پێدڤیە هەڤنیاسینا كچ و كوڕان یا دەم كورت بیت
بێوار حەمدی:
چالاكڤانەكا جڤاكی دیار كر كو هەڤنیاسینا كچ و كۆران بەری پێكئینانا هەڤژینیێ هەكە بو دەمەكێ درێژ نەبیت باشترە، دڤێت هەڤنیاسینا كچ و كوران ب مەرەما پێكئینانا هەڤژینیێ بیت و یا دەم كۆرت بیت و گۆت: باشترە هەڤنیاسینا وان ژ هەیڤەكێ هەتا دو هەیڤان دەرباز نەبیت داكو كاریگەریێن باش هەبن و نەخۆشی و ل بەر ئێك ساربون پەیدا نەبیت.
چالاكڤانا جڤاكی چیان مەهدی، د دیدارەكێ دا بۆ رۆژنامەیا ئەڤرۆ دیار كر كو بەری كچ و كۆڕ هەڤژینیێ پێك بینن باشترە ئێكودو بنیاسن داكۆ بزانن كا دێ ل گەل ئێك گۆنجن یان نە و دڤێت نیاسینا وان ب مەرەما پێكئینانا هەڤژینیێ بیت و گۆت: هەكە هەڤنیاسینا كج و كۆڕا ژ هەیڤەكێ هەتا دوو هەیڤان بیت باشترە داكو كاریگەریێن باش هەبن و نەخۆشی و ساربون چێنەبن و كەس ژ وان چ بەهانە ژی نەمینن یان هەكە كێماسیەك ژلایەكی هەبیت دا د ئاگەهدار بن و نەبیتە جهێ بێزاریا وان.
چیانێ دیار كر ژی، هەكە هەڤنیاسینێ ب سالان ڤەكێشا ل وی دەمی دێ دناڤبەرا وان دا نەخۆش بیت و دێ ل بەرئێك د ڕاوستیایی بن و گۆت: گەلەك جاران كوڕی دڤێت بخۆ كچەكێ بخوازیت لێ پشتی دوڤچوونێ دێ زانیت كو پەیوەندیەكا دی یا سوزداری هەبوو، رەنگە كوڕ لێڤە بیت، ئەڤجا هەكە هەڤنیاسینا وان بۆ مەرەمەكا خێرێ و هەڤژینیێ بیت چ ئاریشە نینە پرسیارا ئێكدو بكەن یان بۆچوونا خێزانێن خۆ وەربگرن، بەلێ هەكە هەڤنیاسینا بو دەم بوراندنێ بیت و ئێكودو بهێلن بێگومان ئەڤە ل دەسپێكێ پەیوەندیەكا دروست نەبوویە.
چالاكڤانا جڤاكی دبەردەوامیا ئاخفتنێن خۆدا دیار كر كو گەلەك جاران ماڵباتا كچێ دبیتە رێگر ل هەمبەر پەیوەندیێن وێ و ئەگەرێ سەرەكی ژی دزڤڕیت بۆ داب و نەریتێن جڤاكی و گۆت: مخابن جڤاكێ مە بتنێ هزر دكەت كچ شەڕەفا وانە و هندەك شانازیێ ب پەیوەندیێن كوڕێن خۆ دبەن و بەروڤاژی هەكە بزانن كچا وان پەیوەندیەكا هەی نەك بتنێ دێ بنە ڕێگر بەلكۆ هەتا دهێتە ئێشاندن و زیندان كرن و هەتا جاران دگەهیتە ڕاددێ كۆشتنێ ژی.
