پێـشەوا (قـازی محەمـەد) و وەسـیەتـنامـە
بەهزاد بەهرام
هەردەما لاپەرین دیرۆكا مللەتێ كورد ڤەدەین، پێدا بچینە خوارێ و بخوینین، دێ چەندین شۆرش و سەرهلدان و داستانان د چەند قووناغێن گرنگ و هەستیار دا بینین، ئەڤجا هەر شۆرش و سەرهلدان و داستانەك، ڕابەر و ڕێبەرەك ژ كوردان ب پشتەڤانی و پالپشتیا مللەتێ كورد ل هەر چار پارچەیێن كوردستانێ بەرپاكرییە؛ ئێك ژ وان ڕابەر و ڕێبەرێ مللەتێ كورد پێشەوا (قازی محەمەد)ە ژ بنەماڵەكا كورد پەروەر، ئازادیخواز و ئاشتیخواز، ناڤدار و بەرنیاسە ل رۆژهەلاتێ كوردستانێ، پێشەوا قازی هەر ژ تەمەنێ گەنجاتیێ ژ لایەكیڤە حەز و ڤیانا خواندن و زانینێ و ڕۆشنگەری لدەڤ هەبوویە، ژ لایەكێ دیڤە تێكەلی كەسانێن زانا، نیشتمانپەروەر و سەرۆك هۆزان بوویە، هەر ژبەر ڤان سالۆخەت و تایبەتمەندیێن كەسایەتیا پێشەوای، بەر ب كۆمەڵەی ژیانەوەی كورد (ژ.ك) دچیت و دبیتە ئەندام د ڤێ كۆمەلێ دا ب ناڤنهێنی (بینای) دهێتە ناڤكرن، ڕۆلەكێ كاڕا و مەزن دبینیت. هەر ل بەر سیبەرا ئەڤێ كۆمەلێ باندۆرا وی ل سەر دەڤەرێ، هزر د دامەزراندنا پارتەكێ دا دكەت ل رۆژهەلاتێ، ل سالا 1945 پارتی دیموكراتی كوردستان- ئیران دادمەزرینیت، خەباتا نیشتمانپەروەری و سیاسی بەر ب قووناغەك دی دبەت، پاشی ژبەر لێكهەڤنەهاتنا مللەتێ كورد و حوكمەتا ئیرانێ یا وی سەردەمی، هزر د دامەزراندنا كۆمارەكێ هاتەكرن ل 22/1/1946 ز (كۆمارا كوردستان) ل باژێرێ مهابادێ دامەزراند. بابێ روحیێ نەتەوا كورد بارزانیێ نەمر (مستەفا بارزانی) بەشداری د كۆمارا كوردستان دا دكەتن، ڕۆل و پێگەهێ خوە ب شێوەیەكێ گشتی، ب تایبەتی دبوارێ سەربازی دا هەبوو. ئارمانجا سەرەكیا ئەڤێ كۆمارێ ئازادیا تاكێ كورد، زمانێ دایكێ ب زمانێ ڕاگەهاندن، خوێندن و فەرمانگەهان بهێتە ناساندن، هەلبژاردنێن پارێزگەهان بهێنەكرن و تاكێ كورد بخوە ل دەڤەرێن كوردنشین دەستهەلاتێ بگرنە دەست، چەندین ئارمانجێن سەرەكی و لاوەكی ئەڤێ كۆمارێ ب خوە ڤە گرتبوون، بەلێ ب مخابنیڤە پشتی (11) هەیڤان ژ تەمەنێ كۆمارێ ئێدی پێشەوای هەست ب وێ چەندێ كر كو پشتەڤانیا ژ دەرڤە دەست ژ پشتەڤانیێ بەردا و شاه و حوكمەتا ئیرانێ ژلایەكی ڤە، ژلایەكێ دی ڤە خیانەتكار و نەمەردێن كورد لێ بوون دوژمن و دەست ب خەنجەر پشت وەشین هاتنە مەیدانێ، ئێدی د ناڤبەرا بەرگریكرنێ و خوەدانەدەست، پێشەوای ژبەركو ئێك دلۆپا خوینا گەنجێ كورد ل دەف گرنگ و بها بوویە، نەڤیایە خوین بهێتە ڕشتن، ژبلی خوینا لەش و گیانێ خوە ئێدی خوە دانەدەست هەلبژارت، د هەمان دەم دا ئالایێ پیرۆزێ كوردستانێ رادەستی بارزانیێ نەمر دكەت، بارزانێی نەمر ژی ب سۆز و پەیمان ڤە ئالایێ پیرۆزێ كوردستانێ وەردگریت و دپارێزیت، ئەڤرۆكە ژی ئەم ب چاڤێن خوە دبینین كە هەر یێ بلند و پیرۆزە. كۆمارا كوردستان ژ لایێ فاشیزما ئیرانێ ڤە ژناڤ دچیت، (قازی محەمەد ) برا و پسمامێ خوە ب ناڤێ (سەدر قازی و سەیف قازی) دهێنە گرتن و زیندانكرن و دادگەهكرن. ب گوهۆرینا نەخشێ وەلاتێ ئیرانێ و ئالا و خیانەتكرنێ..هتد دهینە گونەهباركرن، پشتی سێ هەیڤان ژ زیندانكرنێ قانوونا بدارڤەكرنێ (سێدارەكرن) ل سەر دهیتە سەپاندن، ل رۆژا 31/3/1947ز ل مەیدانا چارچرا ل باژێرێ مهابادێ دگەل برا و پسمامێ وی دهێنە سێدارەدان، دگەهنە ڕێزێن كاروانێ شەهیدێن ڕێبازا ڕزگاریخوازا دۆزا نەتەوا كورد و كوردستانێ. بەلێ هەژی ئاماژەپێكرنێ یە بەری پیشەوا قازی بهێتە سێدارەدان (وەسیەتنامەك) نڤیسی یە، دشێن ب وەسیەتنامەكا جڤاكی و سیاسی ناڤ ببەین، ب كاریگەرترین وەسیەتنامە بدەینە دیاركرن، كو ژ پێشەكی و ناڤەرۆك (10) خال، بنەما و پرەنسیپ، ئامۆژگاریان ب دوماهیك دئینیت. دشێن ب كورتترین شیوە ڤان (10) خالان بدەینە بەرچاڤكرن.
1- باوەریبوون ب خۆدایێ مەزن، پێغەمبەری.
2- ئێكگرتن، ئێكرێزی وئێكبوونا كوردان.
3- خوێندن و زانست و زانین.
4- باوەری نەبوون ب دوژمنان.
5- خوەنەفرۆشتن.
6- خیانەتنەكرن (خیانەتا سیاسی، نامووسی، گیانی و مالی).
7- هاریكاریكرنا ئێك و دو.
8- ئاڤاكرن و مفاوەرگرتن ژ مزگەفت و نەخۆشخانە و قوتابخانان.
9- ژ خەباتكرنێ رانەوەستن.
10 – هەر تاكەكێ ماف ل سەر من مابیت یان هەبیت بلا ژ سەروەتێ من ببەت و ژ وارسێن من بخوازیت.
هزار سلاڤ ل گیان و گۆرا سەركردەیێ ئازا و چاڤنەترس و قەهرەمان شەهید پێشەوا (قازی محەمەد) و هەڤالێن وی، هەمی شەهیدێن بزاڤا رزگاریخازا دۆزا رەوایا نەتەوا كورد و كوردستانێ، ل فیردەوسێ شاد ببن.
