پێدڤی یه رێگری ل جنێوسایدا ژینگه‌هێ و تیرۆركرنا دارستانێ بگرین
تیرۆرێن مرۆڤان د مرۆڤكوژن خانێین وه‌لاتیان و جهێ یێن پیرۆزی و ئاینی و ئۆلی و شوونه‌وارێن كه‌ڤن تێكده‌ن و ئابووریا وه‌لاتێ ژی ژناڤدبه‌ن ل هه‌ر جهه‌ك ده‌ستێ تیرۆرێ بگه‌هیتێ ژ لایێ شوونواری و ئابووری و مرۆڤی وره‌شه‌نبیری و سایكۆلۆژی ڤه وێران دبیت و ره‌نگێ ژیانێ لێ نامینیت، چونكی تێگه‌هشتن و چه‌مكێ تیرۆرێ ئه‌وه كو هه‌می وان ئالاڤ و تایبه‌تمه‌ندیێن كو گرێدای ژیان و ژیار و زانینا مرۆڤ بن ژناڤ ببه‌ت ل ڤێرێ دا پرسا مه ل سه‌ر تیرۆرێن كوشتنا مرۆڤ و هه‌ڕفاندنا شارستانیه‌تا مرۆڤی نینه ئه‌م به‌حسا جنێۆسایدا ژینگه‌هێ و تیرۆركرنا دارستان و گیانه‌وه‌رێن كویڤی دكه‌ین و هنده‌ك ل سه‌ر رادوه‌ستین ب نه‌رینا مه جنێۆسایدا ژینگه‌هێ و تیرۆركرنا دارستان و گیانه‌وه‌رێن كویڤی نه كێمتره ژ یێن مرۆڤی چونكی ئه‌ڤه ژی ژناڤبرنا توخمه‌كێ یه ژ توخمان, چیاێین مه ژی ده‌وله‌مه‌ندن ب ئاژه‌لێن كویڤی یێن جۆر ب جۆر و دارستانێن جوان و ژینگه‌هه‌كا پاقژ ئه‌ڤه ژی بۆ وێ چه‌ندێ زڤریت كو به‌ری نوكه دارستانێن مه ژ لایێ پێشمه‌رگێن دارستانان ڤه دهاتنه پاراستن، به‌لێ پشتی چه‌كدارێن داعش ل سالا بووری پارێزگه‌ها نه‌ینه‌وا كونترۆل كرین و پشكه‌ك ژ ئاخا كوردستانێ ژی ئێخستنه بن ده‌ستێ خوه پێشمه‌رگێن مه یێن دارستانان وه‌كی هه‌می هێزێن دی چوونه به‌رۆكێن شه‌ڕی بۆ پاراستنا ئاخا كوردستانێ ل چه‌كدارێن داعش ل وی ده‌می هه‌تا نوكه چیا و دارستانێن مه بێ زێره‌ڤانن چونكی پۆلیس و لایه‌نێن دی یێن ئیمناهی وه‌ك پێدڤی نه‌شێن دارستان و ئاژه‌لێن كویڤی بپارێزن ژ به‌ر كو پاراستنا سه‌رومالێ وه‌لاتیان و جهێن كو شارستانی تێدایه ئه‌ركێ وان یێ سه‌ره‌كی یه ژ به‌ر هندێ دارستانا مه ل كوردستانێ مانه بێ خودان وه‌ك كه‌سه‌كێ ئێتیم و سێوی, دبینین هه‌نده كه‌سانێن نه خۆش ئه‌ڤ ڤالاتیه ب ده‌لیڤه و ده‌ستكه‌فته‌ك بخوه زانی یه كو به‌ری نوكه ژی كارێ وانا تێكدانا دارستان و ژناڤبرنا ئاژه‌لێن كویڤی بوویه، به‌لێ نها ئه‌ڤ ده‌لیڤه یاخوش بۆ وی چێ نه‌بوویه