پێدڤیە خێزان ڕۆژانە دانەکێ خوارنێ پێکڤە بخۆن
بێوار حەمدی:
پێدڤییە خێزان گەلەک یا هشیار بیت و هەر ژ دەسپێکێ سیستەمەک د مالدا هەبیت و زارۆکێن خو وەسا پەروەردە بکەن کو پێگیریێ پێ بکەن، هەروەسا پێدڤییە دەمەک بهێتە دەستنیشانکرن کو خێزان کۆم ببیت و دانوستاندنا ڕۆژانێن خۆ بکەت.
د. سەمیا سەعید ماموستایا زانکۆیێ و بسپۆرا زانستێن جڤاکی د دیدارەکێ دا بۆ ڕۆژناما ئەڤرۆ دیارکر کو پێدڤییە هەموو خێزان د هشیار بن و هەر ژ دەسپێکێ سیستەمەکی د مالێدا دانن و گۆت: (دڤێت خێزان زارۆکێن خۆ ژی وەسا پەروەردە بکەت کو پێگیریێ ب ڤی سیستەمی بکەن داکو تووشی ئاریشەیان نەبن).
ماموستایا زانکۆیێ دیار کر ژی، گەلەک یا گرنگە خوارنێن سەرەکی ب تایبەت خوارنا نیڤرۆ خێزان پێکڤە کۆم ببیت و هەموو پێگریێ ب ڤێ چەندێ بکەن کو وی دەمی ل مال بن، هەر خێزانەکێ هندەک بیرئینان یێن هەین، لەوما دڤێت سەرۆکێن خێزانێ د ڕژدبن د ساخکرنا وان دا و گۆت: (پێدڤییە سەرۆکێن خێزانێ بێی جوداهی سەرەدەریێ دگەل زارۆکێن خۆ بکەن هەتا هەکە ژ ژیێ زارۆکینیێ ژی دەرکەفتبن، دڤێت هەر گرنگیێ پێ بدەن).
بسپۆرا زانستێن جڤاکی د. سەمیایێ د بەردەوامیا ئاخفتنێن خۆدا ئەو چەندە ژی دیار کر، داکۆ خێزان هەر یا لێک نێزیک بیت دڤێت دایک و باب بەرپرسایەتیا هەموو کاران بو وان دیار بکەن و پێدڤییە خێزان هەموو پێکڤە کۆم ببن و گەنگەشەیا سەروبەرێ ڕۆژانێن خۆ بکەن و گۆت: (هەروەسا هەکە ئاریشەیەک ژی هەبیت ئەو هەر ب ڕێیا وێ کۆمبۆنێ چارەسەر بکەن، ژبەرکو ئەڤ چەندە دێ چارەسەریان پەیدا کەت و دێ باوەریەکا باش ل دەڤ هەموو ئەندامێن خێزانێ دروست کەت).
