پێشنیاز دكەم كارەبا مەزرەعا ببیتە بازرگانی
هەولێر، قائید میرۆ
شارەزایەكێ وزێ راگەهاند، ل چەند سالێن بوری كەرتێ وزێ پێشكەفتن بخۆڤە دیتیە و ئەنجامدانا سیستەمێ 24 دەمژمێری یێ كارەبێ دێ ئاریشا كارەبێ چارەسەر كەت. هەروەسا دبێژیت: پێشنیاز دكەم كارەبا مەزرەعا ببیتە بازرگانی، دا كو خەلك ئابورێ د ب كارئینانا كارەبێ دا بكەت.
حەمە ئەمین هەورامانی، سەرۆكێ رێكخراوا وزەی بۆ رۆژناما ئەڤرۆ دیار كر» كەرتێ وزەی ل هەرێما كوردستانێ پێشكەفتنێن مەزن بخۆڤە دیتینە، ب تایبەتی ل سەردەمێ كابینا نەهێ، چونكە گرنگیەكا زۆر ب كەرتێ وزەی هاتیەدان، نوكە حوكمەت یا كار دكەت بۆ دابینكرنا كارەبا 24 دەمژمێری و ل هەولێرێ هاتیە دەستپێكرن و بڕیارە ل هەموو پارێزگە و دەڤەرێن دی ژی بهێتە ئەنجامدان، چونكە پڕۆژێ كارەبا پریپەید چەندین مفا هەنە، ژبلی كو دێ كارەبا دێ بیتە 24 دەمژمێرێن دێ بارگرانیا سەر هێلێن كارەبێ ژی كێمتربیت و وەلاتی ژی دێ ئابوورێ د ب كارئینانا كارەبێ دا كەن، ژلایێ بهای ژی بهایێ كارەبا نیشتیمانی ب سیستەمێ پریپەید زۆر ئەرزانترە ژ كارەبا موەلیدەی، هندەك تاخێن هەولێرێ كارەبا كریە 24 دەمژمێر بهایێ كارەبێ ژی زۆر ئەرزانترە ژ بەری نوكە، چونكە مە بەرهەمێ كارەبێ هەیە ئاریشە ئەڤە نەهاتیە كۆنتڕۆلكرن، هەتا پشكدارێن كارەبێ نەهێنە كۆنتڕۆلكرن رەوشا كارەبێ دێ هەر وەك خۆ مینیت.
حەمە ئەمین هەورامانی ئاماژەكر» بەری نوكە من پێشنیاز كربوو كارەبا مەزرەعەیان ببیتە بازرگانی، مەرەما من ژی ئەو نینە پارەیەكێ زۆر ژ خەلكی وەربگرین، بەرۆڤاژی ب تنێ مەرەم ئەڤە كارەب كیمتر بهێتە بكارئینان، بەری خۆ بدەنە وان تاخێن كارەبا گشتی هەی، وەلاتی ب كەیفا خۆ كارەبێ بكار دئینیت و دبێژن كارەب یا بەلاشە، هەر مەزرەعەیەكێ دبینی ب دەهان گلۆپ و ئامیرێن مەزن كار دكەن و زۆر پێدڤی ژی نینە، تنێ كارەب یا بەلاشە یان بهایەكێ كێمە، لەوڕا ئابور د كارەبێ دا ناهێتەكرن ئەگەر بهێت و كارەبا مەزرەعا ببیتە بازرگانی خەلك بكار نائینیت، هەروەسا ژێدەرێن وزێ بهێنە بەرفرەهكرن. بۆ نموونە ئەڤا دبێژنێ تاقە شەمسی بهێنە دانان و بۆ ئامیڕێن گەرمكرنێ مفا ژ رۆژێ بهێتە وەرگرتن، هەتا ئەز باوەرم دڤێت ئیراق ژی مفای ژ ئەڤی سیستەمێ هەرێما كوردستانێ بۆ پڕۆژێ پریپەید یان ژی كڕینا كارەبا بەروەخت وەربگریت.
