پێشمەرگە بوو قارەمان و هەلوەستێ دهۆك و زاخۆ بۆ یاریا بهێت دێ ئێكلابیت
ئەڤرۆ
قەیس وەیس:
ل حەفتیا بۆری یاریێن گەڕا 27ێ و بەری دووماهیێ ژ هەڤڕكیێن خولا پلا نایابا كوردستانێ یا تەپا پێی هاتنە ئەنجامدان، پێشمەرگەیا هەولێر ناسناڤێ وەرزێ ئەڤ سالە مسۆگەر كر، یانەیێن دهۆك و زاخۆ ئێكلاكرنا مانا خوە د خولێ دا بۆ حەفتیا بهێت پاشئێخستن.
تیما دهۆك هیڤیێن مانا خوە د خولێ دا گەشتر لێكرن پشتی دگەل خودانێن ئەردی یانەیا برایەتی ب سێ گۆلان بەرانبەر دو گۆلان سەركەفتن ئینایی و جهێ خوە ل رێزا 13ێ ب32 خالان پاراست، ژبۆ مسۆگەركرنا مانا خوە و خوە دوركرن ژ یاریێن چارەنڤیس دگەل یانەیەكا پلا ئێك بتنێ پێدڤی ب ئێك خال هەیە، یاریا بهێت دگەل یانەیا سۆرانە ئەوا 39 خال كۆمكرین و رێزا سێیێ دهێت.
ژلایێ خوەڤە تیما زاخۆ ژی سەركەفتنەكا گرنگ ل سەر مێڤانا خوە هندرین ئینا ب گۆلەكێ بێ بەرانبەر، كوڕێن خابووری د مەترسیا داكەفتنێ دانە ئەوا ب29 خالان ل رێزا 15ێ و دووماهیێ دهێت، یاریا بهێت زاخۆ دێ ل سلێمانیێ بیتە مێڤانا یانەیا دەربەندیخان، ژبۆ سەركەفتنێ دڤێت هەمی بزاڤان بكەت پێخەمەت خۆ قۆرتالكرن ل سەر داكەفتنا ئێكسەر بۆ پلا ئێك.
هەلویستێ دهۆك و زاخۆ بۆ مانێ دێ چەوابیت؟
ل دووڤ رێزبەندیا خولێ هەلویستێ دهۆكێ ژ یێ زاخۆ باشترە ئەوا پێدڤی ب وەكهەڤیێ یە ژبۆ مسۆگەركرنا مانا خوە د خولێ دا و یاریا بهێت دناڤ ئەردێ وێ دایە وەكو پێشبینی دێ كۆمەكا باش یا یاریزانێن تیما خولا ئیراقێ یاریێ بۆ كەن، ژلایێ خوەڤە تیما زاخۆ ب هەر شێوەكێ پێدڤی ب سەركەفتنێ یە بەرانبەر دەربەندیخان و دێ چاڤ ل یاریا دهۆك و سۆران بیت، دلیستێ دا یانەیا چەمچەمال خودانا 31 خالایە رێزا 14ێ و بەری دووماهیێ دهێت و ئەوێ یاری نەماینە ئانكو حەفتیا بهێت یاریێ ناكەت، لەوما سەركەفتنا زاخۆ دێ ژ داكەفتنێ قۆرتالكەت، هەكە زاخۆ و دهۆك د یاریێن خوە دا بسەركەفتن تیما زاخۆ وەكو خودانا رێزا 14ێ دێ بەرانبەر تیما سێیێ یا پلا ئێك بیت ژبۆ پلێـتا نایاب.
