پێلا كوچبه‌ران ژ تاكان بوویه كۆم و خێزانی
دهۆك، نه‌وزاد هلۆری:
ژ ئه‌گه‌رێ تێكچونا ره‌وشا عیراقێ و كوردستانێ، ب تایبه‌تی ژ روویێ دارایی و ئه‌منی ڤه بویه ئه‌گه‌ر كو پێلا چونا وه‌لاتیان و گه‌نجان بۆ ده‌رڤه یا به‌رده‌وام بیت، ئه‌ڤه و زێده‌باری كو مه‌ترسیێن جدی ل سه‌ر ژیانا وان هه‌نه.
دانوستاندنه‌كا ڤه‌كری دناڤبه‌را هژماره‌كا سازیێن جڤاكی و رۆژنامه‌ڤان و چالاكڤانێن سنورێ پارێزگه‌ها دهۆكێ هاته كرن و تێدا هه‌موو ئه‌گه‌ر و كارتێكرن و چاره‌سه‌ریێن چونا گه‌نج و خێزانان بۆ ده‌رڤه هاتنه به‌حسكرن.
نه‌فه‌ل شه‌ریف، چالاكڤانه كو پشكداری د رونشتنێ دا كربوو گۆت: (ئه‌گه‌رێن چونا وه‌لاتیێن هه‌رێما كوردستانێ زۆرن، به‌لێ ب دیتنا من ئێك ژ ئه‌گه‌رێن سه‌ره‌كی ئه‌وه كو خه‌لكێ مه ژلایێ هنده‌ك كه‌سان دهێنه سه‌ردابرن كو ئه‌ڤێ یه‌كێ ژی كارتێكرنا خوه هه‌یه، دیسان ئاسانكاریێن زۆر ژلایێ قاچاخچیان بۆ خه‌لكی دهێنه كرن).
ئیبراهیم دێرگژنیكی رۆژنامه‌ڤانه ل سه‌ر بابه‌تی گۆت: (خه‌لكێ مه بێ ئومێد بویه و چو پاشه‌رۆژێن روون و گه‌ش ل به‌ر سینگی نینن، ئه‌ڤه زێده‌باری كو قه‌یران به‌رده‌وامن و چو سیسته‌م ژی نینه و لایه‌نێن سیاسی ژی ماینه ب هه‌ڤركیان ڤه، له‌وا دڤێت ئه‌ڤ یه‌كه بهێته لادان و سیسته‌مه‌ك بهێته ئاڤاكرن هه‌موو پێكهاته‌یێن جڤاكی خوه تێدا ببینن و دادپه‌روه‌ری هه‌بیت).
د كومبوونێ دا چه‌ندین كه‌سانێن دی ئاخفتن و تیشك ئێخسته سه‌ر وێ یه‌كێ كو قه‌یرانا دارایی، بێكاری، نه‌دادپه‌روه‌ری، تێكچونا ره‌وشا ئه‌منی ل هنده‌ك سنوران ژ به‌ر شه‌رێ توركیا و په‌كه‌كێ، دیسان نه دامه‌زراندنا گه‌نجان و ده‌رچویێن زانكویێ و نه‌بونا ده‌لیڤێن كاری و ئاریشه ل هنده‌ك ده‌مان بۆ موچه خوران و نه‌بوونا بازاڕی و پشته‌ڤانیكرنا كه‌رتێ چاندنێ و گه‌شتوگۆزارێ، هه‌ر دیسان نه رونیا به‌رنامه‌یێن ئالیێن سیاسی و به‌رده‌وامبوونا نه ئارامیا سیاسی و شه‌رێن تیرورێ ل هنده‌ك ده‌ڤه‌ران ئه‌گه‌رێن سه‌ره‌كی یێن چونا وه‌لاتیانن بۆ ده‌رڤه، وان خواست كو دادپه‌روه‌ریا جڤاكی بهێته هه‌بونێ و پشته‌ڤانیا گه‌نجان بهێته كرن داكو قه‌ستا ده‌رڤه نه‌كه‌ن.
به‌یار دوسكی، سه‌رۆكێ سه‌نته‌رێ چالاكیێن لاوان ل دهۆكێ دیاركر كو پێلا چونا گه‌نجان و وه‌لاتیان بۆ ده‌رڤه‌ی كوردستانێ یا به‌رده‌وامه و ره‌وشا ژین و ژیارا وه‌لاتیێن كوچبه‌رێن هه‌رێما كوردستانێ ب رێیا بیلا روسیا و پوله‌ندا و لیتوانیا بۆ ئه‌ورۆپا گه‌له‌ك یا خرابه، هه‌م ژ روویێ كه‌ش و هه‌وای ڤه، هه‌م ژی ژلایێ ئه‌من و ئاسایشێ ڤه و گۆت: (مه‌ترسیه‌كا جدی ل سه‌ر گیانێ وان هه‌یه و چه‌ند كه‌سان گیانێ خوه ژ ده‌ستدایه و هژماره‌كا زۆر ژی دنالن ژبه‌ر سه‌رمایێ و برسێ و كارتێكرنێن خراب ل سه‌ر ژیانا وان كرینه، داخوازێ ژ حوكمه‌تا هه‌رێما كوردستان و عیراقێ و رێكخراوێن نیڤده‌وله‌تی و هه‌رێمی دكه‌ین كو ره‌وشا كوچبه‌ران ل به‌رچاڤ وه‌ربگرن و ژیانا وان ب پارێزن، ئه‌ڤجا چ بهێنه‌ڤه كوردستانێ یان ژی بچنه وان جهێن كو ئه‌و دخوازن قه‌ست بكه‌نێ).
دوسكی زێده‌تر گۆت: (ژبه‌ركو گه‌نج ستوینا وه‌لاتیه، ئه‌ڤجا پێدڤیه ل سه‌ر حوكمه‌تێ و جهێن شوله‌ژێ بێكاریێ نه‌هێلن هه‌روه‌سا قه‌یرانان و ئاریشێن سیاسی یێن بوینه ئه‌گه‌رێ به‌لاڤبونا كوچبه‌ران چاره‌سه‌ر بكه‌ن، د ڤێ گه‌رێ دا خه‌لك ب گشتی و ب خێزانڤه دچن و ژ ده‌ست ده‌ركه‌فتیه، دڤێت په‌رله‌مان و جڤاتێن پارێزگه‌ها و جڤاكێ نیڤده‌وله‌تی و هه‌موو لایه‌ك خوه ل وان بكه‌ن خودان).
به‌یارێ دوسكی دیاركر ژی كو چو ئامارێن دیار كری و فه‌رمی نینن كا چه‌ند كه‌س چوینه ژ ده‌رڤه، به‌لێ رۆژانه نێزیكێ 300 ڤیزا ل عیراقێ بۆ گه‌نجان و خێزانان ل عیراقێ دهێنه دان و گوت :(پرانیا ان كوچبه‌ران ژی خه‌لكێ پارێزگه‌ها دهۆكێ نه، ئه‌گه‌رێن چونا وان ژی زۆر ژبه‌ركو دناڤ وان دا كه‌سانێ، خودان كار و داهات ژی چوینه).
