پێشمه‌رگێ دێرین (ملا یوسف كرێت یوسف سلێڤانه‌ی) وه‌غه‌ر كر
ئه‌ڤرۆ:
پێشمه‌رگێ دێرین و هه‌ردو شۆڕه‌شێن ئیلۆن و گولانێ (ملا یوسف كرێت یوسف سلێڤانه‌ی ـ پێچه‌كی) برایێ شه‌هید (مسته‌فا كرێت) و بابێ شه‌هید (وه‌لات یوسف كرێت) وه‌غه‌را دووماهیی َكر.
پێشمه‌رگێ قه‌هره‌مان (ملا یوسف كرێت یوسف سلێڤانه‌ی) ئیك ژ قه‌هره‌مانێن ده‌ڤه‌ڕا سلێڤانه‌یابوو، ل سالا ١٩٣٨ ل گوندێ پیچه‌كێ ل ده‌شتا سلێڤانه‌یا ژ دایكبوویه، ل گه‌ل هلبوونا چریسكا شۆڕه‌شا ئیلۆنێ ل سالا ١٩٦٠ په‌یوه‌ندی ب شۆڕه‌شێ كر، ده‌مێ مامۆستا (محه‌مه‌د عه‌لی خواجه) و (ملا محه‌مه‌د باتێلی سلێڤانه‌ی) هاتین ئه‌و ژی دگه‌ل وان دا پشكداری د خولا كادران دا ل (گلاله) كر، د ژیانا خوه دا گه‌له‌ك به‌رپرسیاره‌تی وه‌رگرتینه، مینا: بوویه به‌ڕپرسێ ده‌ڤه‌ڕا سلێڤانه‌یا و كارێ ڕێكخستنێ دكر، د هه‌مان ده‌م دا بوویه كادرێ رێكخراوا (ئازادی) هه‌تا (پێشابیرێ) و چه‌ندین ده‌ڤه‌رێن سندیان، دیسا بۆ (لژنا مه‌حلیا زاخۆ) هاته هه‌لبژارتن.
پێشمه‌رگێ ره‌حمه‌تی، كه‌سه‌كێ گه‌له‌ك دلسۆز وخه‌مخوڕێ وه‌لاتێ خوه بوو، ب فه‌ڕمانا لقێ ئێكێ پارتی (ملا یوسف كرێت سلێڤانه‌ی) دگه‌ل هێزه‌كا پێشمه‌ڕگه‌ی چوونه (قامشلۆ) و ڕوژهه‌لاتا كوردستانێ بۆ چه‌ندین خزمه‌تێن نهێنی، دیسا ره‌حمه‌تی پشكداری د شه‌ڕێ (عین زالا) و (به‌غلۆجی) دا كریه دژی لیوایا (یه‌رموك) یا هه‌ڤپشكا له‌شكرێ سووری و عیراقی و برینداربوویه، دیسا ره‌حمه‌تی دو جاران ژ لایێ رژێما به‌عس ڤه هاتیه گرتن.
