پێشڤەچوونا چارەسەریا پەنجەشێرێ
تیمەکێ ڤەکۆلەران ل وەلاتێ چینێ پێشکەفتنەکا مەزن د بیاڤێ چارەسەرکرنا پەنجەشێرێ دا بدەستڤە ئینا، پشتی کو شیاین بەکتریایەکا دەستکاری کری (ژ لایێ جینی ڤە) بکاربینن بۆ نیشانکرن و ژناڤبرنا گرێیێن پەنجەشێرێ.
زانایێن زانکۆیا “شاندۆنگ” بەکتریایەک بکارئینایە کو ب ناڤێ “Escherichia coli Nissle 1917” دهێتە نیاسین، ئەڤ بەکتریایە هاتیە گوهۆڕین دا کو وەکی “گوهاستنەرا ژیر” (Smart Carrier) د ناڤ لەشێ مرۆڤی دا کار بکەت.
ڤەکۆلەر شیان وە ل بەکتریایێ بکەن کو ماددەیێ “رۆمیدیپسین” بەرهەم بینیت، کو ئەڤە دەرمانەکێ دژی گرێیێن گەندەبوویە و ژ لایێ رێکخراوا دەرمان و خوارنا ئەمریکی FDA ڤە هاتیە پەسەندکرن.
ئەو تاقیکرنێن د کۆڤارا زانستی یا “PLOS Biology” دا هاتینە بەلاڤکرن دیار دکەن کو ئەڤ بەکتریایە خودان شیانێن سەیرە:
* بەکتریا ب ئاراستەیەکا راستەوخۆ بەرەڤ گرێیا پەنجەشێرێ دچیت.
* ل ناڤ دلێ گرێیێ دا زێدە دبیت.
* ماددەیێ چارەسەریێ (رۆمیدیپسین) ل ناڤ جهێ نەخۆشیێ بەرددەت، ئەڤ چەندە دبیتە ئەگەرێ بلندبوونا کاریگەریا چارەسەریێ و کێمبوونا نیشانێن خراب (Side effects) یێن چارەسەریا کیمیاوی یا جاران.
سەرەرای ئەنجامێن دلخۆشکەر ل سەر “مشکێن تاقیگەهێ”، تیمێ زانستی جەخت ل سەر ڤان خالان کریە:
* پێدڤیە ڤەکۆلین و تاقیکرنێن زێدەتر ل سەر مرۆڤی بهێنە کرن دا کو پشتراست بن ژ پاراستنا سلامەتیا وی.
* پێدڤیە رێکەک بهێتە داهێنان دا کو پشتی کارێ خۆ ب دووماهی دئینیت، لەش ب ساناهی ژ وێ بەکتریا رزگار ببیت.
