پێشمەرگە هۆكارێ سەرەكی یێ هەبوونا كوردستانێ یە
ئيحسان ئــامێدی
چ دەولەت چێنەبووینە بێی هەبوونا لەشكرەكێ رزگارخواز، هێزا هەر مللەتەك، دەولەتەك، كیانەكێ سیاسی و سەركردەیەكی ب هێزا وی یا لەشكری دهێتە پیڤان و هێزا لەشكری توخمێ ئێكلاكەرە د شەڕ و پێكدادانان دا.
پێشمەرگە ب هەمی پێكهاتە و ناڤێن خۆڤە لەشكرێ كوردستانێ یە، ئەو هێزا رزگاركەرا كوردستانێ. پێشمەرگە پێدڤیەكا نەتەوەیییا كورد و كوردستانێ یە، ئەوە ل بەر سینگا دوژمن و داگیركەران رادوەستیت و سەنگەرێن وان ب سەر سەرێن وان دا دئینیت و رادهێلیتێ و وەلاتی ژێ پاقژدكەت.
هەر كوردستانیەكێ ئازادی و سەرفرازی بڤێت دێ پێشمەرگاتیێ ب شاكارێ نەتەوەی و نیشتیمانی و جڤاكیێ كوردستانێ زانیت و دێ ئەركێ وی پیرۆز دانیت.
پێشمەرگە ئەو خەباتكەر و شۆرشگێرێ كوردە یێ ژ خۆڕایی خۆ بەخشیە گەل و وەلاتێ خۆ. پێشمەرگە ئەو كوردێ دلسۆزە یێ خەبات و تێكۆشینێ دكەت ژبوونا رزگاریا كوردستانێ. پێشمەرگە ئەو قەهرەمانە یێ بەرهەڤ رەنجێ بكێشیت و خوینا خۆ برێژیت و گیانێ خۆ پێشكێشی ئازادیا كوردستانێ بكەت.
پێشمەرگە ئەو كەسە یێ ل پێش مرنێ ڤە دچیت ژبوونا ئارمانجێن گەلێ كوردستانێ. ناڤێ پیرۆزێ پێشمەرگەی ل كۆمارا كوردستان ل مهابادێ هاتە دانان ل سەر وان شۆرەشگێرێن كوردستان رزگاردكر و دپاراست. پێشمەرگەیە ل دویڤ سیستەمەكێ لەشكری هاتیە رێكخستن و ئەرك و كارێن وی هاتینە دەستنیشانكرن. پێشمەرگە گرنگترین و كاریگەرترین هۆكارێ دابینكرنا ئەولەهییا نەتەوەیا كوردستانێ یە، ئەوە كوردستانێ رزگاردكەت و دپارێزیت. ژ بەر گرنگیا رۆلێ پێشمەرگەی ل هەرێما كوردستانێ وەزارەتەك بناڤێ وەزارەتا پێشمەرگەی دامەزراندی یە و ل دویڤ قانوونێ كاروبارێن وەزارەتێ و پێشمەرگەی هاتینە رێكخستن. پشتی رۆخاندنا رژێما دكتاتۆری و ئاڤاكرنا ئیراقا دیمۆكراتیا فیدرالیا دەستووری، هێزێن پێشمەرگەی د چارچووڤەیێ پیكهاتێن وەزارەتا بەرگریا ئیراقێ هاتنە جێگیركرن.
هەر ئێكێ دژاتیا هێزێێن پێشمەرگەی بكەت، دكەڤیتە د خانەیا دوژمن و داگیركەرێن كوردستانێ دا، ئەو دوژمنێن هەولددەن هۆكارێ سەرەكیێ رزگاركرن و پاراستنا كوردستانێ كو پێشمەرگەیە ژناڤببەن، دا كوردستانێ داگیركەنەڤە و گەلێ وێ ژی تەپەسەركەنەڤە!.
هەژیە بێژین خەباتا چەكداری یا شۆرش و بزاڤا رزگاریخوازا كوردستانێ ب هێزا پێشمەرگەی هاتیەكرن و هەر ئەو پێشمەرگە بوو كوردستان رزگاركری و پاراستی و دوژمن بزداندی و نەچاركری بهێتە گفتوگۆیان و چارەسەریێن ئاشتیانە و ل بەر رۆلێ قەهرەمانانە یێ پێشمەرگەی ل هەمی دانوستاندنان دا، دوژمنان ژ سەركردایەتیا كوردستانێ دخواست پێشمەرگە چەكێ خۆ دابنیت!، دا هۆكارێ هێزا شۆرشێ ژ دەستێن سەركردایەتیا كوردستانێ بینیتە دەرێ!.
ژبەر گرنگی و پیرۆزیا ئەركێ پێشمەرگەی؛ بارزانیێ نەمر د فەرمووت: (هندی چەكێ پێشمەرگەیاتیێ د دەستێن من دا بیت، ئەز خۆدانێ بریارا خۆ مە). و (من بریار دایە هەتا كوردستان رزگار نەبیت، تاخم و تفەنگا من لحێف و دۆشەكا من بن). و (هەتا دەستێن من تفەنگێ دگرن دێ بۆ ئازادیا كوردان تێكۆشم). و (حەتا ئەڤ تفەنگە د دەستێن من دا بیت، ئەز خۆدانێ خۆمە و زەلامێ كەسێ نینم). سەرۆك و رابەرێ كوردستانێ مسعود بارزانی دبێژیت: (ب سەرفرازی ڤە دبێژین بۆ من پیرۆزترین و بلندترین پلە و پایە پێشمەرگەیاتیە). هەروەسا دبێژیت (پێشمەرگە ژ دایكبوویێ خوین و خەبات و رۆندكێن گەلێ كوردستانێ یە، چەكێ پێشمەرگەی پارچە ئاسن و كۆگەهـ و ئامرازێ شەڕكرنێ نینە، چەكێ پێشمەرگەی دیرۆك و فیداكاری و كەرامەت بیروباوەرا وی یە، چەكێ پێشمەرگەی ئەو سۆز و پێگیربوونەیە كو هەردەم بۆ گەل و ئاخ و نیشتیمانێ وی یێ هەی).
