پێشوازى ل یاریكه‌ره‌كا هه‌لبژارتیێ ئه‌لمانیا هاته كرن
ئه‌ڤرۆ نیوز، زنار زوبێر:
ل باره‌گایێ خوه هه‌ردو سه‌روكێن نوونه‌راتیا دهۆك یا لژنا ئولومپیا كوردستانێ و سه‌روكێ یانا دهۆك دوهى جودا پێشوازى ل یاریكه‌را بنیات كورد و هه‌لبژارتیێ ئه‌لمانیا یا كیك بوكسێ سوزان حه‌مید كر.
د ڤى چارچوڤه‌ى دا دكتور ئه‌حمه‌د قاسم سه‌روكێ نوونه‌راتیا دهۆك یا لژنا ئولمپى بخێرهاتنا ڤێ یاریكه‌رێ كر بۆ پارێزگه‌ها دهۆكێ و ده‌ستخوشى ل ئاست و ئه‌نجامێن وێ یێن دلخوشكه‌ر ل سه‌ر ئاستێ جیهانێ كر و هیڤى خواست یا به‌رده‌وام بیت ل سه‌ر ئاستێ خوه و سوزدا هه‌ر تشته‌كێ پێدڤى بۆ ڤێ یاریكه‌رێ به‌رهه‌ڤ بكه‌ت و زێده‌تر پشته‌ڤانیا وێ بكه‌ن پێخه‌مه‌ت باشتركرنا ئاستێ وێ.
ژلایێ خوه ڤه سه‌روكێ یانا دهۆك بژار ئسماعیل و كارگێریا یانا دهۆك ژى پێشوازى ل یاریكه‌را ناڤبرى كر و هیڤى خواست یا به‌رده‌وام بیت ل سه‌ر ئاست و ئه‌نجامێن خوه یێن باش ل سه‌ر ئاستێ جیهانێ و ئوروپا و سه‌روكێ یانا دهۆك داخواز ژ راهێنه‌رێ یانێ سالح كه‌كو كر زێده‌تر كار ل سه‌ر به‌رهه‌ڤكرنا ڤێ یاریكه‌رێ بكه‌ت بۆ قاره‌مانیا ئوروپا ئه‌وا بریاره ل 11 ڤێ هه‌یڤێ ل وه‌لاتێ ئسپانیا بهێته‌كرن.
ل دووماهیێ كارگێریا یانا دهۆك و نینه‌را دهۆك یا لژنا ئولومپى جودا خه‌لاته‌ك وه‌كو پشته‌ڤانى پێشكێشى سوزانێ كر.
ل دووماهیێ بابێ یاریكه‌ر سوزانێ حه‌مید ئێمینكى سوپاسیا سه‌روكێ یانا دهۆك و نینه‌راتیا دهۆك یا لژنا ئولومپى كر بۆ خه‌لاتكرن و پێشوازى كرنا كچا وى كو دێ ئه‌ڤ چه‌نده بیته پالده‌ر بۆ وێ زێده‌تر خوه بوه‌ستینت بۆ قاره‌مانیێت پاشه‌رۆژێ و به‌رهه‌ڤیا خوه دیاركر بۆ هنارتنا كچا خوه سوزانێ بۆ هه‌ر قاره‌مانیه‌كا یانا دهۆك یان هه‌لبژارتیێ كوردستانێ یێ یاریا كیك بوكسێ پشكداریێ بكه‌ت ب ناڤێ وه‌لاتێ خوه یێ ره‌سه‌ن.
