پێرابوونێن سلامه‌تی و پاقژیێ ل ده‌مێ ب كارئینانا ته‌والێتێن گشتی
ئه‌ڤرۆ، به‌رپه‌رێ ساخله‌میێ:
ل هه‌موو ساله‌كێ رۆژا 19ێ نوڤه‌مبه‌رێ ( رۆژا جیهانیا پاقژ راگرتنا ته‌والێتانه)، رێكخراوا یونسێف گرنگیه‌كا تایبه‌ت ب ڤێ چرۆژێ دده‌ت، چونكو ته‌والێتێن گشتی ژینگه‌هه‌كا باشن بو وه‌رارا میكروبان، ژبه‌ركو به‌رده‌وام و وه‌كو پێدڤی ناهێنه پاقژكرن داكو د ئێمن بن بو ب كارئینانێ، مه‌ترسی ل ڤێرێ ده‌ستپێ دكه‌ت و گه‌له‌ك نه‌خۆشی ب رێیا ته‌والێتان دهێنه ڤه‌گوهاستن، یان ب رێیا ده‌ستكێن ده‌رگه‌هان و دوكمێن پالدانا ئاڤێ( سیفون) ئه‌وژی ژ ئه‌نجامێ وێ چه‌ندێ دهێن كو گه‌له‌ك كه‌س ب كاردئینن، چونكو و زارۆیێن ته دێ پێدڤی ب كارئینانێ بن ب تایبه‌ت ل جهێن كاری، خارنگه‌هان، كافێیان، مولا و جهێن یاریێن زارۆیان، له‌ورا پێدڤیه بنه‌مایێن ئێمناهی و سلامه‌تیا وان بزانی و بزانی دێ چاوا خوه ژ زیانێن وێ پارێزی.
بنه‌مایێن پاقژیێ ل ته‌والێتێن گشتی
ئه‌ڤ بنه‌مایه بو ته‌مالێتێن گشتی دهێنه ب كارئینان، گه‌له‌ك ژ خه‌لكی پێگیریێ پێ ناكه‌ن، به‌لێ گه‌له‌ك دگرنگن، بو كه‌سێ پشتی ته دچیته ته‌والێتێ داكو ژ زیانێن وێ بهێته پاراستن، ئه‌وژی:
- ده‌رگه‌هی راسته‌وخو ڤه‌نه‌كه، پشتراست به كه‌س د ته‌والێتێ دا نینه، ب تایبه‌ت زارۆ كو ژبیردكه‌ن ده‌رگه‌هی بگرن.
- هه‌رده‌م دگه‌ل خوه وان كاغه‌زا ببه یێن ته‌والێتێ دادپوشن كو ل ده‌رمانخانا و جهێن بازرگانی هه‌نه، د سڤكن و دبچووكن و تو دشێی به‌رده‌وام دگه‌ل ته‌بن و هه‌رده‌مێ پێدڤی بوویێ ب كاربینی ل ته‌والێتێن گشتی.
- بلا هه‌رده‌م كلینیسێن ته‌ر دگه‌ل ته‌بن، كو كه‌رسته‌كێ تافیلكه‌ر دناڤدا هه‌یه بو پاقژكرنا ته‌والێتێ، تو دشێی بو پاقژكرنا ده‌ستكێن ده‌رگه‌هێ ته‌والێتێ و دوكمێن پالدانا ئاڤێ ( سیفون) ب كاربینی.
- ده‌مێ تو ژ ده‌ستئاڤێ ب دووماهی دهێی، ده‌ستێن خوه ب ئاڤێ و سابوونێ باش بشوو، داكو چ میكروب پێڤه نه‌مبنن و نه‌خوشیا نه‌ڤه‌گوهێزیه زارۆكێن خوه ب رێیا ده‌ستان.
- جێلیا تافیلكه‌ر یا ده‌ستان ب كاربینه، هه‌كه سابوون ل توالێتێ نه‌بوو، ئه‌و جێلی ژی نوكه ل پتریا ماركێتان هه‌یه، هه‌كه ب ده‌ست ته نه‌كه‌فت تو دشێی كلینسێن ته‌ر ب كاربینی كو باشتره به‌رده‌وام دگه‌ل ته هه‌بن.
- سه‌حكه هه‌موو ته‌والێتان و یا ژ هه‌موویان پاقژتر ب هه‌لبژێره، مه‌رج نینه یا ژ هه‌موویان دوورتر ژ هه‌موویان پاقژتربیت.
- بلا هه‌رده‌م وه‌كو عه‌لاگه‌كی دناڤ جانتا ته دا هه‌بیتن، ده‌مێ تو حه‌فازێن زارۆیێ خوه دگوهوری ب كاربینه، هه‌روه‌سا حه‌فازه و كلینس و كرێمه‌كێ هه‌ودانا ژی بلا دگه‌ل ته‌بن.
داكو نه‌خوشیان ژ ته‌والێتێن گشتی نه‌ڤه‌گوهێزیه ناڤ مالا خوه، ڤان رێنما ب كاربینه:
- هشككه‌رێ ده‌ستا ل ته‌والێتێن گشتی ب كارنه‌ئینه، چونكو ئه‌و پتر میكروبا به‌لاف دكه‌ت، باشتره ل جهێ وان كلینس بو زوهاكرنا ده‌ستان بهێنه ب كارئینان.
- به‌ری تو ده‌ستێ خوه بكه‌یه ده‌ستكێن ده‌رگه‌ها و سلیفونێ ته‌والێتێ، ب كلینسه‌كێ پاقژ بكه و بهاڤێژه دناڤ سه‌به‌تا گلێشی دا.
- ب موبایلێ نه‌ئاخڤه، جهه‌كێ دروست نینه بو وێ چه‌ندێ، موبایل دێ گه‌له‌ك میكرۆبان ژ ته‌والێتێ ڤه‌گوهێزیته دناڤ مالا ته‌دا.
- چانته و هه‌ر تشته‌كی نه‌دانه ل سه‌ر ئه‌ردی دناڤ ته‌والێتێ دا، چونكو دێ میكرۆب پێڤه مینن.
