ده‌م دا (ئیدارا ئه‌مریكا و كۆنگرێسی) ل سه‌ر پرس و بابه‌تێن ڤێ قووناغێ كۆمڤه بكه‌ت كو ئه‌و ژی ستراتیژیا شه‌ڕێ دژه تیرۆرێ یه، لێ د به‌رانبه‌ر دا نوكه ژی د گه‌ل دابیت كۆنگرێس ژ ئیدارا وه‌لاتێ خوه نه یا رازیه ل سه‌ر پرسا رێككه‌فتنا ئه‌تۆمیا ئیرانێ ئه‌وا هاتیه ئیمزاكرن د ناڤبه‌را وان هه‌ردو وه‌لاتان دا، لێ ل سه‌ر پشته‌ڤانیا هه‌رێما كوردستانێ و پڕچه‌ككرنا هێزا پێشمه‌رگێ كورستانێ ئێك هه‌لۆیست هه‌یه، هه‌روه‌سا ژ به‌ر بارودۆخێ خویناوی ئه‌وێ ئه‌ڤرۆ رۆژهه‌لاتا ناڤه‌راست ڤه‌گرتی و راگه‌هاندنا ده‌وله‌تا تیرۆرستیا ب ناڤێ (داعش)، ژ لایه‌كێ دیڤه ژبه‌ر سیاسه‌تا حه‌كیمانه و لۆژیك و پێشبینیا (سه‌رۆكێ هه‌رێمێ) یێ كو كوردستان كریه ده‌وله‌ته‌كا(دیفاكتۆ) و هه‌موو بنه‌ما و ستوونێن ده‌وله‌تا هه‌ڤچه‌رخ بۆ هاتینه دانان وه‌كو (هێزا له‌شكری و هێزا ئابووری، هێزا په‌یوه‌ندیێن دیپلۆماسی و پاراستنا سنۆرێن جیۆپۆلۆتیكا ده‌وله‌تێ و ئاڤه‌دانكرن و.. .. هتد) و ئه‌مریكا ژی وه‌كو دوه‌له‌ته‌كا زلهێز و سه‌ركێشیا سیاسه‌تا جیهانێ دكه‌ت و خودان به‌رژه‌وه‌ندیه و نه‌چاره پشته‌ڤانیا ڤێ ده‌وله‌تا (دیفاكتۆ) بكه‌ت و پێ رازی ببیت. بوویه ئارمانجا سه‌ره‌كیا (سه‌رۆكێ هه‌رێما كوردستانێ) ژ ڤێ هه‌ڤكێشێ سه‌رفه‌رازی و سه‌رخستنا پرۆسێسا پرۆژێ ئاڤاكرنا ده‌وله‌تا كوردستانێ یه، له‌ورا ئه‌ڤێ پرۆسێسێ پێگه‌ها (سه‌رۆك بارزانی) ژ سه‌رۆكاتیا هه‌رێمێ یا بلند كری گوهۆری بۆ پێگه‌ها (بابێ دامه‌زرێنه‌ر یێ ده‌وله‌تا كوردستانێ) و هه‌موو(بابێن دامه‌زرێنه‌ر) ژی ئه‌و سه‌ركرده‌نه ئه‌وێن به‌ره‌ڤانیێ ژ ئازادیێ و پیرۆزیا ئاخا وه‌لاتێ خوه دكه‌ن، له‌ورا د دیرۆكا هه‌موو ملله‌تان دا ژمارا وان سه‌ركرده‌یان دكێمن ئه‌وێن ملله‌تێ وان د بارودۆخێن ئالۆز و دژوار دا كو ئه‌و سه‌ركرده كار بكه‌ن وی بارودۆخی د به‌ژه‌وه‌ندیا ملله‌تێ خوه دا رابسكێشن، بۆ نموونه د دیرۆكا ئه‌مریكا دا (جۆرج واشنتن) كۆمارا ئه‌مریكا دامه‌زراندیه، هه‌روه‌سا (ئیبراهام لنكۆلن) سیسته‌مێ كوێلایه‌تیێ بنبركر، دیسا د دیرۆكا ده‌وله‌تا (هندێ) دا (غاندی) خه‌لكێ وی وه‌لاتی ئه‌ڤرۆ ژی دگه‌ل دا بیت شانازیێ پێ دكه‌ن، له‌ورا هه‌ر ده‌مێ به‌حسا دیرۆكا هه‌ڤچه‌رخ و ناسناما سیاسی یا ملله‌تێ كورد و كوردستانێ دئێته كرن، ئه‌ڤ دیرۆكه ل گه‌ل ده‌ركه‌فتنا بابێ رۆحی یێ نه‌ته‌وا كورد نه‌مر (مسته‌فا بارزانی) ده‌ست پێ دكه‌ت، مه‌ره‌ما من ل قووناغا شۆره‌شێن به‌ری ده‌ركه‌فتنا وی ناسناما سیاسی ملله‌تێ كورد د چاڤێن جیهانا ئازاد دا نه‌بوون، له‌وما ئه‌ڤرۆ ژی دگه‌لدا سه‌روه‌ری و مه‌زناهیا هه‌رێما كوردستانێ به‌رهه‌مێ رێككه‌فتنا سالا (1970 )ێ یه، چونكو (بارزانیێ مه‌زن) دانپێدانكرنا حوكمه‌تا عیراقێ ب كوردان وه‌كو نه‌ته‌وێ دووێ كره دیكیۆمێنته‌كا یاسایی د دستووری دا، له‌ورا ملله‌تێ كوردستانێ ژی شانازیێ ب وێ دیرۆكا پری شۆره‌ش و خه‌بات و به‌رخودان دكه‌ت، ئه‌ڤرۆ ژی (سه‌رۆك بارزانی) یێ به‌رده‌وامه و درێژیێ پێ دده‌ت.