هەروەسا د فەرموود: (دەمێ پۆل بریمەری حاكمێ ئەمریكی ل ئیراقێ هەولدا پێشمەرگەی ب رێزا میلیشیا دابنیت و حەل كەت، من گوتێ:
پێشمەرگە میلیشیات نینە، پێشمەرگە ب بریارەكێ دروست نەبوویە، حەتا ب بریارەكێ حەل ببیت، نە ب بریارا من و نە ب بریارا تە و نە ب بریارا هیچ كەسەكی، پێشمەرگە ب خوین و رۆندكێن مللەتەكی دروست بوویە، خەلكێ دی ب بریارەكێ دروست بووینە و دشێن ب بریارەكێ حەل ببن، كو بریمەری گۆتی ئەڤە بۆ من خەتا سۆرە، من بەرسڤ لێدا و گۆتێ ئەڤە بۆ من دەه جاران خەتا سۆرە و پێشمەرگە حەل نابیت. ئەڤە ئەز چوومە كوردستانێ زەلام بە وەرە پێشمەرگەی حەلكە باشە)!.
پێشمەرگە ژ سالا ٢٠٠٥ وەرە بوویە دامەزراوەكا دەستووری یا كارپێكری و ل ئاستێ دەولەتێ بودجە بۆ دهێتە تەرخانكرن.
ئەگەر مە بڤێت د مافێن خۆ یێن جێگیركری د دەستورێ ئیراقێ دا بزانی؛ن دی بینین د بڕگەیا (١) ژ بەندێ ١١٧ دا هاتیە: ئەڤ دەستزورە دانپێدانێ ب هەرێما كوردستانێ و دەستهەلاتداریێن وێ وەكو هەرێمەكا فیدرالی دكەت و د بەندێ ١٢٠ دا هاتیە هەرێم دێ ڕابیت ب دانانانا دەستوورەكی بۆ خۆ، و تێدا دەستنیشانكرنا هەیكەلیەت و دەستهەلات و ئەرك و میكانیزما كاركرنێ كەت.
و ل بڕگەیا ١ ژ بەندێ ١٢١ ێ دا هاتیە:
دەستهەلاتدارێن هەرێمێ ماف هەیە ب ئەركێن یاسادانانێ و جێبەجێكرنێ و دادوەریێ رابن.
و ل بڕگەیا ٥ ژ بەندێ ١٢١ ێ دا هاتیە:
ژ تایبەتمەندیێن حوكمەتا هەرێمێ یە ب هەر پێدڤیەكا كارگێریەكا هەرێمێ رابیت و ب تایبەتی ئاڤاكرن و رێكخستنا هێزێن ئاسایشا ناڤخۆیا هەرێمێ، وەكو پۆلیسان و ئاسایشێ و زێرەڤانێن هەرێمێ (پێشمەرگە).
و ل بەندێ ١٤١ دا هاتیە: ل هەرێما كوردستانێ كاری دێ ب وان یاسایان كەت یێن ژ سالا ١٩٩٢ وەرە دەرئیناین و هەمی بریار و گرێبەست دێ د كارپیكری بن.
ئەڤ خالێن دەستنیشانكری تێرا هندێ هەنە هەرێم وەكو كیانەكێ سەربەخۆ هەمی كاروبارین خۆ بریڤە ببەت و دامەزراوێن خۆ یێن تایبەت هەبن ژ وانا هێزا پێشمەرگەیە.
مللەتێ كوردستانی ب هێزا پیشمەرگەی و بزاڤا وێ یا سیاسی و ب خەبات و قوربانیدانا خۆ هەرێما كوردستانێ دامەزراندیە و فیدرالیەت راگەهاندیە و دەولەتا دیمۆكراتیا فیدرالیا دەستووری ئاڤاكریە و ماف و داخوازیێن خۆ د دەستوورێ دەولەتێ دا جێگیركرینە، ئێدی ئەركەكێ ئەخلاقی، جڤاك، نەتەوەیی و نیشتیمانی یە ڤان دەستكەفتیان بپارێزین و گەشەیێ پێ بكەین، و ب چ رەنگان و ل بن چ ناڤان نەهێلین ل پیرۆزیێن مللەتی و بتایبەتی ل پێشمەرگەی بهێتەدان. باش بزانین نەهیلانا پێشمەرگەی ژناڤبرنا كورد و كوردستانێ یە و ئەڤە وەكو سەرۆك بارزانی گۆتی بۆ مە دەه جاران هێلا سۆرە و ب چ رەنگان ناهیتە پەرژاندن!.
گەلێ كوردستانێ ب پێشمەرگەی سەرفرازە.. بژی پێشمەرگە.
