پێدڤییە كۆمبوونێن بەروەخت بهێنە ئەنجامدان
سامی بنیامێن رێكانی
كۆمبوونێن سەمیانێن قوتابییان ئێك ژ رێكێن سەرەكینە بۆ پێشخستنا ئاستێ زانستی یێ قوتابییان, گەلەك ژ كارگێریێن قوتابخانان دەمێ چەند رۆژەك دمینین بۆ ئەزموونێن دووماهیا وەرزێ ئێكێ یان یێ دووێ ژ نوی كۆمبوونا سەمیانان ئەنجامددەن, ئەڤە ژی دبیتە ئەگەرێ لاوازبوونا ئاستێ زانستی یێ قوتابییان. ژبەركو دو هەلسەنگاندن دهێنە ئەنجامدان و سەمیانێن قوتابییان هایداری زارۆكێن خۆ نابن و دبیتە جهێ گلە و گازندەیان. یا فەرە هەر ل دەستپێكا وەرزێ ئێكێ و دووێ بەری هەلسەنگاندنا ئێكێ بهێتەكرن؛ كۆمبوون ل گەل سەمیانێن قوتابییان بهێتەكرن, ژبەر كو هژمارەكا رێنماییان یێن هەیین كو ب قوتابی ڤە دگرێداینە نەخاسمە سالانە وەزارەتا پەروەردێ رێنمایێن نوی دەردئێخیتن و دڤێت سەمیان بهێنە ئاگەهداركرن, هەروەسا مامۆستا یان ژی رێنمایێن خۆ یێن تایبەت یێن هەین كو ب رێكا كۆمبوونێ را بگەهینیتە سەمیانان دا كو پێكڤە چاڤدێریا قوتابی بهێتەكرن, گەلەك ژ سەمیانان زوی ب زوی سەرەدانا قوتابخانێ ناكەن و هایداری زارۆكێن خۆ نینە, دڤێت هەر ژ دەستپێكا دەوامێ چاڤدێریەكا هویر ل سەر قوتابییان بهێتەكرن و رۆژانە دویڤچوونێ بۆ بكەن, ئەو ئاریشەیێن دهێنە د رێكا قوتابی دا دا پێكڤە بهێنە چارەسەركرن, د هەر كۆمبوونەكی دا هژمارەكا رێنماییان بۆ سەمیانان دهێنە رۆنكرن كو ئاستێ زانسی بەرەف پێش بچیتن بەلێ پتریا وان رێنماییان ل دەستپێكا دەوامێ دهێنە جێبەجێكرن و سەمیان بێ ئاگەهن ژ وان رێنماییان یان ژی ڤێراناگەهن كو جێبەجێ بكەن و دبیتە ئەگەرێ لاوازبوونا ئاستێ زانستی یێ قوتابییان. هەروەسا دڤێتن كۆمبوونێن تایبەت ل گەل سەمیانێن قوتابیێن پۆلا ئێكێ هەبن و هەیڤانە بهێنە ئەنجامدان ژبەر كو بۆ جارا ئێكی یە قوتابی ژ مالا خۆ بەرەف جهەكێ نەنیاس ڤە دچیتن و دچیتە جهەكێ ب قەرەبالغ و ئاڤاهییەكێ ژ خانیێ خۆ مەزنتر و دكەڤیتە ژێر رێنمایێن كاركێریا قوتابخانێ و ئەو ئازادییا ل ماڵ هەی تا راددەیەكی ل قوتابخانێ نابیتن لەوما دڤێت سەمیان ل سەر ڤێ چەندێ بهێنە ئاگەهداركرن. هەروەسا ئەو لژنا د كۆمبوونێ دا دهێتە دروستكرن بناڤێ ئەنجوومەنێ سەمیانێن قوتابییان كو كارێ وێ چارەسەركرنا ئاریشەیێن قوتابییانە دا زویتر دەست ب كار بن.
