پێدڤیە د خێزانێ دا پەیوەندیێن جڤاکی بهێزتر بن
هەولێر، قائید میرۆ:
وەكی ئورۆپا خێزان یا بەرەف نەمانێ دچیت و هەر ئەندامەكێ خێزانێ جودا دژیت ڤەكۆلەرەكێ جڤاكی ئاماژە ب پەیوەندیێن مرۆڤان دكەت بتایبەتی پەیوەندیێن دناڤبەرا خێزانێ و دبێژیت: پێدڤیە پیرۆزیا خێزانێ بهێتە پاراستن و پەیوەندیێن خورت دناڤبەرا ئەندامێن خێزانێ هەبن، چونكە ل هەرێما كوردستانێ ژی وەكی ئەورۆپا خێزان یا بەر ب نەمانێ دچیت.
سەردار لەتیف، ڤەكۆلەرێ جڤاكی و ئەندامێ لیژنا ئاشت كرنا خێزانێ بۆ رۆژناما ئەڤرۆ دیار كر، مرۆڤ بخۆ كائینەكێ جڤاكیە و بێی هەبوونا پەیوەندیان ل گەل دەوروبەرا مرۆڤ نەشێت بژیت، پەیوەندیێن مرۆڤی ل گەل دەوروبەران بۆ سەر جورێن پەیوەندیان دهێتە بەلاڤ كرن ژ وان ژی پەیوەندیێن جڤاكی و پەیوەندیێن ئابوری و هەتا پەیوەندیێن حزبایەتی ژی هەنە.
سەردار دیار كر ژی كو ئێكەم ویستگەها پەیوەندیا مرۆڤی ژ خێزانێ دەستپێدكەت، چونكە ئێكەم خالا پەیوەندیێ ل زارۆكینیێ دەستپێدكەت ئەوژی خێزانێ رۆلەكێ سەرەكی هەیە زارۆكێن خوە فێری پەیوەندیێن ساخلەم بكەت، خێزان بچووكترین پێكهاتا ناڤا جڤاكێ یە و گۆت: (لێ هێدی هێدی ئەو پیرۆزیا خێزانێ یا بەرب نەمانێ دچیت مینا وەلاتێن ئەورۆپا، چونكە ل وەلاتێن رۆژئاڤا شیرازێ خێزانێ نەمایە و هەر ئەندامەكێ خێزانێ ب جودا ژیانا خوە دەرباز دكەت).
ڤەكۆلەرێ جڤاكی گۆتژی: (ئێدی خێزان ئەو پێكهاتا جڤاكی یا گرنگ نەمایە، مخابن ل هەرێما كوردستانێ ژی هندەك خێزان وەكی ئەورۆپا و ئەمریكا یێ بەر ب شێوازەكێ ژیانێ دچن هەر ئەندامەكێ خێزانێ جودا بژیت و ئەو پیرۆزی و گرنگیا خێزانێ بەر ب نەمانێ یە ئەڤێ چەندێ ژی كاریگەریێن خراپ هەنە ل سەر جڤاكی، چونكی چەند مە خێزانەكا ئێكگرتی هەبیت و پەیوەندیێن ئەندامێن خێزانێ خورتربن دێ جڤاكەكێ سەركەفتی بەرهەم ئینین).
ئەندامێ لیژنا ئاشت كرنا خێزانێ سەردار ئەو چەندە ژی دیار كر كو دەستپێكا پەیوەندیێن جڤاكی ڤەدگەڕیت بۆ قۆناغا پێكئینانا خێزانێ، مخابن د سەردەمێ نوكەدا ئەو لێكتێگەهشتن و ڤیان و پێكڤە ژیانا بەرێ هەی نەمایە، پێدڤیە بەری مرۆڤ بچیتە قۆناغا هەڤژینیێ چ كچ یان كوڕ ل سەر بنەمایەكێ ساخلەم پرۆسا هەڤژینیێ پێك بینن، ئەركێ هەر كەسەكیە دەمێ سینگل بزانیت دێ چ جورە هەڤژینەكێ هەلبژێریت یان ژی دێ كی بیتە دایك بۆ زارۆكێن وی و هەكە كچ بیت كی دێ بیتە بابێ زارۆكێن وێ.
ڤەكۆلەرێ جڤاكی سەردار لەتیف دیار كر ژی كو زۆر گرنگە ژ هەموو روویەكێ ڤە هەڤژین نێزیكی ئێك بن، هەتا ژلایێ ئابوری ژلایێ رەوشنبیری ژلایێ جڤاكی نابیت دووراتیەكا زۆر هەبیت ناڤبەرا هەڤژینان، چونكە دەمێ جوداهیەكا زۆر هەبیت دووماهیێ چو پەیوەندی نامینن و گۆت: (من بخوە حالەت دیتیە بۆیە ئاریشە دناڤبەرا دوو هەڤژینان و هاتینە سەر تەلاقدانێ دەمێ من پرسیار ل ژنێ كری پەیوەندیێن وان بۆ كەنگی ڤەدگەڕن گۆتی، تنێ دەمێ ئێك حەفتی مە ئێكدو ناسیە و هاتیە خوازگینیا ئەڤە ئێكە ژ وان شاشیێن دهێنە كرن چاوا حەفتیەكێ ئێك بنیاسن و خوازگینی بهێنە هنارتن و بیك بهێتە ڤەگوهاستن رامان ئەوە چو لێك تێگەهشتن نەبوویە).
