پێشانگەهەكا فۆتۆگرافی دێ ل بەغدا ڤەكەت
زنار تۆڤی:
وێنەگر و دەرهێنەر (ئاسۆ كەریم) د دیدارەكێ دا بۆ رۆژناما ئەڤرۆ گۆت: ل سالا 2003 من دەست ب كارێ وێنەگرتنێ كریە، ل دەستپێكێ من ل ستۆدیۆیان كاردكر، پاشی مە رێكخراوا كوردستان فۆتۆ دامەزراند و هەتا نوكە د بەردەوامین، بەلێ هەكە وێنەگری بڤێت پێنگاڤێت باش بهاڤێژیت، دڤێت د بیاڤێ فلمسازییێ دا كار بكەت و ل سالا 2022 من د بیاڤێ فلمێن دیكیۆمێنتاری كاركریە، ل گەل هندێ من كارێ دەرهێنانێ بۆ پێنج فلمان كریە، كو چار ژ وان فلمێن دیكیۆمێنتاری بوون و ئێك ژی كورتە فلم بوو.
ناڤهاتی گۆت: بەری دەمەكی من فلمێ دكیۆمێنتاری شاهژنا كوردستانێ چێكریە، ئەو فلمە پێك دهێت ژ كۆمەكا روودانان، و د كارێ وێنەگرییێ دا من گەلەك دەستكەفت ب دەستڤە ئیناینە، هەروەسا من دو پەرتووك ل سەر كارێ وێنەگرییێ بەلاڤكرینە، ئێك ژ وانا ب ناڤێ فەرهەنگا ئاسۆ یا فۆتۆگرافی، یا دویێ ژی ب ناڤێ كاندید، رێیا نوو بۆ وێنەگرتنا سەر جادێ، من چەندین پەرتووكێن دی هەنە دێ وان ژی چاپكەم، هەروەسا من چەندین پێشانگەهێن تایبەت یێن فۆتۆگرافی ل كوردستانێ و ل دەرڤەی كوردستانێ ژی ڤەكرینە، نوكە مژوولی ڤەكرنا پێشانگەهەكێ مە ل بەغدا.
