پێزانينێن نوو ل سه‌ر ره‌وشا ساخله‌ميا جه‌ميل زكرى
ئه‌ڤرۆ، شاكر ئه‌تروشی:
هونه‌رمه‌ند جه‌میل زكری، كو ئه‌ڤه چه‌ند رۆژه ل باژێرێ ئۆرمیێ ل بن چاڤدێریا نۆشداران دایه، د په‌یوه‌ندیه‌كا ته‌له‌فۆنی دا بۆ ئه‌ڤرۆ دیاركر، پشتی ئه‌و گه‌هشتیه وه‌لاتێ ئیرانێ تبله‌كا دی ژی ژ پیێ وی یێ راستێ هاتیه ژێڤه‌كرن، لێ نوكه ئه‌و هه‌ست پێ دكه‌ت ره‌وشا وی یا باشه و سوبه‌هی چارشه‌مبێ جاره‌كا دی دێ نۆشدارێ خوه بینیت و هه‌كه دیت ره‌وشا وی باشتره دێ چاره‌سه‌ریێ بۆ نڤیسیت پاشی دێ هێته مالا خوه ل دهۆكێ.
جه‌میل گۆت: به‌ری دو حه‌فتیان ئه‌ز هاتمه ئۆرمیێ، ل ڤێره تبله‌كا دی ژی ژپیێ من ڤه‌كرن، یا قه‌لیچێ ژی ل دهۆكێ ژیڤه‌كربوون، ئانكو ئه‌ڤه بوونه دو تبل، سه‌باره‌ت ره‌وشا من ژی ئه‌ز هه‌ست پێ دكه‌م هه‌تا راده‌كی یێ باشتر لێ دهێم، به‌لێ سوبه‌هی چارشه‌مبێ دێ جاره‌كا دی سه‌ره‌دانا نۆشدارێ خوه كه‌م و هه‌كه دیت باشتره دێ من فرێكه‌ته مال.
ژلایێ خوه‌ڤه خانم (ئه‌ڤین حسێن) سه‌رۆكا سه‌ندیكا هونه‌رمه‌ندێن كوردستانێ/لقێ دهۆك بۆ ئه‌ڤرۆ پشتراستكر، كو ب بزاڤێن وان رێزدار نێچیرڤان بارزانی سه‌رۆكێ هه‌رێما كوردستانێ رازی بوویه هه‌موو مه‌زاختێن هونه‌رمه‌ند جه‌میل زكری ب ستۆیێ خوه‌ڤه بگرن.
