پێشنیازا پارتی بۆ گوھۆڕینا سەرۆکێ پەرلەمانی قانوونیە
ئه‌ڤرۆ نيوز:
سەرۆکێ ئێکەتیا پەرلەمانتارێن کوردستانێ خویاکر، کۆمبوونا چەند لایەنان بۆ کاراکرنا پەرلەمانی چو مفایێ خوە نابیت و ھەتا ھەموو لایەن پێکڤە نەچنە کۆمبوونان ئاریشە ناھێنە چارەسەرکرن و پەرلەمان دەست بکارێن خوە ناکەت، ھەروەسا دیارکر، پێشنیارا پارتی بۆ گۆھڕینا سەرۆکێ پەرلەمانی پێشنیارەکا قانوونیە بەلێ دڤێت د کۆمبوونا پەرلەمانی دا بڕیارلسەر گۆھڕینا دەستەیا سەرۆکایەتیا پەرلەمانی بھێتەدان.
نیعمەت عەبدوڵا، سەرۆکی ئێکەتیا پەرلەمانتارێن کوردستانێ بۆ رۆژناما ئەڤرۆ گۆت” ژبۆی کۆمبوونا پەرلەمانی و کارا کرنا پەرلەمانێ کوردستانێ پێدڤیە ھەموو لایەنێن سیاسی پێکڤە کۆمبن نەک وەکی بەری چەند رۆژان چەند فڕاکسیۆنەکێن ناڤا پەرلەمانی پشکداری کۆمبوونێ بکەن ھندەک فڕاکسیۆن پشکداریێ نەکەن، ھەر کۆمبوونەکا لدۆر کارا کرنا پەرلەمانی دھێتەکرن ھەموو لایەن تێدا پشکدار نەبن ئەف کۆمبوون دێ شکەستنێ بینە و شەرناکەڤیت، بزاڤێن چەند لایەنەکا چو مفایێ خوە نابیت بۆ رێڤەچوونا کۆمبوونا پەرلەمانی، دڤێت سازان بھێتەکرن و لایەنێن سیاسی رێکەڤن پەرلەمان کۆمبیت، راستە لایەنەک داخوازا گۆھڕینا سەرۆکێ پەرلەمانی و دەستەیا سەرۆکایەتیێ دکەت ئەوژی پارتی دیموکراتی کوردستانە، ئەڤە ژی داخوازەکا درستە ژلایێ قانوونی ڤە، بەلێ دڤێت پەرلەمان دەستپێکێ کۆمبیت ل ھەولێرێ و د کۆمبوونێ دا بڕیار لسەر گۆھڕینا دەستەیا سەرۆکایەتیا پەرلەمانی بھێتەدان، نەک بڤی شێوەی دەرڤەی پەرلەمانی بێژن دڤێت سەرۆکێ پەرلەمانی بھێتە گۆھڕین، بەرۆڤاژی رێکەفتنا لایەنێن سیاسی ھەر کۆمبوونەکا بھێتەکرن ب مەرەما کاراکرنا پەرلەمانی دێ رەوشێ ئالۆزتر بکەت و ناگەھنە چو ئەنجامەکی.
نیعمەت عەبدوڵای گۆتژی” ب ئەگەرێ ڤێ قەیرانا دارایی و شەڕێ تیرۆرستێن داعش فەرە پتر لایەنێن سیاسی نێزیکی ئێکببن، چونکە دێ پشتی شەڕێ داعش و گرتنا مووسل گۆھڕین ل دەڤەرێ ھێنەکرن، لێک دوورکەفتنا لایەنێن سیاسی خزمەتا چو لایەکی ناکەت، پێدڤیە لایەنێن سیاسی ھندەک بێھنا خوە فرەھبکەن ھەتا ھەموو پێکڤە کۆمبن، ئەڤێن پێشنیارا بۆ چارەسەرکرنا ئاریشەیان دکەن نابیت بتنێ کۆمبوونا ئەنجامبدەن و ھەر جارێ ھندەک لایەن کۆمبوون و ھندەک پشکدار نەبن ئەڤە ھەر دێ ئاریشە وەکی خوە بمینن، ھەر لایەنەکێ تەنازولێ بۆ ھەمبەریژی خوەژی بکەت دێ مەزنیا خوە سەلمینیت بۆ دەربازکرنا ھەرێما کوردستانێ ژڤان قەیرانێن نوکە ئەم تێدا دەربازدبین.
