پێدڤیە هەڤپەیمانیەكا جیهانی دژی میلیشیایێن هێرشی سەر كوردستانێ دكەن بهێتە پێكئینان
هەولێر، قائید میرۆ
شارەزایەكێ كەرتێ وزێ داخواز دكەت، مینا بەرهنگاربوونا گرۆپا تیرۆرستیا داعش هەڤپەیمانیەكا نێڤدەولەتی بۆ بەرهنگاربوونا وان گروپێن میلیشیاژی بهێتە پێك ئینان، یێن بووینە مەترسی ل سەر ژێرخانا ئابوریا ئیراق و جیهانێ. هەروەسا دبێژیت: هێرشا لسەر كێلگەها كۆرمۆر ئاماژەنە بۆ ڤێ چەندێ رێكێ نادەن ژێرخانا ئابوورا هەرێما كوردستانێ گەشەیێ بكەت و دژی رێكەفتنا ئیراق و ئەمریكانە بۆ زێدەكرنا بەرهەمێ غازێ.
دكتۆر ئەرشەد تەها، شارەزایێ بیاڤێ وزێ بۆ رۆژناما ئەڤرۆ دیار كر «هێرشا ل سەر كێلگەها كۆرمۆر چەند پەیامەك بوون، ب تایبەتی بۆ هەرێما كوردستانێ و ئەمریكا، چونكو هێشتا هەیڤەك دەباز نەبوویە ل سەر سەرەدانا سودانی بۆ ئەمریكا و ئێك ژ رێكەفتنێن ناڤبەرا ئیراق و ئەمریكا ئەڤە ئەمەریكا پشتەڤانیا ئیراقێ بكەت بۆ زێدەكرنا بەرهەمێ غازێ.
زێدەتر گۆت: هەر سال ئیراق ب گوژمێ شەش ملیار دۆلاران غازێ ل دەرڤە هارودە دكەت، ل ئیراقێ چوار كێلگەهێن بەرهەم ئینانا غازێ هەنە د دەمێ نوكەدا، ئەو ژی كێلگەها عوكاس ل ئەنبار و مەنسووریە ل دیالە و كێلگەهەك ل بەسرە و كێلگەها كۆرمۆر ل پارێزگەها سلێمانیێ، شەش سالێن بۆری دا ئەمریكا دەلیڤە دابوو ئیراقێ غازێ ل ئیرانێ بكڕیت ب مەرجەكی لەزێ بهێتەكرن ل بەرهەمئینانا غازێ ل نافخۆیا ئیراقێ، بەلێ هێرشا لسەر كێلگەها كۆرمۆر ئارمانج ئەڤەبوو ئیراق سەقامگیریێ بخۆڤە نەبینیت و رێكەفتنا ناڤبەرا ئیراق و ئەمریكا.
گۆت ژی «كێلگەها كۆرمۆر 530 ملیۆن پێ سێجا د ئێك رۆژدا دهێتە بەرهەم ئینان و بڕیاربوو هەیڤا داهاتی سەد هزار ملیۆن پێ سێجا غازێ هاوردەی كەركووكێ بكەت ب مەرەما بەرهەم ئینانا كارەبێ، چونكە ئەم ژبیر نەكەین 80%ێ یا كارەبا هەرێما كوردستانێ دهێتە بەرهەمئینان ب رێیا غازێ یە، لەوڕا چەند زیان ب هەرێما كوردستانێ بكەڤیت هند زیان دێ ژێرخانا ئابورا ئیراقێ، ل شەش هەیڤێن بۆری دا چەكدارێن میلیشیا سەلماندیە مەترسینە لسەر بەرەف پێشچوونێن ئیراقێ و دەڤەرێ، ژبەركو نەك تنێ ل ئیراقێ ل سووریێ و لبنان و سعودیێ و چەندین وەلاتێن دی هێرش ئەنجامداینە.
خویاژی كر، هەتا گرۆپێن میلشیاتان هەبن، بەرژەوەندیێن خەلكێ ئیراقێ و ئابورا جیهانێ و دەڤەرێ ژی یا پاراستی نابیت، هەروەسا پەیامەك ئاشكرایە و چاوا هەڤپەیمانیەكا نێڤدەولەتی دژی داعش هەبوو ب دیتنا من پێدڤیە هەڤپەیمانیەكا جیهانی ژی دژی میلیشیا بهێتە پێك ئینان، چونكە ئەو میلیشیا جوداهیێ ناكەن ناڤبەرا بنگەهێن سەبازی و سڤیل، ژلایەكێ دیڤە جوداهی نینە ل ئارمانج گرتنا ژێرخانا ئابوری ل هەر جهەكێ دەستێ وان بگەهیتێ، هێرشا ڤێ دوماهیێ ببیتە ئەگەرێ پێك ئینانا هەڤپەیمانیا نێڤدەولەتی بۆ بەرهنگاربوونا وان گروپێن دەرچووی ل قانوونێ هەرێما كوردستانێ و ئیراق ژی پشكداریێ د ڤێ هەڤپەیمانیێ دا بكەن.
دكتۆر ئەرشەد تەها ئاماژە كر «ل هەر چوار كێلگەهێن غازێ یێن ئیراقێ تنێ زێدەتر وەبەرهێنان ل كێلگەها كۆرمۆر هاتیەكرن و هندەك وەلات هەنە ناخوازن هەرێما كوردستانێ پشكداربیت ل دابینكرنا غازێ بۆ بازاڕێن جیهانێ، ئەمریكا ئابلۆقەیێن ئابوری داناینە سەر ئیرانێ رێكێ نادەت چو دەولەتەك غازێ ل ئیرانێ بكڕیت، تنێ مۆلەت دایە ئیراقێ بۆ پێدڤیێن نافخۆ غازێ سالانە ل ئیرانێ بكڕیت، ڤێ چەندێ ژی كاریگەریێن خۆ هەنە ل سەر ڤێ هەڤكێشەیێ و ب تنێ ئارمانج هەرێما كوردستانێ نینە، وەلاتێ قەتەر ئێك ژ وان وەلاتێن زۆرترین غازا شل بەرهەم دئینیت و مەترسی ل سەر هەیە، چونكە ناهێلن غاز و نەفت ل دەریایێ سۆر بهێنە هنارتن بۆ بازاڕێن جیهانێ، واتە سەرەڕای ڤێ چەندێ میلیشیات مەترسینە بۆ سەر سەقامگیری و ئابورا هەرێما كوردستان و د هەمان دەم دا مەترسینە بۆ سەر سەقامگیری و ئابورا جیهانێ و دەڤەرێ ژی.
