پێلا سێیێ یا كۆرۆنایێ مه‌ترسی په‌یداكرینه
هه‌ولێر، قائید میرۆ:
چه‌ند رۆژه‌كه پێلاكا نوو یا ڤایرۆسێ كۆرۆنایێ عیراق و هه‌رێما كوردستانێ ڤه‌گرتینه و په‌یڤدارێ وه‌زاره‌تا ساخله‌میێ ژی دبێژیت: سه‌ره‌دان و نڤاندنا نه‌خۆشێن كۆرۆنایێ ل نه‌خۆشخانان زێده‌بوویه.
دكتۆر ئاسۆ حه‌وێزی، په‌یڤدارێ وه‌زاره‌تا ساخله‌میێ بۆ رۆژناما ئه‌ڤرۆ گۆت: “ئامارێن ڤایرۆسێ كۆرۆنایێ چه‌ند رۆژه‌كه به‌ر ب زێده‌بوونێ نه و سه‌ره‌دانا كه‌سێن تووشی ڤایرۆسێ كۆرۆنایێ بووین بۆ نه‌خۆشخانان گه‌له‌ك زێده‌بوویه، له‌وڕا پێدڤیه وه‌لاتی به‌رده‌وامیێ بده‌نه رێنمایێن خوه‌پارێزیێ، چونكو پێلا سێیێ یا كۆرۆنایێ نوكه ل هه‌رێما كوردستان و عیراقێ دژواربوویه، وه‌زاره‌تا ساخله‌میێ ژی بزاڤێن وێ د به‌رده‌وامن بۆ پاراستنا وه‌لاتیان”.
دكتۆر ئاسۆ حه‌وێزی دیار كر، بڕیاره هژماره‌كا دی یا ڤاكسینێن دژی كۆرۆنایێ ل به‌غدا بگه‌هنه هه‌رێما كوردستانێ و پشتی گه‌هشتنێ ژی ل سه‌ر هه‌موو پارێزگه‌هان دێ هێنه به‌لاڤكرن و گۆت: “بڕیاره ڤێ حه‌فتیێ پاسپۆرتا ڤاكیسنێ ژی ده‌ركه‌ڤیت بۆ ئه‌وان كه‌سێن ڤاكسینا كۆرۆنایێ ب كارئینای، ل چه‌ندین ولاتێن جیهانێ ژی نوكه كار ب پاسپۆرتا ڤاكسینێ دهێته‌كرن، هه‌موو رێكارێن ده‌ركرنا پاسپۆرتا ڤاكیسنێ ب دووماهی هاتینه و ل چه‌ند رۆژێن داهاتی دێ هێنه به‌لاڤكرن”.
