پێدڤیە بهایێ خێزانێ بهێتە پاراستن
بێوار حەمدی:
ماموستایەكا زانكویێ بو روژناما ئەڤرو دیار كر كو جڤاكێ ساخلەم ژ خێزانێن ساخلەم پێك دهێت و د زانستێن جڤاكناسیێ دا خێزانێ گرنگیا خۆ هەیە و گوت: (هەكە بەراوردیەكێ دناڤبەرا جڤاكێ مە و جڤاكەكێ روژئاڤا دا بكەین، دێ بینین رولێ خێزانێ زێدەتر د جڤاكێ كوردەواری دا بەرجەستە دبیت).
دكتورە زوبەیدا سەید سالح ماموستایا زانكویێ و شارەزا د زانستێن سوسیولوجی دا بو دیار كر كو د زانستێن جڤاكناسیێ دا خێزانێ گرنگیا خۆ هەیە، ژبەركو ئێكەم یەكەیە زارۆك تێدا فێری پەیوەندی و رەفتارێن جڤاكی دبن و گوت: (هەكە ئەم بەراوردیەكێ بكەین دناڤبەرا جڤاكێ كوردەواری و جڤاكەكێ روژئاڤا ل روژئاڤا هێشتا ژیێ زارۆكی نەبویە سالەك ژبلی خێزانێ هندەك دام و دەزگەهێن دیتر ڤی رولی وەردگرن و ل ڤان دام و دەزگەهان دژیت، لەوما پەروەردەكرنا زاروكی دبیت زێدەتر یا ئاراستە كری بیت).
ماموستایا زانكویێ گۆتژی: (لێ د جڤاكێ مەدا زاروك ب كێماتی هەتا سێ سالیا ژیێ خۆ خێزانێ دا د بورینیت، لەوما ژی فێربونا چاوانیا پەیوەندیكرنێ و رەفتارێن جڤاكی و پەروەردەیا سەرەتایی دێ گەلەك كارتێكرن ل سەر كەسایەتیا وی هەبیت ل پاشەروژێ، و ئەڤە ژی گرێدای كەلتورێ خێزانێ و شێوازێ هزر كرنا وێ یە، لەوما ژی هێشتا د جڤاكێ مەدا خێزان رولێ سەرەتایی دگێریت ل سەر ئاراستەكرنا زاروكی).
د. زوبەیدایێ دیار كر كو ئەم دشێین د جڤاكێ خۆ یێ نها دا خێزانێ ل سەر سێ جوران دابەش بكەین و گوت: (ئەو ژی: خێزانەك كو حوكم ب توندی ژلایێ دایك و بابان و بتایبەت بابی ڤە ل سەر زاروكی دهێتە كرن، و چ پیتە ب حەزا زاروكان ناهێتە دان، ژبەرهندێ پتریا ئەو زاوكێن د ڤان خێزانادا دژین د شیانێن واندا نینە سەرەدەریەكا ساخلەم ل گەل دەوروبەران بكەن، هەروەسا خێزانەكا دی كو بەروڤاژی ڤێ خێزانێ یە، دبیت هەر ئەو دایك و بابە بن یێن خێزانا ئێكێ، لێ نها ئەو بوینە دایك و باب وئەو گرێكا د كەسایەتیا وان دا چێبوی، حەز ناكەن زاروكێن وان ژی د وێ ئەزمونێ دا دەربازببن، لەوما زێدەتر ژ یا پێدڤی زاروكی نازدار دكەن و داخۆازیێن وی جێبەجێ دكەن و بێگومان ئەڤ خێزانە ژی د ئاراستەكرنا زاروكی دا یا سەركەفتی نابیت).
ماموستایا زانكویێ د بەردەوامیا ئاخفتنێن خودا گۆت: (خێزانا سیێ، خێزانەكە ئاگەهداری گوهورینێن جڤاكیە و دیتنەكا روونتر ل سەر بارودوخی هەیە و دبێژنێ خێزانا دووربین ئەڤ خێزانە گرنگیێ ددەتە زاروكی و حەزێن وی و هەستا بەرپرساتیێ لدەڤ زێدە دكەت و ل گورەی ژیێ وی كار و ئەرك پێ دهێنە دان، و ئەڤ زاروكە دبنە خۆدان كەسایەتیەكا ب هێز و دشێن بەرسینگێ هەموو بویەر و ئاریشان بگرن).
سەبارەت خێزانا دووربین شارەزایا سوسیولوجی د. زوبەیدا گۆت: (وەكی مە گوتی خێزان ژ ئێكەمین یەكەیێن جڤاكی یە، لێ ئەڤە وێ رامانێ نادەت كو گوهورینێن ب سەر خێزانێ دا بساناهی نە یان ژی یەكەیەكا جودایە و ئەم دشێین گوهورینا ب سەردا بینین، بەلكو د جڤاكی دا هەر یەكەیەك ب یادی ڤە یا گرێدایە).
ماموستایا زانكویێ گۆتژی: (بو هندێ كو مە جڤاكەكێ ساخلەم هەبیت پێدڤیە یەكەیێن دی یێن جڤاكی ب پلان و ستراتیجی و سیستەمەكێ گونجایی و ئاراستە كری ل سەر دو لایەنا كار بكەن ئەو ژی، هەموو بزاڤ بهێنە كرن كو خێزانا نوكە و پێدڤیێن وێ بنیاسین و بەرهەڤ بكەین، و زەنگینی و بهایێ خێزانێن مە بهێنە پاراستن لێ ل گەل هندێ ئاراستەیا خێزانێ یا هەڤدژ نەبیت ل گەل بارودوخێ ڤی سەردەمی).
