پێشانگەھێن ترۆمبێلان یێ بەر ب داخستنێ دچن
ئه‌ڤرۆ نيوز:
بازارێ کرین و فرۆتنا ترۆمبێلان ل دھۆکێ د ھەیڤا رەمەزانا پیرۆز دا ب شەڤ دھێتە کرن و ژ رەمەزانا پار و ھەتا رەمەزانا ئەڤ سالە نەبوونا بازارێ ترومبێلان خودانێن پێشانەگەھا بێزار کرینە و ناچار بووینە دەرگەھێن پێشانگەھێن خوە بگرن.
سەردار دوسکی خودانێ کۆمپانیا کادێلا یا بازرگانیا ترومبێلان بۆ ئەڤرۆ دیار کر، رۆژ بۆ رۆژێ بازارێ کرین و فرۆتنا ترومبێلان ل پێشانگەھێن دھۆکێ بێ سەروبەردبیت، ھەر سال د ھەیڤا رەمەزانا پیرۆز دا بازارێ مە ب شەڤ دھێتە کرن، بەلێ ئەڤ سالە ھەر ب ئێکجاری چو جۆرەکێ ترۆمبێلێ ناھێتە فرۆتن و ب تنێ ئەم دھێین فێقی و چایێ ڤەدخوین و پاش دچینە مال و ل ھەموو رەمەزانان بازار گەلەک یێ ب ھێز بوو و ئەم ڤێرا نەدگەھشتین، لێ ئەڤە ژ رەمەزانا پار وەرە ھەر بازار نەمایە.
دلگەش سەعدولا ژ پێشانگەھا سەفین یا ترومبێلان گۆت: ل پێشانگەھا نوکە ب تنێ بایع شارینە دھێن و ئەو ژی ھەر رۆژ دەست ژ پێیان درێژتر دچنە مال و دیار کر کو د ھەیڤا رەمەزانێ دا خۆشیەک پەیدادبوو دەمێ بازار پشتی فتارێ ب شەڤ دھاتە کرن، لێ ئەڤ رەمەزانە ئەو ژی نەمایە رەوشا بازارێ ترۆمبێلان گەلەک لاواز بوویە.
محەمەد عەبدولا خودانێ پێشانگەھا وەلات یا کرین و فروتنا ترومبێلان دیار کر، ڤان شەڤێن رەمەزانێ ھەر چو بازارێ ترومبێلان ناھێتە کرن و ئەڤە پتر ژ سالەکێ یە بازار لاواز بووی و گەلەک کارتێکرن کرنە سەر رەوشا ترومبێلان و ب تنێ نوکە ھاتنا بایع شاریا بۆراندنا شەڤا یە ل پێشانگەھان و گۆت: نوکە گەلەک کەسان ژ بەر نەبوونا بازاری و ھاتنە خوارا بھایێ ترۆمبێلان کارێ خوە ب جە ھێلایە و ئێدی نەشێن خێزانا خوە د ڤی کەرتی دا ب خودان بکەن و گەلەک زەرەرمەند بووینە و کارێ خوە ب جە ھێلایە و کارەکێ دی بۆ خوە دکەن.
