پێدڤی بوو بەری دوو هەیڤان ئیراقێ پێداچوون د لیستا مووچەخۆران دا كربایە
هەولێر، قائید میرۆ
بسپۆرەكێ ئابوری ئاماژەكر، بەغدا ئینان و برنا ب هەرێما كوردستانێ دكەت و راستە داخوازا لیستا فەرمانبەرێن هەرێما كوردستانێ كارەكێ ئاسایە، بەلێ پێدڤی بوو ل سالا بۆری ئەو بابەتە هاتبانە چارەسەركرن و دبێژیت: پشكا هەرێما كوردستانێ دناڤا قانوونا بودجێ ئیراقێ دیارە، بەلێ ئەز یێ گەشبین نینم رەوشا دارایی یا ئەڤ سالە باشتر بیت و بەغدا ناخوازیت رەوشا فەرمانبەرێن هەرێمێ باشتر بیت.
پرۆفیسۆر خالد حەیدەر، بسپۆرێ ئابووری بۆ رۆژناما ئەڤرۆ دیار كر «وەكی دهێتە دیتن دهێتە چاڤەرێكرن رەوشا ئابوریا هەرێما كوردستانێ ئەڤ سالە خراپتر بیت ژ سالا بوری، چونكە بەغدا نەڤێت ب شێوەیەكێ ب ساناهی پارەی بدەتە هەرێما كوردستانێ بۆ بەلاڤكرنا مووچێ فەرمانبەران، لەوڕا ژی هەتا نوكە پارەیێ مووچێ فەرمانبەرێن هەرێما كوردستانێ ژ ناكۆكیێن سیاسی نەهاتیە جوداكرن.
زێدەتر گۆت: یا خویایە ژلایێ بەغداڤە ئنیەت یا باش نینە ، ژبەركو ئەو بابەتێ نوكە بەغدا داخواز دكەت لیستا مووچێ فەرمانبەرێن هەرێما كوردستانێ رادەستی بەغدا بكەن، پێدڤی بوو سالا بۆری ئەو بابەتە بهێتە چارەسەركرن و دەمێ پەتڕۆلا هەرێما كوردستانێ هاتیە راگرتن بەغدا داخوازا لیستێن فەرمانبەران كربایە، چونكو مووچێ سێ هەیڤێن فەرمانبەرێن هەرێما كوردستانێ ژناڤچوویە و ئەز وەسا دبینم حوكمەتا فیدڕال ب شێوەیەكی ب ساناهی سەرەدەریێ دگەل فەرمانبەرێن هەرێمێ ناكەت، هەتا رادەیەكی بەغدا دخوازیت رەوشا هەرێما كوردستانێ ژلایێ دارایی لاواز بكەت.
پرۆفیسۆر خالد حەیدەر، بسپۆرێ ئابووری ئاشكرا كر، گیرۆكرنا پارێ هەیڤانە ژی بەلگەیە بۆ ڤێ چەندێ بەغدا دێ ئاستەنگا بۆ فەرمانبەرێن هەرێما كوردستانێ چێكەت، دەمێ قانوونا بودجێ سێ سالان هاتیە پەسەندكرن، پشكا هەرێما كوردستانێ هاتیە دیاركرن و پێدڤی بوو بەغدا هەیڤانە كوژمەكێ پارەی بدەتە هەرێما كوردستانێ هەتا وی دەمێ پشكا هەرێمێ بهێتە ڤاڤارتن دناڤا قانوونا بودجەی، چونكە وی دەمی دێ دیاربیت چەند پارە دایە هەرێما كوردستانێ.
ڤی بسپۆرێ ئابوری ئاماژەكر» رادەستكرنا لیستا مووچێ فەرمانبەران كارەكێ ئاسایە ب دیتنا من، بەلێ وەك بەهانە بكار دئینن بۆ گیرۆكرنا مووچێ فەرمانبەران، هەیڤەكە بەغدا پێداچوونێ د لیستا مووچێ فەرمانبەران دكەت و دبێژیت بندیوار تێدانە، ئەڤە ل عێراقێ ژی ناڤێن وەهمی و زێدە دناڤا لیستا مووچەی هەنە، ل سالا بۆری هەیڤانە 700 ملیار ژلایێ بەغدا رادەستی هەرێما كوردستانێ دهاتنەكرن، نوكە ئەو پارە ژی كێم كریە و بوویە 618 ملیار دینار، ئەڤە ژی هەموو نیشانێن ڤێ چەندێ نە بەغدا ناخوازیت رەوشا دارایی ل هەرێما كوردستانێ باشتر بیت، ب تایبەتی رەوشا فەرمانبەران ئاسایی ببیت.
پرۆفیسۆر خالد حەیدەر گۆت ژی» من باوەری نینە بەغدا پێنگاڤان بەرەڤ باشتركرنا رەوشا دارایی ل هەرێما كوردستانێ ب هاڤێژیت، ب بەلگەڤە یا دیارە هەردو حوكمەت گەهشتینە رێكەفتنێ بۆ ئاساییكرنا رەوشێ، بەلێ بلا چاڤەرێ راستڤەكرنا قانوونا بودجێ عێراقێ بكەین یا كو بڕیارە نێزیك بهێتە راستڤەكرن، ئەز هەموو جارا یێ گەشبینم، لێ ڤێ جارێ یێ گەشبین نینم بۆ باشتركرنا رەوشا دارایا هەرێما كوردستانێ، راستە حوكمەتا ئیراقێ سۆزدایە بابەتێ مووچێ فەرمانبەرێن هەرێما كوردستانێ چارەسەربكەت، بەلێ دیار نینە دێ هەتا چەند یا پێگیربیت ب سۆزێن خوە.
