پێشمەرگەیێ شۆڕەشێن ئیلۆن و گولانێ مستەفا سەدیق هاریكی مالئاڤایی كر
مستەفا سەدیق پێشمەرگەیێ شۆڕەشا ئیلۆن و گولانێ و سەرهەلدانێ و كەسایەتیێ دەڤەرا ئامێدیێ و پارێزگەها دهۆكێ ژ ئەگەرێ نەخۆشیێ وەغەركر و ل گۆڕستانا گوندێ هاریكا د رێورەسمەكێ دا هاتە ڤەشارتن.
مستەفا سەدیق هاریكی ل سالا 1941ێ ل گوندێ هاریكا ل دەڤەرا زێبارێ یێ سەر ب ناوچەدارییا دێرەلۆكێ ڤە ژ دایكبوویە و هەر ل دەسپێكا شۆڕەشا ئیلۆنێ و ل سالا 1961 پەیوەندی ب شۆڕەشێ كریە، هەروسا د شۆڕەشا گۆلانێ دا ژی رۆلەكێ باش هەبوویە و هەتا سالا 1988 و ل سەردەمی ئەنفالێن رەش دەربەدەری توركیا و پاشی ئیرانێ دبیت و ل دەمێ سەرهەلدانێ ڤەدگەڕیتە ڤە باشوورێ كوردستانێ و پشكداریێ د سەرهەلدانێ دا دكەت، خودێ ژێ رازی چەندین پلە و پوست ل سەردەمێ پێشمەرگاتیێ وەرگرتینە، خودێ ژێ رازی خانەنشین بوویە و ل سەنتەرێ پارێزگەها دهۆكێ ئاكنجیبوو.
خودێ ژێ رازی مستەفا سەدیق پێشمەرگەیێ شۆڕەشا ئیلۆن و گولانێ ژ ئەگەرێ نەخۆشیێ ل رۆژا ئەینی 25/4/2025 ل نەخۆشانەیا دهوكێ مالئاڤایی كر و د هەمان رۆژ دا و ب بەرهەڤبوونا كەسوكار و دوست و هەڤال و خەلكێ دەڤەرێ، د رێورەسمەكی دا ل گۆڕستانا گوندێ هاریكا هاتە ڤەشارتن.
