پێدڤیە تورکیا سیاسەتا خوە ل هەمبەر کوردێن سووریێ بگوهۆڕیت
پەرلەمانتارەکێ بەرێ یێ ئاکپارتیێ دیار دکەت، دڤێت کورد ل سووریێ ببنە هێزەکا مەزن و کاریگەر و گرنگە کوردان هەرێمەکا خوە یا جودا هەبیت ئەو یەک ژ بۆ پاشەرۆژا سووریێ ژی یا گرنگە و دڤێت تورکیا ژی پشتەڤانیێ ل هەرێما کوردی بکەت.
محەمەد مەتینەر ئەندامێ بەرێ یێ پەرلەمانێ تورکیا سەر ب ئاکپارتیێ دیار کر، ئێدی ل سووریێ چو تشتەک وەکو بەری نها نابیت، دڤێت تورکیا ژی ڤێ راستیێ قەبوول بکەت، چونکی د ئاستێ جیهانێ دا ژی ئەڤرۆکە کەس پشتەڤانیێ ل سووریایەکا ناڤەندی ناکەت، بەرێ خوە بدەنێ ئسرائیل ب چو رەنگەکێ رێ نادەت مافێن دورزیان بهێتە پێشتگوه خستن، وی دەمی دڤێت تورکیا ژی ل گۆر راستیا نها یا ل سووریێ سیاسەتێ بکەت، مخابن سیاسەتا نها یا تورکیا ل سووریێ گەلەک شاشە و گۆت: (نابیت تورکیا دژبەریا مافێن گەلێ کورد ل سووریێ بکەت، دڤێت تورکیا پشتەڤانیێ ل کوردان بکەت، هەبوونا هەرێمەکا کوردی ل سووریێ ل دژی بەرژەوەندیێن تورکیا نینە، کا چاوا تورکیا پەیوەندیێن گەلەک باش ل گەل هەرێما کوردستانێ ل ئیراقێ هەنە دشێت ب هەمان رەنگی ل گەل کوردێن سووریێ ژی پەیوەندیێن گەلەک باش دروست بکەت).
ناڤهاتی د پشکەکا دی یا ئاخڤتنا خوە دا ئەو یەک ژی دیار کر، هندەک کەس وەسا دبینن هەکە کورد ل سووریێ خوە برێڤە ببەن و ببنە خوەدان هەرێمەکا جودا دێ سووریێ پارچە بیت، نە وەسا نینە، هەکە مافێ کوردان نەهێتە دان وی دەمی دێ مەترسیا پارچەبوونا سووریێ هەبیت، هەکە کورد دەڤەرێن خوە برێڤە ببەن و پەیوەندیێن وان ل گەل شامێ ژی باش بیت وی دەمی چو مەترسی ل سەر سووریێ نابن، بەلکو دێ سووریێ پتر ژی یا بهێز کەڤیت و گۆت: (هەکە شام ل سەر سیاسەتا خوە یا نها رژد بیت و بڤێت هێزێ ل دژی کوردان بکار بینیت دێ مەترسیێن مەزن ل سەر هەموو سووریێ دروست بن، باشترە شام رێیا هەری راست بگریتە بەر و ل گەل کوردان دەست ب دانوستاندنان بکەت و بلا کوردان ژی هەرێمەکا خوە هەبیت، ئەو یەک ژ بۆ شامێ و هەتا ژ بۆ تورکیا ژی چو مەترسیێن خوە نابن).
محەمەد مەتینەر د دووماهیا ئاخڤتنا خوە دا ئەو یەک ژی دیار کر، نها ل سووریێ تنێ تورکیا و ئەمریکا نینن، بەلکو ئسرائیل ل سووریێ بوویە هێزەکا گەلەک مەزن و کاریگەر، بێی رازیبوونا ئسرائیلێ ژی چو پرۆژە ل سووریێ سەرکەفتی نابن، دڤێت تورکیا ژی ڤێ راستیێ قەبوول بکەت، ڤێجا باشترە تورکیا کوردێن سووریێ ژ خوە دوور نەکەت، بلا تورکیا پشتەڤان بیت و ئەو یەک ژ بۆ بهێزبوونا پێگەهێ تورکیا ل رۆژهەلاتا ناڤین ژی گەلەک یا گرنگە.
