پێشنیاره‌ك بۆ رێڤه‌به‌ریا گشتی یا ره‌وشه‌نبیری و هونه‌ری/دهۆك
یا پێتڤی یه مه سه‌نته‌ره‌ك هه‌بیت چاره‌سه‌رییا زه‌ره‌رمه‌ندێن زارۆ و خێزانێن شه‌هیدا بكه‌ت, مه‌به‌ست چاره‌سه‌ریا ده‌روونی و دانان و چێكرنا پلانه‌كێ نوی بو ژیانا خێزانا شه‌هیدی. هه‌لبه‌ت مه ده‌زگه‌هێن هه‌ین كو یێ كاره‌كێ پیروز دكه‌ن دگه‌ل خێزانێن شه‌هیدا و دكاردانه هه‌رده‌م، لێ پێشنیارا من گرێدای هاریكاریا ئابووری و دراڤی نینه، به‌لكو پارێزه‌ری و به‌ره‌ڤانیا وانه. دانا پارچه‌كا ئه‌ردی یان كوژمه‌كێ پاره‌ی بێی راوێشكاری نابیته دووماهیك چاره‌سه‌ری بۆ مسوگه‌ركرنا ژیانا خێزانێن شه‌هیدا. هاریكاری بۆ دیتنا ژیانێ و به‌رده‌وامبوون دقوناغه‌كا نووی دا دخێزانێ دا پێتڤی دكه‌ت مه سه‌نته‌ره‌كێ ره‌وشه‌نبیری هه‌بیت كو گرێدای بسپورێن ده‌رونی بیت یان گرێدای ده‌زگه‌هه‌كێ ساخله‌میێ بیت.
دوڤچوون و رێ روونكرن بۆ ئه‌ندامێن خێزانا شه‌هیدی یا فه‌ره ژلایێ حكومه‌تێڤه هه‌بیت، نه‌بتنێ ژلایێ ئابووری ڤه ژ به‌ر كو وێرانییا ده‌روونیی ب پارا ده‌رمان نابیت د هزرا مندا ئه‌وه كۆ ئه‌ڤ سه‌نته‌ره نه‌بیته باره‌گایه‌كێ به‌لاڤكرنا هاریكاری و جل و به‌رگا و وێنا بكه‌ینه پسولله بۆ خزینێ بهنێرین یان بكه‌ینه ئه‌لبوما وێنا د فه‌یسبووكێ دا. دڤی سه‌نته‌ری دا پسپور هه‌بن د گه‌ل ئه‌ندامێن خێزانا شه‌هیدی پێكڤه روونن و باخڤن و گرێكێن ژیانا وان یا ئه‌ڤرۆ ڤه‌كه‌ن و بزاڤێ بكه‌ن روویێ تاری و نه‌خوه‌شیێ د مالێن واندا نه‌هێلن و جاره‌كا دی كه‌یفێ و روناهیێ ڤه‌گه‌رینه ناڤ مال و مه‌زه‌لكێن وان!
بلا كارمه‌ندێن سه‌نته‌ری ببنه هه‌ڤالێن ژیانێ بۆ وان، هاریكارێن خێزانێ بن د هه‌می كاروبارێن وان یێ پێتڤی دا. ئارمانج ژی ئه‌وه كو زارۆكێن شه‌هیدی لبن چاڤێن چاڤدێرا بن، كو تووشی ژیانه‌كا سه‌خت نه‌بن د قوتابخانێ دا، یان د كاری دا و دئارامیا ژیانا مالێ دا. هه‌ر چه‌نده جڤاكێ مه‌یێ ب دله كو چه‌نكێ دلوڤانیێ دده‌ته وان، لێ د هه‌مان ده‌مدا دلوڤانیا وان یا ده‌مكی یه. نه‌بوونا شه‌هیدی د مال دا ڤالاتیه‌كا مه‌زنه و ره‌نگه ببیته ترسه‌ك و سه‌همه‌كا مه‌زن بۆ زارۆكێن وی! دبیت ئه‌و ڤالا بوون كارتێكرنێ لسه‌ر ژیانا زارۆكی بكه‌ت و پاشڤه‌ببه‌ت، یان توشی ئێشێن خه‌مووكیێ بكه‌ت، له‌وما دڤێت ئه‌م بزاڤێ بكه‌ین روناهیێ بده‌ینه سه‌ر وێ ڤالاتیا د خێزانێدا چێبووی.
مه‌به‌سته‌كا دی ژی ئه‌وه كو ئه‌ڤی سه‌نته‌ری ئاخفتنا خوه هه‌بیت ل دادگه‌هێ یان د هه‌ر دام و ده‌زگه‌هه‌كێ میری دا كو ببیته وه‌ك (پارێزه‌ر) د گه‌ل زارۆكێ شه‌هیدی ل هه‌ر جهه‌كێ پێتڤی. هه‌ڤكارییا په‌روه‌ردێ دڤێت بهێته راستڤه‌كرن دگه‌ل زارۆكێن شه‌هیدان، هاریكارییا وان ل قوتابخانا بهێته‌كرن نه‌ك ب ده‌ربازبوونێ! ئه‌ڤه نه‌هاریكاریه كو قوتابی خالی ده‌ربازببیت! ئه‌و تڤێت بخوینیت و ده‌ربازبیت ! ئه‌م خوه ناوستینین كو تژی زانین ده‌ربازبكه‌ین ل قوناغێن خواندنا وان، یا ژقوتابخانا و ماموستایان ڤه منه‌ته‌ك و هاریكاریه‌ك ل زارۆكێن شه‌هیدا كرن ده‌مێ ده‌ربازكرین!. سالا دویفڕا ژی ئه‌و هه‌ر زارۆكێن شه‌هیدانه! پا دێ هه‌ر هوسا خالی ده‌ربازكه‌ن؟ ئه‌ڤه نه‌باشی یه دگه‌ل وان دهێته‌كرن. دڤێت ب ڕێكێن پێداگوگی و ده‌رونی وی زارۆكێ بریندار بكێشینه د خواندنێ دا، هه‌ر چه‌نده ئه‌وان ئازارێن خوه هه‌نه، لێ ده‌ربازكرنا وان ژی تنێ دبیته باره‌كێ گرانتر ل سالا بهێت. بكێشینه دگوره‌پان و رێزێن ئێكێ دا د چالاكیێن خوه‌دا، ئه‌گه‌ر چنه ل ئاهه‌نگ و هۆلا بلا ئه‌و ل رێزا ئێكێ ب رۆینن و زكێن مه ل پشت وان بن، ژ به‌ركو سه‌رێت مه دمه‌زنن ئه‌و چالاكیا نابینن.
