پێدڤیە خەلكەكی هان بدەین كەڤالێن خۆمالی بكڕن
عەزیز هەورامی:
شێوەكار(وسا رەحمەت) كو ژپارێزگەها هەلەبجەیە، د دیدارەكێ دا بۆ رۆژناما ئەڤرۆ گۆت: دژیەكێ بچووكدا من حەزژ چێكرنا وێنەیان دكر، مالبات ژی پشتەڤان بوون، لەورا ئەز یا بەردەوام بووم و ل وەرزێ هاڤینێ دچوومە خۆلێن فێركرنێ هەتا چوویمە كولیژا هونەرێن جوان و نوكە ئەز ماموستایا وانەیا هونەری مە و هونەری یێ تێكەلی خوینا من بووی.
هەروەسا گۆت: هەتا نوكە من پشكداری د (19) پێشانگەهێن هەڤپشكدا كریە، ژوانا پێشانگەهەك ل قەزا زاخۆ و ئەز دبینم ڤەكرنا پێشانگەهان بۆ مە شێوەكاران گەلەكا گرنگە، بۆ زانین من هژمارەكا زۆرا كەڤالان هەنە و ناڤەرۆكا پتریا وان دەربڕینێ ژ ئێش و ئازارێن ژنان دكەن، هەروەسا من گەلەك كەڤالێن خوە فرۆتینە، بەس ئەز نەشێم بێژم بۆ من بووینە ژێدەرێ ژیانێ و دخوازم بزاڤەك بهێتە كرن كو خەلكەكی هان بدەین كەڤالێن خۆمالی بكڕن و ل مالێن خوە ب هەلاویسن.
