پێشبینی و هۆشداریێن بارزانی. . مه‌ترسیا پارت و لایه‌نێن كوردستانی!
ل نیڤا هه‌یڤا نیسانێ سه‌رۆك بارزانی په‌یامه‌كا هۆشداریێ ئاراسته‌ی په‌رله‌مان و حوكمه‌ت و لایه‌نێن سیاسی و جه‌ماوه‌رێ كوردستانێ كر و تێدا مه‌ترسیا خوه ژ شه‌ڕێ ناڤخوه و پیلانگێریێ دیاركر و داخوازا ئێكرێزی و ته‌ڤایێ و ڕاوستان ل هه‌مبه‌ر پیلان و پێلانگێران كر. لێ مخابن ئه‌ڤ چه‌نده وه‌كو هه‌ر جار بۆ بابه‌تێن گه‌رمێن رۆژنامه و میدیا و مێزگه‌رد و هه‌تا سیاسه‌تڤان ژی ل سه‌ر ڤێ چه‌ندێ هاتینه ده‌نگ, هه‌ر ئێكی وه‌كو وی ڤیایی په‌یاما سه‌رۆكی ل قه‌له‌مدا و پڕانیا وان كه‌نالێن خه‌لك مێهڤانكرین بێهنا بزۆتپێشكرنێ ژێ دهات, پرانیا وان بزاڤ دكر وێ په‌یامێ بێ نرخ و بێ مفا ل قه‌له‌م بده‌ن كو بۆ رایا گشتی بده‌نه خوه‌یاكرن, كو ئه‌ڤه پیلانه‌كه هاتیه دارێژتن و ب تنێ بۆ هندێ یه كو ده‌مێ سه‌رۆكاتیا سه‌رۆكێ هه‌رێمێ بهێته درێژكرن.
لێ كی دزانیت بۆچی حزب و لایه‌ن و ئه‌و كه‌ساتیێن دژایه‌تیا ڤێ په‌یامێ دكه‌ن دترسن, هه‌كه وان بخوه تشته‌ك ل جه‌م نه‌بیت یان ئه‌و بخوه هه‌لگرێن وێ چه‌ندێ نه‌بن یا سه‌رۆكی به‌حس ژێ كری, چونكو هه‌ر لایه‌ن یان مرۆڤێ نه‌ته‌وه‌پارێز بیت و چ تشت ژ ڤانێن هاتینه به‌حسكرن ل جه‌م نه‌بن, بۆچی دێ ترسیت یان بزاڤا هندێ دكه‌ت ئه‌و په‌یام سه‌رنه‌گریت؟! ژ لایه‌كێ دی ڤه په‌یاما سه‌رۆك بارزانی, وه‌ك هشیاركرنه‌كێ یه بۆ هه‌می خه‌لكێ كوردستانێ, واته چ لایه‌ن و كه‌س پێ تاوانبار نه‌كرینه و ناڤێ كه‌سێ نه‌ئینایه, ئه‌رێ ئه‌ڤ هه‌لا هه‌لایه و مانشێتێن په‌حن بۆ چنه؟!, ماده‌م ئه‌م هه‌می ئه‌و بهێن خوه ب نه‌ته‌وه‌پارێز و خودانێن ڤی وه‌لاتێ بزانین و مه هه‌میان ئاسایشا وه‌لاتێ خوه دڤێت و ئه‌م هه‌می خوه وه‌كو پارێزڤانه‌كی بدانین, بۆچی دێ ژ ڤێ په‌یامێ ترسین یان ژی دێ دژی وێ په‌یامێ كاركه‌ین؟!. هه‌كه سه‌رۆك بارزانی, گومان ژ تشته‌كی نه‌كربایه و هنده‌ك پێشهات و روودانێن ل ده‌ڤه‌رێ په‌یدا دبن نه‌خواندبانه و د مێشكێ خوه دا شرۆڤه نه‌كربانه, كو ئه‌و پێشهات و روودان دبیت ببنه جهێ مه‌ترسیێ بۆ خه‌لكێ كوردستانێ و ئاسایشا نه‌ته‌وه‌یی یا كوردستانێ, ئه‌ز باوه‌رم په‌یامه‌كا هۆشداریێ ب ڤی ره‌نگی به‌لاڤ نه‌دكر و ل ده‌مه‌كێ نێزیك پێشه‌كیێن وێ مه‌ترسیێ دێ دیار بن وه‌كو وان هه‌می پێشبینێن ژلایێ بارزانی ڤه هاتنیه كرن, كو بۆ هه‌می لایه‌ن و كه‌سان درۆن و ئاشكرانه. كه‌س وه‌كو سه‌رۆكی, روودانێن ده‌ڤه‌رێ ناخوونیت و شرۆڤه ناكه‌ت و دزانیت هه‌می روودان و پێشهاتێن ئه‌ڤرۆ ل كوردستانێ رووداین ودێ رووده‌ن, ژ لایێ گه‌له‌ك لایه‌ن و پارتان ڤه (مزایه‌دێن سیاسی) پێ دهێنه‌كرن و نه خه‌ما وانه (كاره‌ساته‌ك) رووبده‌ت و ته‌ر و هشك پێكڤه بسۆژن, ب تنێ ئه‌و مه‌ره‌ما خوه جێبجێ بكه‌ن, له‌ورا بزاڤێ دكه‌ن هه‌ر روودانه‌كێ ژ قه‌بارێ وێ ده‌ربێخن و مه‌زن بكه‌ن بۆ به‌رژه‌وه‌ندیا خوه یا تایبه‌ت.
ئه‌ڤجا هند دێ په‌یاما سه‌رۆك بارزانی, ب ده‌مدرێژكرنا سه‌رۆكاتیێ ڤه گرێده‌ن و هند دێ ب شنگالی, و هند ب وارێ ناڤخوه ڤه گرێدن.. . هتد.
سه‌رۆك بارزانی, چ پێویستی ب سه‌رۆكاتیێ نینه هه‌تا, په‌یامه‌كا ب ڤی ره‌نگی به‌لاڤ بكه‌ت, چونكو خه‌بات و دیرۆكا سه‌رۆك بارزانی بۆ هه‌می لایه‌ن و كوردستانیان و جیهانێ یا دیار و ئاشكرایه, ئه‌م هه‌می دزانین ئه‌ڤ په‌یامه چ تشته‌كی ناگوهۆریت ده‌رباره‌ی سه‌رۆكاتیێ, دیسا چ گرێدان ب شنگالێ یان هنده‌ك كێشێن لاوه‌كی ڤه نینه, به‌لكو ئه‌ڤه مه‌ترسیه‌كا راسته‌قینه‌یه, مه‌ترسیا ژناڤچوونا ده‌ستكه‌فتێن هه‌رێما كوردستانێ و ناڤوده‌نگیا وێ یه, بتنێ سه‌رۆك ژ ڤێ چه‌ندێ دترسیت و ئه‌ڤه بوویه جهێ مه‌ترسیا وی, له‌ورا ئه‌ڤ هۆشداریه به‌لاڤكریه و ئه‌م هشیاركرینه, دڤێت هه‌ر ئێك ژمه ژ لایێ خوه پێكریێ پێ بكه‌ت,وهه‌ر ده‌م ئه‌م دهشیار و دئاماده‌باشیێ دابین, چونكو نه‌یار و دوژمنێن كوردستانێ و گه‌لێ كورد دزۆرن و هه‌می ل ده‌رفه‌تێ دگه‌رێن داكو دربێ خوه داوه‌شینته كوردستانێ.
