پێدڤیە دەنگێ خوە بدەنە دیارکرن نە لەشى
ئه‌ڤرۆ:
د سەرەدانا خوە یا دویێ دا بۆ باژێرێ دھۆکێ، شەڤینێ خواست سترانەکا دوقولی ل گەل ھونەرمەند (حەسەن شەریف) بێژیت و گۆت: ئەڤە بۆ دەمێ چەند سالانە ئەڤ حەزە ددلێ مندا و ھیڤیا من ئەوە ئەڤ جارە بجە بھێت.
شەڤینێ گۆت: دژیێ پازدە سالیێ حەزا مۆزیکێ بۆ من پەیدا بوو، ژبەرکو ل وی دەمی دو برایێن من مۆزیکژەن بوون، لەورا ب پشتەڤانی و ھاندنا وان ل باژێرێ خوە (دێرسمێ) من پشکداری د چەند خۆلێن مۆزیکێ دا کر و ھێدی ھێدی ئەڤ حەزە ل گەل من مەزن بوو، دووڤدا دەلیڤە بۆ من ھاتە پێش و بۆ دەمێ چار سالان من مۆزیک ب شێوەکێ ئەکادیمی خواند.
ھێشتا گۆت: ژ بەرکو ل وی دەمی ل باژێرێ من سترانبێژێن کچ دکێم بوون، لەورا ئەز بەر ب سترانگۆتنێ ڤە ژی چووم و ھەتا نھۆ من دو ئەلبۆم و پێنج کلیپ ھەنە و ئەلبۆما سیێ درێ دایە و دێ بزاڤێ کەم پشتی جەژنێ بەلاڤکەم.
دلایەکێ دا گۆت: تشتێ ئەز گەلەک پێ دئێشم ئەوە گەلەک جاران دێ بینی سترانبێژەکا کچ یان ژن دەمێ بۆ سترانگۆتنێ دھێتە سەر ستێجێ دێ ھندەک جلکێن بێ سەروبەر کەتە بەر خوە و نیڤەکا لەشێ وێ دیاردکەت، ب راستی دیاردەکا کرێتە، چونکو دڤێت سترانبێژا کچ دەنگێ خوە بۆ خەلکی بدەتە دیارکرن نەلەشێ خوە.
ناڤھاتی دژیێ (٣٤) سالیێ دایە و ب گۆتنا پشتی سەرەدانا دھۆکێ دێ سەرەدانا ئەلمانیا و ھولەندا کەت و دبەرنامێ وێ دایە چەند کونسێرتان ل وێرێ بگێریت.
