پێدڤیە ژنێ ژی ماف هەبیت ببیتە رێڤەبەرا دەزگەهەكی راگەهاندنێ
دلڤین رەشید:
مەدیاكار (هوزان عەبدوللا) د دیدارەكێ دا بۆ رۆژناما ئەڤرۆ دیاركر كو ئەڤە نێزیكی یازدە سالانە ئەو دبۆارێ راگەهاندنێ دا كار دكەت و نوكە ل دیجیتال میدیایا گاڤ بەردەوامی ب كارێ خوە ددەت و ب گۆتنا وێ راگەهاندنێ شیایە كەسایەتیا وێ ب هێزبكەت و زێدەتر نێزیكی ئێش و ئازارێن خەلكی بكەت دا كو بێشێت پتر دووفچوونا وان بابەتان بكەت كو گرێدای مافێن خەلكی بن و راگەهاندنێ بێهنفرەهی ژی ل دەف وێ پەیداكریە.
ناڤهاتیێ گۆت: دقوناغا نوكە دا رەوشا راگەهاندنێ ل هەرێما كوردستانێ گەهشتیە ئاستەكێ باش، چونكی شیایە گەلەك كەیسێن هەستیار ئاشكرا بكەت و دەنگ و ئێش و ئازارێن مللەتێ كورد ب جیهانەكا دی بگەهینت و نوچەیێن كوردی ببنە ژێدەرێن گەلەك كەنالێن بیانی، بەلێ سۆشیال مەیدیایێ كارتێكرنەكا خراب ل سەر راگەهاندنا كوردی كریە و هەتا رادەیەكی بەرەلایی پەیداكریە، ئەگەرێ ڤێ چەندێ ئەوە بێی كو ژ دەنگوباسان پشت راست ببن، ژبەركو دا بلەز بگەهینن تووشی ڤان ئاریشان دبن، ب تایبەت ژی پێشلكاری ددەرحەقێ تاكە كەسی دا دهێتە كرن و هیڤی خوازم هەر پێشیلكاریەكا دژی مافێ رۆژنامەڤانێ هەرێما كوردستانێ بهێتە ئەنجامدان بەری بجیتە دادگەهێ كار ب یاسایا كارێ رۆژنامەڤانی بهێتە كرن و ئەو بەلانسا دناڤبەرا ژن و زلامێن رۆژنامەڤان دا بهێتە پاراستن كو پێدڤیە ژنێ ژی ئەو ماف هەبیت ببیتە رێڤەبەرا دەزگەهەكی راگەهاندنێ.
