پێكڤه كاركرنه‌كا خورت هه‌یه
ئه‌ڤرۆ، نه‌وزاد هلۆری:
هه‌ر چه‌نده كورد وه‌كو داب و نه‌ریت كه‌سه‌كی هه‌ڤكار و هاریكاره ژ بو هه‌موو وان كه‌سێن ده‌ورۆبه‌رێن وان دژین، به‌لێ ئه‌ڤ گیانێ هه‌ڤكاریێ ل گوندان پتره ب تایبه‌تی ده‌مێ دبیته وه‌رزێن كارا و ره‌مه‌زانێ.
بابێ زناری، وه‌لاته‌كێ گوندێ بالندایه و دیاركر كو هه‌ر ژ كه‌ڤن هه‌تا نوكه خه‌لكێ گوندان گرنگی ب بنه‌ما و داب و نه‌ریتێن پێكڤه ژیان و كاركرنێ دده‌ن ل گوندان و گۆت ژی: (خه‌لكێ گوندان هه‌موو وه‌كو خێزانه‌كێ دژین و پرانیا وان ژی ب خوینێ دگه‌هن ئێك، ده‌مێ دبیته وه‌رزێ كاری، هه‌موو پێكڤه هه‌ڤكاریا هه‌ڤدو دكه‌ن ب رێیا زوبارێ، دیسان ده‌مێ كابانیه‌كا مالێ خوارنه‌كێ دروست دكه‌ت بۆ زارویێن خوه ئه‌و هزرا ده‌ورۆبه‌رێن خوه ژی دكه‌ت و هنده‌ك بۆ دبه‌ن ب تایبه‌تی ل هه‌یڤا ره‌مه‌زانێ كو وه‌كو نه‌ریته‌كێ سالانه‌یه و هه‌موو خێزان خوارنێ بۆ هه‌ڤدوو دبه‌ن، ئه‌ڤێ یه‌كێ گرنگیه‌كا زۆر هه‌یه ب تایبه‌تی بۆ خه‌لكێ گوندان ژبه‌ركو دێ بیته ئه‌گه‌ر كوپ تر ل هه‌ڤدو نێزیك بن).
پرژین حه‌سه‌ن، ژنه چالاكڤانه‌كا ده‌ڤه‌رێ یه، ئه‌و دبێژیت: (مرۆڤ وه‌سا هاتیه دروستكرن كو نه‌شێت ب تنێ بژیت و ب تنێ كاروبارێن خوه ژی بكه‌ت، له‌وا گرنگه زێده‌تر پوته ب پێكڤه كاركرنێ بهێته‌دان، بێگومان گیانێ هه‌ڤكاریێ ل گوندان پتر ژ باژێرا دهێته‌دان ژبه‌ركو ل گوندان زێده‌تر په‌یوه‌ندیێن گیانی و خێزانی و مرۆڤایه‌تی هه‌یه، به‌لێ باژێرا كێمتر هه‌یه ژبه‌ركو كومه‌لگه‌هه‌كا مه‌زنتره و زێده‌تر گرێدای شارستانیا سه‌رده‌مه، نوكه ل گوندان هه‌ر خوارنه‌كا بهێته دروستكرن به‌هرا جیران و ده‌ورۆبه‌ران ژی دهێته برن خوه ئه‌گه‌ر چه‌ند كێم ژی بیت).
زێده‌تر گۆت: (هه‌ر چه‌نده نوكه خه‌لكێ گوندان ژی مینا باژێرا هه‌موو تشت ل به‌رده‌ستن و بوینه خودان باوه‌رنامه و ده‌رچویێن زانكۆ و په‌یمانگه‌هانن و ل دام و ده‌زگه‌هێن حوكمی و تایبه‌ت كارێ خوه‌كه‌ن و زانست و ته‌كنولوژیا سه‌رده‌م گه‌هشتیه وان ژی و مفای ژێوه‌ردگرن، به‌لێ جهێ داخێ یه ژی كو ئالیێن شوله‌ژێ وه‌كو پێدڤی خزمه‌تگۆزاریێن جودا ل گوندان دروست نه‌كرینه ب تایبه‌تی سه‌نته‌رێن پێگه‌هاندنێ و جڤاكی، ئه‌ڤه زێده‌باری كو كێماسی د خزمه‌تگۆزاریێن دن ژی هه‌یه، له‌وا گرنگه تاكێ كورد بهێته ئاڤاكرن و زێده‌تر گرنگی ب گیانێ پێكڤه كاركرنێ و گیانێ هه‌ڤكاریێ بیت)