و نه‌هاتینه پیش ڤێجا وه‌ك كه‌سانێن مه‌نده‌هۆش ب وان چولان ڤه كه‌فتی یه ژ بۆ نێچیرێ و كوشتنا ئاژه‌لێن كویڤی برینا داروباران و پیسكرنا ژینگه‌ی, تێكدانا كانی و سه‌روچاڤێن ئاڤی تنێ بۆ بده‌ستڤه‌ئینانا مفایه‌كێ كێم و نه هه‌ژی دبیت ئه‌م بپرسین ئه‌رێ گه‌لۆ ئه‌و كه‌سێ كو ئاژه‌لێن كویڤی ب شێوه‌یه‌كی درندانه ژ ناڤدبه‌ت تێشكێ وی دهێلیته بێ خودان باشه ئه‌ڤه نه جۆره‌كه ژ جۆرێن كریارێن تیرۆرستی ل به‌رامبه‌ر گیانه‌وه‌ران ئه‌رێ تێكدانا كانی و سه‌روچاڤێن ئاڤی و برینا داروباران و ژناڤبرنا ئاژه‌لێن كویڤی پیسكرنا ئاڤ و هه‌وای نه جۆره‌كه ژ جنێوسایدان ل به‌رامبه‌ر ژینگه‌هێ ب گشتی, باشه مانه ب یاسایێ نێچیرێن ئاژه‌لێن كویڤی و بڕینا دارستانان هاتینه قه‌ده‌خه‌كرن بۆچی هه‌تا نوكه ئه‌م ل دووڤ یاسایێ ناچین؟ بۆچی ئه‌م یاسا ب دارێ زۆرێ ل سه‌ر خوه قه‌بوول دكه‌ین تنێ چاڤێ مه ل ڤالاتیه‌كه د ناڤ وه‌لاتی دا هه‌بیت كو تێدا پێشێلكاریان بكه‌ین, ل وه‌لاتێن پێشكه‌فتی ده‌مێ كو گیانه‌وه‌ره‌ك نه‌خۆش دكه‌ڤیت یان ئه‌گه‌رێ ژناڤچوونا وی توخمی ل رۆژه‌ڤێ هه‌بیت دبیته مانشێتێن میدیایێن وی وه‌لاتی گه‌له‌ك گرنكی پێ دهێته دان ژ لایێ راگه‌هاندن و نۆشداری ڤه به‌لێ مخابن ژینگه‌ه و دارستان و گیانه‌ورێن وه‌لاتێ من دبێ مرادن چونكی ده‌مێ گیانه‌وه‌ره‌كێ كویڤی نه‌خۆش ده‌كه‌ڤیت و شیانا رێڤه‌چوونێ نامینیت ئه‌ڤه دبیته خۆش ده‌ستكه‌فتی بۆ نێچیرڤانێن مه چونكی ب سه‌ناهی دشێن بخینه داڤێن خوه و بگرن و سه‌رژێكه‌ن ل ده‌مه‌كێ كو پۆلیس و ده‌زگه‌هێن ئیمناهی رێگری ل كه‌سێن یاسا شكێن دكه‌ن ل ده‌مێ كو نێچیرڤانیێ دكه‌ن، به‌لێ مخابن دبته شه‌ڕه ته‌قه د ناڤبه‌را وان دا و د ئه‌نجام كوشتی و بریندار د ناڤبه‌را وان دا په‌یدا دبیت ئه‌ڤ شه‌ڕه دبیته مانشێتێن میدیایێن مه پێدڤی یه د جڤاكێ مه دا كلتوورێ پاراستنا دارستان و ژینگه‌هێ بینه ئاڤاكرن ئه پێنگاڤه ژی دبیت ل سیسته‌مێ په‌روه‌ردێ ده‌ست پێبكه‌ت كو ببته پرۆگرامه‌كێ خواندنێ بشێت تاكه‌ك نوو دروست بكه‌ت خه‌ما وی ژینگه‌ه و دارستانێن وه‌لاتێ خوه بیت.
