پێشبینیا بڕیارێن توند دژی چەند یانەیێن پارێزگەهێ دهێتە كرن
دهێتە چاڤەڕێ كرن ئەڤرۆ ئێكەتیا تەپا پێی یا كوردستانێ كۆمبوونا خوە یا ئاسایی ل هەولێرا پایتەخت ئەنجامبدەت ژبۆ گەنگەشێ ل سەر هندەك بابەتان و دەركرنا چەند بڕیار و راسپاردەیێن نوو.
د داخویانیەكێ دا ئازاد ئەحمەد ئەندامێ ئێكەتیا تە پا پێی بۆ رۆژناما ئەڤرۆ گۆت: كۆمبوونا ئەڤرۆ دێ ب چەندین تەوەر و بابەتێن جودا ڤە هێتە بەحسكرن، ژ وانا وەرگرتنا راپۆرتا لژنەیا دووڤچوونا روودانێن یاریا دووماهیا كۆپا كوردستانێ د ناڤبەرا یانەیێن دهۆك و پێشمەرگەیا هەولێر ئەوا ل21ێ مەها بۆری ل یاریگەها شەهید فرانسۆ حەریری هاتیە كرن، دێ راپۆرت ب تەسەل هێتە دیار كرن و هەمی ئەوا خالێن بووینە ئەگەرێ ئالۆزیا هێنە دیاركرن پشتی وەرگرتنا پێزانیان و بەلگەیێن پێدڤی، دێ گەنگەشە و پێرابوون ل دووڤ یاسایێ هێنە دیاركرن و دبیت چەند بڕیار ژی بهێنە دەركرن.
ژلایەكێ دووڤە ناڤهاتی گوت: هەر د كۆمبوونا ئەڤرۆ دا دێ بابەتێ دووڤچوونا سكالایا یانەیا بەردەرەش هێتە كرن، ئەوا دیار كر د یاریا واندا یا حەفتیا بۆری ژ هەڤڕكیێن گەڕا چارێ یا كۆما پارێزگەها دهۆكێ بۆ خولا پلا دو بەرانبەر یانەیا شێلادزێ كو تێدا یانەیا ناڤهاتی سەرپێچییا رێنمایێن ئینانا یاریزانێن بیانی كریە، دڤیابا سێ یاریزانێن بیانی یاری كربا لێ ئەوان ب چار یاریزانێن بیانی پشكداری یاریا وان بوویە، ئەڤ سكالایە دێ ئەڤرۆ هێتە بەحسكرن ل دووڤ یاسا و رێنمایان سەرەدەری هێتە كرن كو هەكە ئەڤچەندە دروست دەركەفت رێنما ب خوسارەتیا تیما سەرپێچی كری دێ هێتە هژمارتن ب سێ گۆلان بێی بەرانبەر.
ئەندامێ ئێكەتیا تەپا پێی ئەوچەندە ژی دیاركر هندەك بابەتێن گرێدایی ب كارێن دادڤانان د خولا پلا ئێك هێتە بەحسكرن تایبەت ئەوێن تووشی خەلەتییان بوین و دیسان چەند تەوەرێن دی هەنە وەكو بەرنامە و پلان دێ هێنە گەنگەشەكرن دگەل دا بڕیار و راسپاردە ژی هەبن.
