پێدڤیه هزرا ده‌ست به‌ردانێ ژ فلمه فیسته‌ڤالا دهۆك نه‌مینیت
ئه‌ڤرۆ، رێوار محه‌مه‌د ره‌شید:
محه‌مه‌د محسن، چیرۆك نڤیس و به‌رهه‌مهێنه‌رێ فلمان ل پارێزگه‌ها دهۆكێ بۆ به‌رپه‌رێ هونه‌ری یێ رۆژناما ئه‌ڤرۆ دیار كر كو گرنگیا به‌رده‌وامیا فلمه فیسته‌ڤالا دهۆك یا نێڤده‌وله‌تی ژ رژدی و دلسۆزیا سینه‌ماكارێن دهۆكێ یه، ئه‌ڤ رژدی و دلسۆزیه ئاماژه یه بۆ وێ چه‌ندێ كو د به‌رهه‌ڤن ژ هه‌موو لایه‌كی ڤه به‌رده‌وامیێ بده‌نه فیسته‌ڤالێ و گۆت: “فلمه فیسته‌ڤالا ناڤهاتی سال بۆ سالێ پتر گه‌شه یا هه‌ی ژ چێكرنا فلمێن درێژ و كورت و دیكیومێنتاری، هه‌روه‌سا رێژا بینه‌ران ژی زێده‌بوویه بتایبه‌تی بۆ فلمێن كوردی، ئه‌ڤه د ده‌مه‌كی دایه كو موندیالا جیهانی ژی كه‌فتیه د ڤی ده‌می دا، سه‌ره‌رایی ڤێ چه‌ندێ هه‌ڤنیاسین د ناڤبه‌را سینه‌ماكارێن كورد دا ل هه‌ر چار پارچێن كوردستانێ و ل گه‌ل سینه‌ماكارێن جیهانی په‌یدادبیت، هه‌روه‌سا هه‌مان فلمه فیسته‌ڤال لوبیا سینه‌ما كوردی ل ده‌رڤه‌ی وه‌لاتی موكومتر لێ دكه‌ت”.
ناڤهاتی ئاماژه دا وێ چه‌ندێ كو پێدڤیه حوكمه‌تا هه‌رێما كوردستانێ وه‌كو هه‌می وه‌لاتێن جیهانی بۆدجه‌كا تایبه‌ت بۆ چێكرنا فلمان هه‌بیت و سالانه سێ هه‌تا پێنج فلمێن سینه‌مایی بهێنه چێكرن، ئه‌و فلم ژی یێن ده‌رده‌سه‌ری و چیرۆكێن كه‌ڤنێن ملله‌تێ كورد بن و ئه‌و زولم و زورداریا دیتی، هه‌روه‌سا بابه‌تێن جڤاكی ژی دگه‌ل دابن و پتر د فلته‌رێن باش دا ده‌ربازببن بۆ وێ چه‌ندێ كارتێكرنه‌كا ئه‌رێنی ل سه‌ر كومه‌لگه‌ها مه و ره‌وشه‌نبیركرنا گه‌نجێن مه ب هزرێن نه‌ته‌وه‌یی ڤه هه‌بیت، هه‌روه‌سا پێدڤیه حوكمه‌تا هه‌رێمێ هۆلێن سینه‌مایێ ئاڤا بكه‌ت، یان ژی كه‌رتێ تایبه‌ت پالبده‌ت كو هۆلان ئاڤا بكه‌ت، به‌لێ په‌رله‌مانێ كوردستانێ یاسایه‌كێ دابرێژیت كو پشتی دو سالان دڤێت 75% دراما و فلمێن كوردی بن ئانكو یێن ناڤخۆیی، خالا گرنگ د ڤێ چه‌ندێ دا ئه‌وه دێ ده‌لیڤێن كاری بۆ ده‌رچوویێن كۆلیژ و په‌یمانگه‌هێن هونه‌رێن جوان ڤه‌بن كو كارێ خوه ل وان كۆمپانیێن هونه‌ری ئه‌نجامبده‌ن و ب هزاران ده‌رچوو وه‌كو چیرۆكنڤیس و ده‌رهێنه‌ر و وێنه‌گر و لوكێشن و روناهی و ده‌نگ و دیكور و دیزاین و برێڤه‌به‌رنا لوجستیكێ و مكیاژ و هه‌می پشكێن دی دێ د مفاداربن، ئه‌ڤه ژی دێ بیته مه‌زنترین پشته‌ڤانی و بارسڤكی بۆ حوكمه‌تا هه‌رێما كوردستانێ، به‌لێ د هه‌مان ده‌م پێدڤیه كۆمپانیێن هونه‌ری ژی بۆ ده‌مێ پێنج سالان ژ دانا باجێ بهێنه لێبوورین داكو هێدی هێدی جهێ خوه بگرن و گۆت: “سه‌رمایه‌دارێ مه ژی پێدڤیه هزر د وێ چه‌ندێ دا بكه‌ت هه‌كه حه‌زژێكرنا وی بۆ هونه‌ری نه‌بیت، به‌لێ بلا بۆ نه‌ته‌وا خوه هه‌بیت و بلا هزر د وێ چه‌ندێ دا بكه‌ت ل پاشه‌رۆژێ دێ سینه‌ما بیته پیشه”.
محه‌مه‌د محسنی خویا كر كو ده‌ستبه‌ردان ژ فلمه فیسته‌ڤالا دهۆك یا نێڤده‌وله‌تی پێدڤیه د چو هزران دا نه‌مینیت، ژ به‌ر كو فلمه فیسته‌ڤالا ناڤهاتی بوویه مالا سینه‌ماكارێن كوردستانێ و گۆت: “ل دووماهیێ داخوازا من ئه‌وه كو زانكۆیێن مه یێن په‌یوه‌ندیدار ب هونه‌ری ڤه بسپۆرێن باش د بوارێ سیناریۆیان ڤه بیننه كوردستانێ و خۆلان بۆ سینارستێن مه ڤه‌كه‌ن داكو ئاستێ وان بلندبیت، هه‌روه‌سا وه‌زاره‌تا په‌روه‌دێ ژی بڕیاره‌كێ بده‌ت ژ خواندنا قووناغا بنه‌ره‌ت هه‌تا قووناغا ئاماده‌یی ب كێماتی هه‌ر 15 رۆژان جاره‌كێ ب رێیا داتاشوی فلمه‌كی بۆ قوتابیان نیشابده‌ن، ئه‌و فلم ژی یێ بهێزخستنا هزرا نه‌ته‌وه‌یی بیت بایه‌تێن كه‌لتۆری و فلكلۆری د ناڤ دا هه‌بن، ژ به‌ر كو ئه‌ڤ كاره دێ بنه بنیاته‌كێ خورستی بۆ سینه‌ما كوردی، هه‌روه‌سا ده‌ستبه‌ردان ژ فلمه فیسته‌ڤالا دهۆك یا نێڤده‌وله‌تی پێدڤیه د چو هزران دا نه‌مینیت، ژ به‌ر كو فلمه فیسته‌ڤالا ناڤهاتی بوویه مالا سینه‌ماكارێن كوردستانێ”.
