پێدڤیە كچ كاربكەت ئەگەر خوەبەخش ژی بیت
رۆژ عەلی، كچەكا دهۆكێ یە و نها ل دوبەی دژیت و كار بۆ خوە ل وێرێ پەیدا كریە، د دیدارەكێ دا دیار كر كو پێدڤیە كچ ل سەر خوە كاربكەن و خوە پێشبێخن و ل مالێ نەراوەستن و خۆ فێری هەموو جۆرێن تەكنولوژیایێ بكەن و تشتێن نوو فێرببن و دەست ب شولی بكەن ئەگەر خۆ خوەبەش ژی بیت و ل دووڤ دا دێ دەرگەه بۆ هێنە ڤەكرن و گۆت: ل دهۆكێ گەلەك دەلیڤێن كاری نەبوون و دەلیڤێن هەین ژی د سنوورداربوون، من دڤیا تشتەكێ مەزنتر بكەم و من ل دوبەی باشترین كار بدەستخۆڤە ئینا و یا بەردەوامم ل سەر كاری.
رۆژ عەلی د دیدارەكێ دا بۆ رۆژناما ئەڤرۆ دیار كر، ل دەمێ قوتابیان زانكۆیێ وێ دەست ب دانانا پلانەكێ بۆ ژیانا خوە كر و ل وی دەمی وێ زانی خواندن و باوەرنامێ چەند مفا بۆ ژیانا وێ هەیە و گۆت: من هزر د ئایندێ خوە دا كر، من ل دهۆكێ ل گەل رێكخراوێن نێڤدەولەتی دەست ب كاری كر و ل گەل كۆمپانیێن كەرتێ تایبەت كاركر و ئەڤە بۆ پالدەر سیڤیێ من ب هێز بكەڤیت و پاشی من پێشكێشی كۆمپانیەكا كەرتێ تایبەت كر و ل دوبەی دەست بكاربووم.
چ تشتی وەل تە كر تو دهۆكێ بجهبهێلی و بەرەڤ وەلاتەكێ بیانی بچی؟ رۆژ عەلی دبێژیت: ل دهۆكێ گەلەك دەلیڤێن كاری نەبوون و دەلیڤێن هەین ژی د سنوورداربوون، من دڤیا تشتەكێ مەزنتر بكەم و ئەڤە بۆ ئەگەر هزرا كاركرنێ ل دەڤەری وەلاتی د سەرێ من دا بلڤلڤیت و بچمە دەرڤە كاربكەم.
ل دور وێ پرسیارێ ئەرێ تو دبینی د ناڤا دهۆكێ دا كچ بشێن كاری ب دەستخۆڤە بینن؟ رۆژ دبێژیت: گەلەك كچی یێن هەین شیاینە كار بدەستخۆڤە بینن، بەلێ ب ساناهی نینە و نە د تایبەتمەندیا وان دا، بەلكو د وارەكێ دی دا كاردكەن و گۆت ژی: پێدڤیە كچ دەستبكاری بكەن ئەگەر خوەبەخش ژی بیت، چونكو دێ هەر رۆژەك هێت و ئەو كارە هەموو بۆ وان هێتە قەرەبووكرن.
سەبارەت وێ پرسیارێ بۆچی تە دوبەی هەلبژارت بۆ بدەستڤەئینانا كاری؟ رۆژ عەلی ئاشكرا كر، د ئەڤرۆكە دا دووبەی دهێتە نیاسین باژێرەكێ نێڤدەولەتی و گەلەك دەلیڤێن كاری لێ هەنە و مرۆڤێن ژ هەموو رەنگان لێ هەنە و باژێرەكە ئەگەر مرۆڤ لێ كاربكەت هەموو ئاسانكاری بۆ مرۆڤی دهێنە كرن بۆ هندێ ب سەركەڤیت و گۆت ژی: هەر كچەكا دهۆكێ بەری هینگی كارەك كربیت و خودان باوەرنامە بیت، گەلەك ب ساناهیە بشێت ل دوبەی كارەكی بدەستخۆڤە بینیت.
ل دور وێ پرسیارێ ئەرێ كچێن دهۆكێ چ بكەن دا بشێن كاری بدەستخۆڤە بینن؟ رۆژ خویاكر، پێدڤیە كچ ل سەر خوە كاربكەن و خوە پێشبێخن و ل مالێ نەراوەستن و خۆ فێری هەموو جۆرێن تەكنولوژیایێ بكەن و تشتێن نوو فێرببن و دەست ب شولی بكەن ئەگەر خۆ خوەبەش ژی بیت و ل دووڤ دا دێ دەرگەه بۆ هێنە ڤەكرن.
