پێدڤیە تورکیا سیاسەتا خوە ل هەمبەر کوردێن سووریێ بگوهۆڕیت
بسپۆرەکێ زانستێن سیاسی دیار دکەت، دڤێت تورکیا دەست ژ دوژمناتیا کوردێن سووریێ بەردەت و پەیوەندیێن خوە ل گەل وان باش بکەت، چونکی ئەمریکا و گەلەک وەلاتێن دی ب چو رەنگەکێ دەست ژ کوردێن سووریێ بەرنادەن و دڤێت تورکیا راستیا هەی قەبوول بکەت.
مومتازەر تورکۆنە بسپۆرێ زانستێن سیاسی کو بەری نها دەمەکێ شیرەتکارێ سەرۆک وەزیرێن تورکیا ژی بوویە د داخویانیەکێ دا دیار کر، دڤێت تورکیا دەست ژ سیاسەتا خوە یا شاش ل هەمبەر کوردێن سووریێ بەردەت، یا نها تورکیا دکەت دوژمناتیا کوردانە و ئەو یەک د بەرژەوەندیا تورکیا دا نینە، چاوا دبیت ل تورکیا بەحسێ چارەسەرکرنا پرسا کوردی بهێتە کرن و ل ئالیێ دی دوژمناتیا کوردان بکەن، ئەو یەک نابیت و دێ ئەنجامێن خوە یێن گەلەک خراب بۆ تورکیا هەبیت و گۆت: (ئەزموونا تورکیا ل گەل هەرێما کوردستانێ سەلماند کو تورکیا دشێت ب رێیا دروستکرنا پەیوەندیێن باش ل گەل کوردان بەرژەوەندیێن خوە بپارێزیت و دەمێ پەیوەندیێن تورکیا ل گەل کوردان باش بیت چو مەترسی ژی ل سەر تورکیا دروست نابن، ژ بەر ڤێ یەکێ ژی دڤێت تورکیا هەمان ئەزموونێ ل گەل کوردێن سووریێ ژی دەستپێ بکەت و دەست ژ سیاسەتا خوە یا شاش ل هەمبەر کوردێن سووریێ بەرەت).
ناڤهاتی ئەو یەک ژی دیار کر، نها ل سووریێ رەوشەکا جودا هەیە، ئەمریکا پشتەڤانیێ ل ئەحمەد شەرعی دکەت، لێ د هەمان دەمی دا ئەمریکا پشتەڤانیێ ل هەسەدێ ژی دکەت، هەسەدە هێزەکا مەزنە و هەتا نها ژی ئەمریکا چەکی ددەتە وان و ئەو یەک ژی نیشا ددەت ئەمریکا هەسەدێ ب تنێ ناهێلیت، ڤێجا باشترە تورکیا ژی ل گۆر راستیا هەی سیاسەتێ بکەت، نابیت تورکیا وەسا هزر بکەت دێ سوباهی ئەمریکا هەسەدێ ب تنێ هێلیت و ئەو دشێن ب ئۆپەراسیۆنێن سەربازی ل باکورێ سووریێ یا دخوازن بدەستڤە بینن، ئەو یەک شاشیەکا گەلەک مەزنە، نە ئەمریکا رێ ددەت تشتەک وەسا بهێتە کرن و نە ژی ئسرائیل، ژ بەر ڤێ یەکێ ژی گرنگە تورکیا هزرا هەر پێشهاتەکێ ل سووریێ بکەت.
بسپۆرێ زانستێن سیاسی د دووماهیا ئاخڤتنا خوە دا ئەو یەک ژی دیار کر، تورکیا سنورێ هەڤپشک ل گەل دەستهەلاتا ئەحمەد شەرعی نینە، بەلکو ل گەل کوردان هەیە، هەکە تورکیا پەیوەندیێن خوە ل گەل کوردان باش بکەت دێ مفایەکا گەلەک مەزن یا سیاسی و ئابووری ژی گەهیتە تورکیا، لێ مخابن سیاسەتا نها یا تورکیا باش نینە، هەکە تورکیا ل سەر سیاسەتا خوە یا نها بەردەوام بیت دێ کاریگەریا خوە یا گەلەک خراب ل سەر قووناغا ئاشتیێ ل تورکیا ژی هەبیت، ئانکو گرنگە تورکیا حسابا هەر تشتەکێ بکەت.
